ವರದಿ : ಮಂದಾರ ರಾಜೇಶ್ ಭಟ್
ಕಲೆ ಮತ್ತು ಸಾಹಿತ್ಯದ ತವರೂರು ಶಿವಮೊಗ್ಗಕ್ಕೆ ಮತ್ತೊಂದು ಸಾಂಸ್ಕೃತಿಕ ಕಾರ್ಯಕ್ರಮಕ್ಕೆ ಸಜ್ಜಾಗುತ್ತಿದೆ. ಜಿಲ್ಲೆಯ ಶಂಕರಘಟ್ಟದ ‘ದೀನಬಂಧು ಸೇವಾ ಟ್ರಸ್ಟ್’ ತನ್ನ ಸುದೀರ್ಘ 25 ವರ್ಷಗಳ ಅರ್ಥಪೂರ್ಣ ಸೇವೆಯ ಸಂಭ್ರಮದಲ್ಲಿದೆ. ಈ ಬೆಳ್ಳಿ ಹಬ್ಬದ ಸಂಭ್ರಮವನ್ನು ಜನಮಾನಸದಲ್ಲಿ ಚಿರಸ್ಥಾಯಿಯಾಗಿಸಲು ಟ್ರಸ್ಟ್ ವತಿಯಿಂದ ಇದೇ ಮಾರ್ಚ್ 31ರಂದು ಶಿವಮೊಗ್ಗದ ಸುಪ್ರಸಿದ್ಧ ಕುವೆಂಪು ರಂಗಮಂದಿರದಲ್ಲಿ ದೃಶ್ಯ-ಶ್ರವ್ಯ ಕಾವ್ಯದ ರಸದೌತಣವನ್ನು ಏರ್ಪಡಿಸಲಾಗಿದೆ.
ಸಂಗೀತ ಲೋಕದ ಮಿಂಚು – ‘ಗಾನ ಸಂಜೆ’
ಕಾರ್ಯಕ್ರಮದ ಪ್ರಮುಖ ಆಕರ್ಷಣೆಯಾಗಿ ‘ಗಾನ ಸಂಜೆ’ ಅದ್ದೂರಿಯಾಗಿ ಮೂಡಿಬರಲಿದೆ. ಕಿರುತೆರೆಯ ಅತ್ಯಂತ ಜನಪ್ರಿಯ ಕಾರ್ಯಕ್ರಮ ‘ಸರಿಗಮಪ’ ವೇದಿಕೆಯ ಮೂಲಕ ಕರುನಾಡಿನ ಮನೆಮಾತಾಗಿರುವ ಗಾಯಕರು ಈ ಸಂಜೆಗೆ ಸಾಕ್ಷಿಯಾಗಲಿದ್ದಾರೆ.
ಭಾವಪೂರ್ಣ ಗಾಯನದ ಮೂಲಕ ಕನ್ನಡಿಗರ ಮನಗೆದ್ದಿರುವ ಕಾರ್ತಿಕ್ ನಾಗಲಪುರ ಹಾಗೂ ಸುಮಧುರ ಕಂಠದ ಗಾಯಕಿ ಸವಿಶ್ರೀ ಮತ್ತು ತಂಡದವರಿಂದ ಸುಶ್ರಾವ್ಯ ಗೀತೆಗಳ ಸ್ವರ ಮಾಧುರ್ಯ , ಹಳೆಯ ನೆನಪುಗಳ ಮೆಲುಕು ಹಾಕುವ ಗೀತೆಗಳ ಜೊತೆಗೆ ಇಂದಿನ ತಲೆಮಾರಿನ ಜನಪ್ರಿಯ ಹಾಡುಗಳು ಪ್ರೇಕ್ಷಕರನ್ನು ಮಂತ್ರಮುಗ್ಧರನ್ನಾಗಿಸಲಿವೆ.
ಕರಾವಳಿಯ ಯಕ್ಷಗಾನ ‘ಯಕ್ಷಗಾನ ನಾಟ್ಯ ವೈಭವ’
ಗಾಯನದ ಜೊತೆಜೊತೆಗೇ ಕರಾವಳಿಯ ಕಲೆ ‘ಯಕ್ಷಗಾನ’ದ ಭವ್ಯತೆಯೂ ಇಲ್ಲಿ ಮೇಳೈಸಲಿದೆ. ದಕ್ಷಿಣ ಕನ್ನಡದ ಪ್ರಸಿದ್ಧ ಭಾಗವತರಾದ ಶ್ರೀ ರಾಘವೇಂದ್ರ ಆಚಾರ್ಯ ಜನ್ಸಾಲೆ ಅವರ ಕಂಚಿನ ಕಂಠದಲ್ಲಿ ಯಕ್ಷಗಾನದ ಪದಗಳು ಮೊಳಗಲಿವೆ. ಅವರ ಸುಮಧುರ ಭಾಗವತಿಕೆಗೆ ಸಾಟಿಯಿಲ್ಲದ ನಾಟ್ಯ ವೈಭವ ಸೇರಿಕೊಳ್ಳುವುದರೊಂದಿಗೆ, ರಂಗಮಂದಿರದಲ್ಲಿ ಪುರಾಣ ಕಥೆಗಳ ಅದ್ಭುತ ಲೋಕವೇ ಅನಾವರಣಗೊಳ್ಳಲಿದೆ. ಇದು ಕೇವಲ ಪ್ರದರ್ಶನವಲ್ಲ, ಕಲೆ ಮತ್ತು ಭಕ್ತಿಯ ಒಂದು ಸಮ್ಮಿಲನವಾಗಲಿದೆ.
ಬೆಳ್ಳಿ ಹಬ್ಬದ ಸಂಭ್ರಮ
ದೀನಬಂಧು ಸೇವಾ ಟ್ರಸ್ಟ್ ತನ್ನ ಸ್ಥಾಪನೆಯಾದಾಗಿನಿಂದಲೂ ಸಾಮಾಜಿಕ ಕಳಕಳಿಯೊಂದಿಗೆ ಸಾಂಸ್ಕೃತಿಕ ಚಟುವಟಿಕೆಗಳಿಗೆ ಪ್ರೋತ್ಸಾಹ ನೀಡುತ್ತಾ ಬಂದಿದೆ. ಟ್ರಸ್ಟ್ನ ಅಧ್ಯಕ್ಷರಾದ ಶ್ರೀ ಎಂ. ರಮೇಶ್ ಶಂಕರಘಟ್ಟ ಅವರು ತಿಳಿಸಿರುವಂತೆ, “ಸಮಾಜ ಸೇವೆಯ ಹಾದಿಯಲ್ಲಿ 25 ವರ್ಷ ಪೂರೈಸಿದ ಈ ಖುಷಿಯನ್ನು ಶಿವಮೊಗ್ಗದ ಸಹೃದಯ ಕಲಾಭಿಮಾನಿಗಳೊಂದಿಗೆ ಹಂಚಿಕೊಳ್ಳುವುದು ನಮ್ಮ ಉದ್ದೇಶ”. ಈ ನಿಟ್ಟಿನಲ್ಲಿ ಗುಣಮಟ್ಟದ ಸಾಂಸ್ಕೃತಿಕ ಕಾರ್ಯಕ್ರಮವನ್ನು ಉಚಿತವಾಗಿ ಸವಿಯುವ ಅವಕಾಶವನ್ನು ಟ್ರಸ್ಟ್ ಕಲ್ಪಿಸಿಕೊಟ್ಟಿದೆ.
ಸಮಯ ಮತ್ತು ಆಹ್ವಾನ
ಮಾರ್ಚ್ 31ರ ಸಂಜೆ 4:00 ಗಂಟೆಗೆ ಸರಿಯಾಗಿ ಕಾರ್ಯಕ್ರಮಕ್ಕೆ ಚಾಲನೆ ಸಿಗಲಿದೆ. ಸಮಯದ ಪಾಲನೆಗೆ ಒತ್ತು ನೀಡಲಾಗಿದ್ದು, ಕಲಾಪ್ರೇಮಿಗಳು ಅತಿ ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸಿ ಈ ಅಪರೂಪದ ಕಲಾ ಸಮ್ಮಿಲನಕ್ಕೆ ಸಾಕ್ಷಿಯಾಗಬೇಕು ಎಂದು ಟ್ರಸ್ಟ್ ಮನವಿ ಮಾಡಿದೆ.
ದೈನಂದಿನ ಜಂಜಾಟಗಳ ನಡುವೆ ಮನಸ್ಸಿಗೆ ಮುದ ನೀಡಲು ಸಂಗೀತ ಮತ್ತು ಕಲೆಗಿಂತ ಮಿಗಿಲಾದ ಮದ್ದಿಲ್ಲ. ಶಿವಮೊಗ್ಗದ ಸಾಂಸ್ಕೃತಿಕ ಇತಿಹಾಸದಲ್ಲಿ ಈ ‘ಗಾನ ಸಂಜೆ ಮತ್ತು ಯಕ್ಷಗಾನ ನಾಟ್ಯ ವೈಭವ’ ಒಂದು ಸ್ಮರಣೀಯ ಪುಟವಾಗುವುದರಲ್ಲಿ ಸಂಶಯವಿಲ್ಲ. ಬನ್ನಿ, ಈ ಕಲಾ ಹಬ್ಬದಲ್ಲಿ ಭಾಗಿಯಾಗಿ ಕಲಾವಿದರನ್ನು ಪ್ರೋತ್ಸಾಹಿಸೋಣ.