ಉಡುಪಿ: ಮನೆಯಲ್ಲಿ ಉಳಿಯುವ ಹಸಿ ತ್ಯಾಜ್ಯವನ್ನು ಕೆಲವೇ ಗಂಟೆಗಳಲ್ಲಿ ಉತ್ತಮ ಗುಣಮಟ್ಟದ ಜೈವಿಕ ಗೊಬ್ಬರವನ್ನಾಗಿ ಪರಿವರ್ತಿಸುವ ವಿನೂತನ ತ್ಯಾಜ್ಯ ನಿರ್ವಹಣಾ ಮಾದರಿಯ ಮೂಲಕ ಉಡುಪಿ ಜಿಲ್ಲೆಯ ವಂಡ್ಸೆ ಗ್ರಾಮ ಪಂಚಾಯಿತಿ ರಾಜ್ಯದ ಗಮನ ಸೆಳೆದಿದೆ.
ವಂಡ್ಸೆ ಗ್ರಾಮ ಪಂಚಾಯಿತಿಯ ಎಸ್ಎಲ್ಆರ್ಎಂ (Solid and Liquid Resource Management) ಘಟಕದಲ್ಲಿ ಬ್ಲಾಕ್ ಸೋಲ್ಜರ್ ಫ್ಲೈ (ಕಪ್ಪು ಸೈನಿಕ ನೊಣ) ಕೀಟದ ಮರಿಗಳನ್ನು ಬಳಸಿಕೊಂಡು ಹಸಿ ತ್ಯಾಜ್ಯವನ್ನು ವೈಜ್ಞಾನಿಕವಾಗಿ ಸಂಸ್ಕರಿಸಲಾಗುತ್ತಿದೆ. ಈ ಮರಿಗಳು ಅಲ್ಪ ಸಮಯದಲ್ಲೇ ದೊಡ್ಡ ಪ್ರಮಾಣದ ಹಸಿ ಕಸವನ್ನು ಜೀರ್ಣಿಸಿಕೊಂಡು, ಹೆಚ್ಚಿನ ಪೋಷಕಾಂಶ ಹೊಂದಿರುವ ಜೈವಿಕ ಗೊಬ್ಬರವಾಗಿ ಪರಿವರ್ತಿಸುತ್ತವೆ.
ಈ ಗೊಬ್ಬರವು ಸಾಮಾನ್ಯ ಎರೆಹುಳು ಗೊಬ್ಬರಕ್ಕಿಂತ ಎರಡು ಪಟ್ಟು ಹೆಚ್ಚು ಪೋಷಕಾಂಶ ಹೊಂದಿದ್ದು, ಮಾರುಕಟ್ಟೆಯಲ್ಲಿ ಪ್ರತಿ ಕೆ.ಜಿಗೆ ₹300ರಿಂದ ₹400ರವರೆಗೆ ಮಾರಾಟವಾಗುತ್ತಿದೆ.
ಕೇವಲ ತ್ಯಾಜ್ಯ ವಿಲೇವಾರಿಗಷ್ಟೇ ಸೀಮಿತವಾಗದೇ, ವಂಡ್ಸೆ ಎಸ್ಎಲ್ಆರ್ಎಂ ಘಟಕದಲ್ಲಿ ಜೇನು ಸಾಕಣೆ, ಪಶುಸಂಗೋಪನೆ ಹಾಗೂ ಕುಕ್ಕುಟ ಸಾಕಣೆಯನ್ನೂ ಸಮನ್ವಯಗೊಳಿಸಿ ಪರಿಸರ ಸ್ನೇಹಿ ಮಾದರಿಯನ್ನು ರೂಪಿಸಲಾಗಿದೆ. ತ್ಯಾಜ್ಯವನ್ನು ಆದಾಯದ ಮೂಲವನ್ನಾಗಿ ಪರಿವರ್ತಿಸಿರುವ ಈ ಯೋಜನೆಗೆ ಈಗಾಗಲೇ ಹಲವು ಪ್ರಶಸ್ತಿಗಳೂ ಲಭಿಸಿವೆ.
ಪರಿಸರ ಮಾಲಿನ್ಯವನ್ನು ತಡೆಗಟ್ಟುತ್ತಾ, ಹಸಿ ತ್ಯಾಜ್ಯವನ್ನು ಸಂಪನ್ಮೂಲವನ್ನಾಗಿ ಬಳಸುವ ಈ ಮಾದರಿ ರಾಜ್ಯದ ಇತರ ಗ್ರಾಮ ಪಂಚಾಯಿತಿಗಳಿಗೂ ಪ್ರೇರಣೆಯಾಗಿದ್ದು, ಪರಿಸರ ಸ್ನೇಹಿ ತ್ಯಾಜ್ಯ ನಿರ್ವಹಣೆಯಲ್ಲಿ ವಂಡ್ಸೆ ಗ್ರಾಮ ಪಂಚಾಯಿತಿ ಹೊಸ ಮಾದರಿಯಾಗಿ ಹೊರಹೊಮ್ಮಿದೆ.