ನವದೆಹಲಿ: ಲೋಕಸಭೆಯ ಪ್ರತಿಪಕ್ಷ ನಾಯಕ ರಾಹುಲ್ ಗಾಂಧಿ ಕಳೆದ ವರ್ಷ ನೂರಿ ಅನ್ನೋ ಹೆಸರಿನ ಒಂದು ಪುಟ್ಟ ಮರಿಯನ್ನು ತನ್ನ ತಾಯಿ ಸೋನಿಯಾ ಗಾಂಧಿಗೆ ಗಿಫ್ಟ್ ನೀಡಿದ್ದರು. ಇಂದು ರಾಹುಲ್ ಗಾಂಧಿ ಅವರು ತಮ್ಮ ಇನ್ಸ್ಟಾಗ್ರಾಮ್ನಲ್ಲಿ, ಸೋನಿಯಾ ಗಾಂಧಿ ತಮ್ಮ ಬ್ಯಾಗ್ನಲ್ಲಿ ನೂರಿಯನ್ನು ಕೂರಿಸಿ ಹೊತ್ತುಕೊಂಡು ಹೋಗುತ್ತಿರುವ ಪೋಟೋವೊಂದನ್ನು ಹಂಚಿಕೊಂಡಿದ್ದಾರೆ. ತಾವು ಉಡುಗೊರೆಯಾಗಿ ನೀಡಿದ್ದ ನೂರಿ ಈಗ ಅಮ್ಮನ ಫೇವರೆಟ್ ಡಾಗ್ ಎಂದು ರಾಹುಲ್ ಗಾಂಧಿ ಹೇಳಿದ್ದಾರೆ. ಈ ಫೋಟೊ ಈಗ ಎಲ್ಲೆಡೆ ವೈರಲ್ ಆಗಿದೆ.
ರಾಹುಲ್ ಗಾಂಧಿ ಕಳೆದ ವರ್ಷ ತಮ್ಮ ಯೂಟ್ಯೂಬ್ ಚಾನೆಲ್ನಲ್ಲಿ ಗೋವಾ ಪ್ರವಾಸ ಕೈಗೊಂಡಿದ್ದರ ಬಗ್ಗೆ ವಿಡಿಯೋವೊಂದನ್ನು ಪೋಸ್ಟ್ ಮಾಡಿದ್ದರು. ಅಲ್ಲಿ ಅವರು ಒಂದು ಗೋವಾ ಪರಿವಾರವನ್ನು ಭೇಟಿಯಾಗಿದ್ದರು. ಅವರು ರಾಹುಲ್ ಗಾಂಧಿಗೆ ಪ್ರೀತಿಯಿಂದ ಈ ನೂರಿಯನ್ನು ನೀಡಿದ್ದರು. ನೂರಿಯನ್ನು ದೆಹಲಿಗೆ ತೆಗೆದುಕೊಂಡು ಹೋದ ರಾಹುಲ್ ಗಾಂಧಿ, ತಾಯಿಗೆ ಸರ್ಪ್ರೈಸ್ ಗಿಫ್ಟ್ ಆಗಿ ನೀಡಿದ್ದರು. ಇನ್ನೂ ಒಂದು ಅಚ್ಚರಿಯಂದರೆ, ರಾಹುಲ್ ಗಾಂಧಿ ನೂರಿಗೆ ಮೆಟ್ರೋ ಸವಾರಿಯನ್ನು ಕೂಡ ಮಾಡಿಸಿದ್ದರು.
ರಾಹುಲ್ ಗಾಂಧಿ ತಮ್ಮ ತಾಯಿಗೆ ನಾಯಿ ಮರಿಯನ್ನು ಗಿಫ್ಟ್ ನೀಡುತ್ತಿದ್ದಂತೆ ಅತ್ತ ಅಸಾದುದ್ಧೀನ್ ಓವೈಸಿ ಪಾರ್ಟಿಯ ಒಬ್ಬ ನಾಯಕ, ಈ ಶ್ವಾನದ ಹೆಸರಿನ ವಿರುದ್ಧ ಕೋರ್ಟ್ ಮೆಟ್ಟಿಲೇರಿದ್ದರು. ಈ ಹೆಸರು (ನೂರಿ) ನಮ್ಮ ಧಾರ್ಮಿಕ ಭಾವನೆಗೆ ಧಕ್ಕೆ ತರುವಂತಿದೆ ಎಂದು ಎಐಎಎಂಐನ ನಾಯಕ ಮೊಹಮದ್ ಫರ್ಹಾತ್ ಕೋರ್ಟ್ ಮೆಟ್ಟಿಲೇರಿದ್ದರು. ಹೆಸರು ಬದಲಾಯಿಸುವಂತೆ ಮತ್ತು ಕ್ಷಮೆ ಕೇಳುವಂತೆ ಕೋರಿದ್ದರು. ಆದರೆ ರಾಹುಲ್ ಹಾಗೆ ಮಾಡಿರಲಿಲ್ಲ.
