ಮಂಗಳೂರು: ವಿಜ್ಞಾನವೆಂದರೆ ಕೇವಲ ಪಠ್ಯಪುಸ್ತಕದ ಪಾಠವಲ್ಲ; ಅದನ್ನು ಪ್ರಯೋಗಗಳ ಮೂಲಕ ಅರಿತುಕೊಳ್ಳುವ, ಹೊಸ ಆವಿಷ್ಕಾರಗಳನ್ನು ಮಾಡುವ ಮತ್ತು ಕುತೂಹಲಕ್ಕೆ ಉತ್ತರ ಕಂಡುಕೊಳ್ಳುವ ವೇದಿಕೆ. ಇಂತಹ ಕಲಿಕೆ ಹಾಗೂ ಸೃಜನಶೀಲತೆಗೆ ಅವಕಾಶ ಕಲ್ಪಿಸುವ ‘ಮೇಕರ್ಸ್ ಫೆಟ್ 2026’ ವಿಜ್ಞಾನ ಉತ್ಸವವು ನವೆಂಬರ್ 15ರಂದು ಮಂಗಳೂರಿನ ಆಕಾಶಭವನದಲ್ಲಿರುವ ಸೆಂಟರ್ ಫಾರ್ ಅಡ್ವಾನ್ಸ್ಡ್ ಲರ್ನಿಂಗ್ (ಸಿಎಫ್‌ಎಎಲ್) ಕ್ಯಾಂಪಸ್‌ನಲ್ಲಿ ನಡೆಯಲಿದೆ.
ಇದು ಮೇಕರ್ಸ್ ಫೆಟ್‌ನ ಎಂಟನೇ ಆವೃತ್ತಿಯಾಗಿದ್ದು, ವಿದ್ಯಾರ್ಥಿಗಳು ಶಿಕ್ಷಕರ ಸಹಕಾರದೊಂದಿಗೆ ರೂಪಿಸಿರುವ ವಿವಿಧ ವಿಜ್ಞಾನ ಪ್ರಯೋಗಗಳು, ತಂತ್ರಜ್ಞಾನ ಆವಿಷ್ಕಾರಗಳು, ಮಾದರಿಗಳು ಹಾಗೂ ಸೃಜನಾತ್ಮಕ ಪ್ರದರ್ಶನಗಳು ಉತ್ಸವದ ಪ್ರಮುಖ ಆಕರ್ಷಣೆಯಾಗಲಿವೆ. ವಿದ್ಯಾರ್ಥಿಗಳು ವರ್ಷವಿಡೀ ತಮ್ಮ ಶಿಕ್ಷಕರು ಮತ್ತು ಕೆಲವೊಮ್ಮೆ ಪೋಷಕರ ಸಹಕಾರದೊಂದಿಗೆ ಸಿದ್ಧಪಡಿಸಿರುವ ಯೋಜನೆಗಳನ್ನು ಇಲ್ಲಿ ಪ್ರದರ್ಶಿಸಲಿದ್ದಾರೆ. ತಾವು ನಿರ್ಮಿಸಿದ ಮಾದರಿಗಳ ಹಿಂದಿನ ಆಲೋಚನೆ, ಸವಾಲುಗಳು ಮತ್ತು ಪ್ರಯೋಗಗಳ ಅನುಭವವನ್ನೂ ಹಂಚಿಕೊಳ್ಳಲಿದ್ದಾರೆ.
ವಿಜ್ಞಾನ, ಕಲೆ ಮತ್ತು ಉದ್ಯಮಶೀಲತೆಗೆ ವೇದಿಕೆ
ವಿದ್ಯಾರ್ಥಿಗಳಲ್ಲಿ ವೈಜ್ಞಾನಿಕ ಮನೋಭಾವ, ಸೃಜನಶೀಲತೆ ಮತ್ತು ತಂಡದ ಕೆಲಸವನ್ನು ಉತ್ತೇಜಿಸುವ ಉದ್ದೇಶದಿಂದ ಈ ಉತ್ಸವ ಆಯೋಜಿಸಲಾಗಿದೆ. ವಿಜ್ಞಾನ ಪ್ರದರ್ಶನಗಳ ಜತೆಗೆ ಸಂಗೀತ ಮತ್ತು ಸಾಂಸ್ಕೃತಿಕ ಕಾರ್ಯಕ್ರಮಗಳು, ಚಿತ್ರಕಲೆ, ಶಿಲ್ಪಕಲೆ ಸೇರಿದಂತೆ ವಿವಿಧ ಕಲಾ ಪ್ರದರ್ಶನಗಳೂ ನಡೆಯಲಿವೆ.
ವಿದ್ಯಾರ್ಥಿಗಳು ಮನೆಯಲ್ಲಿಯೇ ತಯಾರಿಸಿದ ವಸ್ತುಗಳನ್ನು ಪ್ರದರ್ಶಿಸಿ ಮಾರಾಟ ಮಾಡಲು ಸ್ವಂತ ಮಳಿಗೆಗಳನ್ನು ಸ್ಥಾಪಿಸಲಿದ್ದು, ಯುವ ಉದ್ಯಮಶೀಲತೆಯ ಕೌಶಲಕ್ಕೂ ವೇದಿಕೆ ಒದಗಲಿದೆ.
ಎನ್‌ಐಟಿಕೆ ಮತ್ತು ಅಜೀಂ ಪ್ರೇಮ್‌ಜಿ ವಿಶ್ವವಿದ್ಯಾಲಯದ ವಿಶೇಷ ಪ್ರದರ್ಶನ
ಎನ್‌ಐಟಿಕೆ ಸುರತ್ಕಲ್‌ನ SOLVE ಹಾಗೂ ಅಜೀಂ ಪ್ರೇಮ್‌ಜಿ ವಿಶ್ವವಿದ್ಯಾಲಯಗಳು ಉತ್ಸವದಲ್ಲಿ ವಿಶೇಷ ಪ್ರಾತ್ಯಕ್ಷಿಕೆಗಳನ್ನು ನಡೆಸಲಿವೆ.
ಎನ್‌ಐಟಿಕೆ ಸುರತ್ಕಲ್‌ನ SOLVE ವಿಭಾಗವು ಎಂಜಿನಿಯರಿಂಗ್ ಪ್ರಯೋಗಾಲಯಗಳ ತಂತ್ರಜ್ಞಾನವನ್ನು ವಿದ್ಯಾರ್ಥಿಗಳಿಗೆ ಪರಿಚಯಿಸಲಿದೆ. ಯಾಂತ್ರಿಕ ಕಂಪನಗಳು, ಎಲೆಕ್ಟ್ರಾನಿಕ್ಸ್, ಸೆನ್ಸರ್‌ಗಳು, ನಿಯಂತ್ರಣ ವ್ಯವಸ್ಥೆಗಳು ಹಾಗೂ ಎಂಜಿನಿಯರಿಂಗ್ ಸಿಮ್ಯುಲೇಷನ್‌ಗಳ ಕುರಿತು ಪ್ರಾಯೋಗಿಕ ಅನುಭವ ನೀಡಲಾಗುತ್ತದೆ. ಇಂಟರ್ನೆಟ್ ಮೂಲಕ ನೈಜ ಪ್ರಯೋಗ ಉಪಕರಣಗಳನ್ನು ನಿಯಂತ್ರಿಸಿ ಫಲಿತಾಂಶಗಳನ್ನು ವೀಕ್ಷಿಸುವ ಅವಕಾಶವೂ ಇರಲಿದೆ. ಡ್ರೋನ್‌ಗಳು, ಎಲೆಕ್ಟ್ರಾನಿಕ್ ಮಾದರಿಗಳು ಮತ್ತು ವಿದ್ಯಾರ್ಥಿಗಳ ಆವಿಷ್ಕಾರಗಳು ಪ್ರದರ್ಶನಗೊಳ್ಳಲಿವೆ.
ಅಜೀಂ ಪ್ರೇಮ್‌ಜಿ ವಿಶ್ವವಿದ್ಯಾಲಯವು ಜೀವಶಾಸ್ತ್ರ, ಮನೋವಿಜ್ಞಾನ, ಭೌತಶಾಸ್ತ್ರ ಮತ್ತು ಶಿಕ್ಷಕರ ಶಿಕ್ಷಣ ವಿಭಾಗಗಳಲ್ಲಿ ಪ್ರಯೋಗಗಳನ್ನು ಪರಿಚಯಿಸಲಿದೆ. ಡಿಎನ್‌ಎ ಪ್ರತ್ಯೇಕಿಸುವಿಕೆ, ಡಿಎನ್‌ಎ ಎಲೆಕ್ಟ್ರೋಫೋರೆಸಿಸ್, ಸೂಕ್ಷ್ಮದರ್ಶಕದ ಮೂಲಕ ಕೋಶಗಳ ವೀಕ್ಷಣೆ, ಚರ್ಮದ ಸೂಕ್ಷ್ಮಜೀವಿಗಳ ಪರಿಚಯ ಸೇರಿದಂತೆ ಹಲವು ಜೀವಶಾಸ್ತ್ರ ಪ್ರಯೋಗಗಳು ನಡೆಯಲಿವೆ.
ಮನೋವಿಜ್ಞಾನ ವಿಭಾಗದಲ್ಲಿ ಕಣ್ಣಿನ ಚಲನೆ, ಮೆದುಳಿನ ಕಾರ್ಯವೈಖರಿ, ದೃಷ್ಟಿಭ್ರಮೆಗಳು ಮತ್ತು ಪ್ರತಿಕ್ರಿಯೆಯ ವೇಗಕ್ಕೆ ಸಂಬಂಧಿಸಿದ ಆಟಗಳು ಹಾಗೂ ಪ್ರಯೋಗಗಳು ಗಮನ ಸೆಳೆಯಲಿವೆ. ಭೌತಶಾಸ್ತ್ರದಲ್ಲಿ ಬೆಳಕಿನ ವಕ್ರೀಭವನ ಮತ್ತು ಸೋಪ್ ಫಿಲ್ಮ್‌ಗಳಲ್ಲಿ ಉಂಟಾಗುವ ಡಿಫ್ರಾಕ್ಷನ್ ಮಾದರಿಗಳನ್ನು ಪ್ರದರ್ಶಿಸಲಾಗುತ್ತದೆ.
ರೋಬೋಟ್, ಡ್ರೋನ್ ಮತ್ತು ವಿಮಾನ ಮಾದರಿಗಳ ಆಕರ್ಷಣೆ
ಸಿಎಫ್‌ಎಎಲ್‌ನ ಮೇಕರ್ಸ್‌ಸ್ಪೇಸ್ ಮತ್ತು ರೊಬೋಟಿಕ್ಸ್ ಕ್ಲಬ್‌ನ ವಿದ್ಯಾರ್ಥಿಗಳು ತಯಾರಿಸಿರುವ ಹಲವು ಮಾದರಿಗಳು ಉತ್ಸವದಲ್ಲಿ ಪ್ರದರ್ಶನಗೊಳ್ಳಲಿವೆ. ಕೈಚಲನೆಯಿಂದ ನಿಯಂತ್ರಿಸಬಹುದಾದ ರೋಬೋಟ್, ಲೈನ್ ಫಾಲೋಯಿಂಗ್ ರೋಬೋಟ್, ಮೇಜ್ ಸಾಲ್ವಿಂಗ್ ರೋಬೋಟ್, ರೊಬೋಟಿಕ್ ಆರ್ಮ್, ವಿವಿಧ ದಿಕ್ಕುಗಳಲ್ಲಿ ಚಲಿಸುವ ಮೆಕ್ಯಾನಮ್ ವೀಲ್ ರೋಬೋಟ್ ಹಾಗೂ ಮಿನಿ ಫುಟ್‌ಬಾಲ್ ಆಡುವ ರೋಬೋಟ್‌ಗಳು ಪ್ರಮುಖ ಆಕರ್ಷಣೆಗಳಾಗಿವೆ.
ಇದರೊಂದಿಗೆ ಡ್ರೋನ್‌ಗಳು ಮತ್ತು ವಿಮಾನಗಳ ಮಾದರಿಗಳನ್ನೂ ಪ್ರದರ್ಶಿಸಲಾಗುತ್ತದೆ. ವಿಜ್ಞಾನ ಮತ್ತು ಗಣಿತದ ಪರಿಕಲ್ಪನೆಗಳನ್ನು ತಂತ್ರಜ್ಞಾನವಾಗಿ ರೂಪಿಸುವ ವಿದ್ಯಾರ್ಥಿಗಳ ಪ್ರಯತ್ನಗಳನ್ನು ವೀಕ್ಷಿಸಲು ಇದು ಉತ್ತಮ ಅವಕಾಶವಾಗಲಿದೆ.
ಸ್ಪರ್ಧೆಗಳು ಮತ್ತು ಮನರಂಜನಾ ಚಟುವಟಿಕೆಗಳು
ಉತ್ಸವದಲ್ಲಿ ನಾಲ್ಕು ಪ್ರಮುಖ ಸ್ಪರ್ಧೆಗಳು ನಡೆಯಲಿವೆ. ಮೇಕರ್ ಚಾಲೆಂಜ್‌ನಲ್ಲಿ ಹೊಸ ಮಾದರಿಯನ್ನು ವಿನ್ಯಾಸಗೊಳಿಸಿ ನಿರ್ಮಿಸಿ ಪ್ರದರ್ಶಿಸುವ ಅವಕಾಶವಿದೆ. ಇನ್ನೋವೇಶನ್ ಚಾಲೆಂಜ್‌ನಲ್ಲಿ ನೈಜ ಸಮಸ್ಯೆಗಳಿಗೆ ಪ್ರಾಯೋಗಿಕ ಪರಿಹಾರಗಳನ್ನು ಪ್ರಸ್ತಾಪಿಸಬಹುದು. ಬ್ರೇಕ್‌ಥ್ರೂ ಚಾಲೆಂಜ್‌ನಲ್ಲಿ ಕಠಿಣ ವಿಜ್ಞಾನ ಅಥವಾ ಗಣಿತದ ವಿಷಯಗಳನ್ನು ಸರಳವಾಗಿ ವಿವರಿಸಬೇಕು. ಬಾಟ್ ಸಾಕರ್ ಸ್ಪರ್ಧೆಯಲ್ಲಿ ರೋಬೋಟ್‌ಗಳ ಮೂಲಕ ಆಟದ ಕೌಶಲ ಪ್ರದರ್ಶಿಸಬಹುದು.
ಇದಲ್ಲದೆ ಎಗ್ ಡ್ರಾಪ್, ರೂಬಿಕ್ಸ್ ಕ್ಯೂಬ್, ಬೈಟ್ ವಾರ್ಸ್, ಬ್ಯಾಟಲ್ ಆಫ್ ಬ್ಯಾಂಡ್ಸ್, ಒರಿಗಾಮಿ, ಆರ್‌ಸಿ ಕಾರ್ ರೇಸಿಂಗ್, ಲೈಟ್ ಪೇಂಟಿಂಗ್, ಗೆಲಿಲಿಯೋ ಗ್ಯಾಲರಿ, ಕೆಮ್ ಮಿಸ್ಟರಿ, ಆಸ್ಟ್ರೋ ಕ್ಲಬ್ ಡೆಮೊಗಳು ಹಾಗೂ ಆಹಾರ ಮಳಿಗೆಗಳು ಸೇರಿದಂತೆ ಹಲವು ಚಟುವಟಿಕೆಗಳು ಇರಲಿವೆ.
ಉತ್ಸವದ ವಿವರ
- ದಿನಾಂಕ: ನವೆಂಬರ್ 15, 2026
- ಸಮಯ: ಬೆಳಿಗ್ಗೆ 10 ಗಂಟೆಯಿಂದ
- ಸ್ಥಳ: ಸಿಎಫ್‌ಎಎಲ್ ಕ್ಯಾಂಪಸ್, ಆಕಾಶಭವನ, ಕಾವೂರು, ಮಂಗಳೂರು
- ಯಾರಿಗೆ ಅವಕಾಶ: ವಿದ್ಯಾರ್ಥಿಗಳು, ಶಾಲಾ-ಕಾಲೇಜುಗಳು ಹಾಗೂ ಯುವ ವೃತ್ತಿಪರರು
- ನೋಂದಣಿ: ಅಧಿಕೃತ ಪೋಸ್ಟರ್‌ನಲ್ಲಿರುವ ಕ್ಯೂಆರ್ ಕೋಡ್ ಅಥವಾ ವೆಬ್‌ಸೈಟ್ ಮೂಲಕ
ನೋಂದಣಿ ಮತ್ತು ಹೆಚ್ಚಿನ ಮಾಹಿತಿಗಾಗಿ: www.cfalindia.com/makers-fete
ಸಿಎಫ್‌ಎಎಲ್ ಸಂಸ್ಥೆಯು ಗಣಿತ ಮತ್ತು ವಿಜ್ಞಾನದಲ್ಲಿ ವಿದ್ಯಾರ್ಥಿಗಳಿಗೆ ಭದ್ರ ಅಡಿಪಾಯ ಕಲ್ಪಿಸುವುದರ ಜೊತೆಗೆ ಜೆಇಇ, ನೀಟ್, ಒಲಿಂಪಿಯಾಡ್ ಸೇರಿದಂತೆ ವಿವಿಧ ರಾಷ್ಟ್ರೀಯ ಮಟ್ಟದ ಪ್ರವೇಶ ಪರೀಕ್ಷೆಗಳಿಗೆ ಸಿದ್ಧಗೊಳಿಸುವ ಕಾರ್ಯದಲ್ಲಿ ತೊಡಗಿಸಿಕೊಂಡಿದೆ.