ಎಣ್ಣೆ ಲೇಬಲಿಂಗ್‌ನಲ್ಲಿ ಗೋಲ್‌ಮಾಲ್ ಆರೋಪ: 1,240 ಕೆಜಿ ಖಾದ್ಯ ತೈಲ ಜಪ್ತಿ

0
10

ಮಂಗಳೂರು : ತಪ್ಪು ಬ್ರ್ಯಾಂಡಿಂಗ್ ಮತ್ತು ಲೇಬಲಿಂಗ್ ಮೂಲಕ ಗ್ರಾಹಕರನ್ನು ದಾರಿತಪ್ಪಿಸುವ ಆರೋಪದ ಹಿನ್ನೆಲೆಯಲ್ಲಿ ಬೈಕಂಪಾಡಿ ಕೈಗಾರಿಕಾ ಪ್ರದೇಶದಲ್ಲಿರುವ ಬೋಲಾಸ್ ಆಗ್ರೋ ಪ್ರೈವೇಟ್ ಲಿಮಿಟೆಡ್ ಸಂಸ್ಥೆಯ ಮೇಲೆ ಆಹಾರ ಸುರಕ್ಷತಾ ಅಧಿಕಾರಿಗಳು ಕ್ರಮ ಕೈಗೊಂಡಿದ್ದು, ಒಟ್ಟು 1,240 ಕೆಜಿ ಖಾದ್ಯ ಎಣ್ಣೆಯನ್ನು ವಶಪಡಿಸಿಕೊಂಡಿದ್ದಾರೆ.

ವಶಪಡಿಸಿಕೊಂಡ ಎಣ್ಣೆಯಲ್ಲಿ ಕಡಲೆಕಾಯಿ ಎಣ್ಣೆ ಮತ್ತು ತೆಂಗಿನ ಎಣ್ಣೆ ಸೇರಿವೆ. ಅಧಿಕಾರಿಗಳ ಮಾಹಿತಿಯ ಪ್ರಕಾರ, ತಲಾ 10 ಕೆಜಿ ತೂಕದ 11 ಬಾಕ್ಸ್ ಕಡಲೆಕಾಯಿ ಎಣ್ಣೆ, ತಲಾ 35 ಲೀಟರ್ ಸಾಮರ್ಥ್ಯದ 30 ಕ್ಯಾನ್ ಕಡಲೆಕಾಯಿ ಎಣ್ಣೆ ಹಾಗೂ ತಲಾ 20 ಕೆಜಿ ತೂಕದ ನಾಲ್ಕು ಬಾಕ್ಸ್ ತೆಂಗಿನ ಎಣ್ಣೆಯನ್ನು ವಶಪಡಿಸಿಕೊಳ್ಳಲಾಗಿದೆ.

ಸಂಸ್ಥೆಯ ಕಡಲೆಕಾಯಿ ಎಣ್ಣೆಯ ಮೂಲ ಮತ್ತು ಲೇಬಲಿಂಗ್ ಕುರಿತು ಅನುಮಾನ ವ್ಯಕ್ತವಾದ ಹಿನ್ನೆಲೆಯಲ್ಲಿ ಪರಿಶೀಲನೆ ನಡೆಸಲಾಗಿದೆ. ಚಿತ್ರದುರ್ಗ ಜಿಲ್ಲೆಯ ಚಳ್ಳಕೆರೆಯಿಂದ ಕಚ್ಚಾ ಕಡಲೆಕಾಯಿ ಎಣ್ಣೆಯನ್ನು ಖರೀದಿಸಿ ಬೈಕಂಪಾಡಿಗೆ ತರಲಾಗುತ್ತಿತ್ತು. ಬಳಿಕ ಅದನ್ನು ಮರುಪ್ಯಾಕ್ ಮಾಡಿ ‘ಕೋಲ್ಡ್ ಪ್ರೆಸ್ಡ್ ಕಡಲೆಕಾಯಿ ಎಣ್ಣೆ’ ಎಂದು ಲೇಬಲ್ ಮಾಡಲಾಗುತ್ತಿತ್ತು ಎಂಬ ಆರೋಪ ಕೇಳಿಬಂದಿದೆ.

ಕೋಲ್ಡ್ ಪ್ರೆಸ್ಡ್ ಎಣ್ಣೆ ಎಂಬ ಹೆಸರಿನಲ್ಲಿ ಉತ್ಪನ್ನವನ್ನು ಮಾರಾಟ ಮಾಡುವುದರಿಂದ ಅದರ ಸಂಸ್ಕರಣಾ ವಿಧಾನದ ಕುರಿತು ಗ್ರಾಹಕರಲ್ಲಿ ತಪ್ಪು ಅಭಿಪ್ರಾಯ ಮೂಡುವ ಸಾಧ್ಯತೆಯಿದೆ. ಉತ್ಪನ್ನದ ನೈಜ ಸ್ವರೂಪ ಮತ್ತು ಸಂಸ್ಕರಣಾ ವಿಧಾನದ ಬಗ್ಗೆ ಲೇಬಲ್‌ನಲ್ಲಿ ಸರಿಯಾದ ಮಾಹಿತಿ ನೀಡದಿರುವುದು ಆಹಾರ ಸುರಕ್ಷತಾ ನಿಯಮಗಳ ಉಲ್ಲಂಘನೆಯಾಗುವ ಸಾಧ್ಯತೆಯಿದೆ ಎಂದು ಅಧಿಕಾರಿಗಳು ಕ್ರಮ ಕೈಗೊಂಡಿದ್ದಾರೆ.

ಗ್ರಾಹಕರು ಆಹಾರ ಉತ್ಪನ್ನಗಳನ್ನು ಖರೀದಿಸುವಾಗ ಅವುಗಳ ಗುಣಮಟ್ಟ, ತಯಾರಿಕಾ ವಿಧಾನ ಮತ್ತು ಲೇಬಲ್‌ನಲ್ಲಿರುವ ಮಾಹಿತಿಯನ್ನು ನಂಬುತ್ತಾರೆ. ಹೀಗಾಗಿ ಉತ್ಪನ್ನದ ನೈಜ ಗುಣಲಕ್ಷಣಗಳಿಗೆ ಅನುಗುಣವಾಗಿ ಲೇಬಲಿಂಗ್ ಮಾಡುವುದು ಆಹಾರ ಉತ್ಪಾದನಾ ಸಂಸ್ಥೆಗಳ ಜವಾಬ್ದಾರಿಯಾಗಿದೆ.

ಈ ಪ್ರಕರಣದಲ್ಲಿ ಒಟ್ಟು 1,240 ಕೆಜಿ ಖಾದ್ಯ ಎಣ್ಣೆಯನ್ನು ವಶಕ್ಕೆ ಪಡೆಯಲಾಗಿದ್ದು, ಮುಂದಿನ ಕಾನೂನು ಕ್ರಮಗಳ ಕುರಿತು ಹೆಚ್ಚಿನ ಮಾಹಿತಿ ಲಭ್ಯವಾಗಬೇಕಿದೆ.