ಸಾವು ಯಾರಿಗೂ ತಪ್ಪಿಸಲಾಗದ ನೈಸರ್ಗಿಕ ಪ್ರಕ್ರಿಯೆ. ಆದರೆ ಜಗತ್ತಿನ ಕೆಲವು ಪಟ್ಟಣಗಳು ಹಾಗೂ ಗ್ರಾಮಗಳ ಬಗ್ಗೆ ಕೇಳಿದರೆ, ಅಲ್ಲಿ ‘ಸಾಯುವುದೇ ನಿಷೇಧ’ ಎಂಬ ವಿಚಿತ್ರ ಆದೇಶಗಳು ಜಾರಿಯಾಗಿದ್ದವು ಎಂಬ ಮಾಹಿತಿ ಕುತೂಹಲ ಮೂಡಿಸುತ್ತದೆ. ಹಾಗಾದರೆ ನಿಜಕ್ಕೂ ಅಲ್ಲಿ ಸತ್ತರೆ ಕಾನೂನು ಕ್ರಮ ಕೈಗೊಳ್ಳಲಾಗುತ್ತದೆಯೇ? ಇದರ ಹಿಂದೆ ಅಲೌಕಿಕ ಕಾರಣಗಳಿಗಿಂತಲೂ ಪ್ರಾಯೋಗಿಕ ಸಮಸ್ಯೆಗಳೇ ಪ್ರಮುಖವಾಗಿವೆ.
ಫ್ರಾನ್ಸ್‌ನ ಲೆ ಲವಾಂಡೌ ಪಟ್ಟಣದಲ್ಲಿ 2000ರಲ್ಲಿ ‘ಸಾಯುವುದನ್ನು ನಿಷೇಧಿಸುವ’ ಆದೇಶ ಹೊರಡಿಸಲಾಗಿತ್ತು. ಇದಕ್ಕೆ ಮುಖ್ಯ ಕಾರಣ ಸ್ಥಳೀಯ ಸ್ಮಶಾನದಲ್ಲಿ ಜಾಗದ ಕೊರತೆ. ಹೊಸ ಸ್ಮಶಾನ ನಿರ್ಮಿಸಲು ಅಗತ್ಯ ಅನುಮತಿ ದೊರೆಯದ ಹಿನ್ನೆಲೆಯಲ್ಲಿ, ಅಂದಿನ ಮೇಯರ್ ಈ ರೀತಿಯ ವಿಚಿತ್ರ ಆದೇಶದ ಮೂಲಕ ಸಮಸ್ಯೆಯತ್ತ ಸರ್ಕಾರದ ಗಮನ ಸೆಳೆಯಲು ಪ್ರಯತ್ನಿಸಿದ್ದರು. ಇದು ಸಾವನ್ನು ತಡೆಯುವ ನೈಜ ಕಾನೂನಿಗಿಂತಲೂ ಆಡಳಿತಾತ್ಮಕ ಸಮಸ್ಯೆಯ ವಿರುದ್ಧದ ವಿಶಿಷ್ಟ ಪ್ರತಿಭಟನೆಯಾಗಿತ್ತು.
ಇದೇ ರೀತಿಯ ಘಟನೆ ಸ್ಪೇನ್‌ನ ಲಾಂಜರೋನ್ ಗ್ರಾಮದಲ್ಲೂ ನಡೆದಿದೆ. 1999ರಲ್ಲಿ ಸ್ಥಳೀಯ ಸ್ಮಶಾನದಲ್ಲಿ ಜಾಗದ ಕೊರತೆ ಉಂಟಾದಾಗ, ಅಂದಿನ ಮೇಯರ್ ಜೋಸೆ ರೂಬಿಯೊ ಅವರು ‘ಲಾಂಜರೋನ್‌ನಲ್ಲಿ ಸಾಯುವುದನ್ನು ನಿಷೇಧಿಸಲಾಗಿದೆ’ ಎಂಬ ಆದೇಶ ಹೊರಡಿಸಿದ್ದರು. ಇದರ ಉದ್ದೇಶವೂ ಜನರು ಸಾಯುವುದನ್ನು ಕಾನೂನಿನ ಮೂಲಕ ತಡೆಯುವುದಲ್ಲ; ಸ್ಮಶಾನ ನಿರ್ಮಾಣಕ್ಕೆ ಸಂಬಂಧಿಸಿದ ಸಮಸ್ಯೆಯನ್ನು ಸರ್ಕಾರದ ಗಮನಕ್ಕೆ ತರುವುದಾಗಿತ್ತು.
ಫ್ರಾನ್ಸ್‌ನ ಕ್ಯೂನ್ಯಾಕ್ ಮತ್ತು ಸರ್ಪೂರೆಂಕ್ಸ್ ಸೇರಿದಂತೆ ಕೆಲವು ಪ್ರದೇಶಗಳಲ್ಲಿಯೂ ಸ್ಮಶಾನಕ್ಕೆ ಜಾಗದ ಕೊರತೆ ಅಥವಾ ಸ್ಥಳೀಯ ಪರಿಸ್ಥಿತಿಗಳ ಹಿನ್ನೆಲೆಯಲ್ಲಿ ಇದೇ ರೀತಿಯ ‘ಸಾವು ನಿಷೇಧ’ ಘೋಷಣೆಗಳು ಸುದ್ದಿಯಾಗಿವೆ.
ಕೆಲವು ಪ್ರದೇಶಗಳಲ್ಲಿ ನೆಲ ಹೆಪ್ಪುಗಟ್ಟಿರುವುದರಿಂದ ಸಮಾಧಿ ಮಾಡುವುದು ಕಷ್ಟವಾಗುವುದು, ಇನ್ನೂ ಕೆಲವು ಕಡೆ ಸ್ಮಶಾನಗಳಲ್ಲಿ ಜಾಗದ ಕೊರತೆ ಎದುರಾಗುವುದು ಇಂತಹ ಆದೇಶಗಳಿಗೆ ಕಾರಣವಾಗಿತ್ತು. ಹೀಗಾಗಿ ‘ಇಲ್ಲಿ ಸಾಯುವುದೇ ನಿಷೇಧ’ ಎಂಬ ಹೇಳಿಕೆಯನ್ನು ಅಕ್ಷರಶಃ ಸಾವಿಗೆ ಕಾನೂನು ನಿಷೇಧವೆಂದು ಅರ್ಥೈಸಬಾರದು.
ವಾಸ್ತವವಾಗಿ, ಇಂತಹ ವಿಚಿತ್ರ ಆದೇಶಗಳು ಬಹುತೇಕ ಸಂದರ್ಭಗಳಲ್ಲಿ ಸ್ಮಶಾನಗಳ ಕೊರತೆ, ಆಡಳಿತಾತ್ಮಕ ಅಡೆತಡೆಗಳು ಅಥವಾ ಸ್ಥಳೀಯ ಸಮಸ್ಯೆಗಳತ್ತ ಸರ್ಕಾರದ ಗಮನ ಸೆಳೆಯಲು ಕೈಗೊಂಡ ಸಾಂಕೇತಿಕ ಕ್ರಮಗಳಾಗಿದ್ದವು. ಇದೇ ಕಾರಣಕ್ಕೆ ಈ ಘಟನೆಗಳು ಇಂದಿಗೂ ಕುತೂಹಲಕಾರಿ ಮಾಹಿತಿಯಾಗಿ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿವೆ.