ನವದೆಹಲಿ : ವಿಶ್ವದಾದ್ಯಂತ ಕೊರೊನಾ ಹಾವಳಿ ತಗ್ಗಿದೆ ಎನ್ನುವಾಗಲೇ, ವಿಜ್ಞಾನಿಗಳು ಹೊಸ ರೂಪಾಂತರಿಯೊಂದನ್ನು ಪತ್ತೆಹಚ್ಚಿದ್ದು, ಇದು ಆತಂಕಕ್ಕೆ ಕಾರಣವಾಗಿದೆ. BA.3.2 ಎಂಬ ತಾಂತ್ರಿಕ ಹೆಸರಿನ ಈ ರೂಪಾಂತರಿಗೆ ‘ಸಿಕಾಡಾ’ (Cicada) ಎಂದು ಅಡ್ಡ ಹೆಸರಿಡಲಾಗಿದ್ದು, ಈಗಾಗಲೇ ಅಮೆರಿಕ ಸೇರಿದಂತೆ 22ಕ್ಕೂ ಹೆಚ್ಚು ದೇಶಗಳಲ್ಲಿ ಇದು ಹರಡಿದೆ.
ಸಿಕಾಡಾ’ ಎಂಬುದು ಒಂದು ಜಾತಿಯ ಕೀಟದ ಹೆಸರು. ಈ ಕೀಟಗಳು ದೀರ್ಘಕಾಲ ಭೂಮಿಯ ಅಡಿಯಲ್ಲಿ ಅಡಗಿದ್ದು, ದಿಢೀರನೆ ದೊಡ್ಡ ಸಂಖ್ಯೆಯಲ್ಲಿ ಹೊರಬರುತ್ತವೆ. ಅದೇ ರೀತಿ ಈ ವೈರಸ್ ಕೂಡ ಬಹಳ ದಿನಗಳ ಕಾಲ ಪತ್ತೆಯಾಗದೆಯೇ ಇದ್ದು, ಈಗ ಏಕಾಏಕಿ ಹರಡುತ್ತಿರುವುದರಿಂದ ಸಂಶೋಧಕರು ಈ ಹೆಸರಿಟ್ಟಿದ್ದಾರೆ.
ಈ ರೂಪಾಂತರಿಯು ತನ್ನ ಸ್ಪೈಕ್ ಪ್ರೋಟೀನ್ನಲ್ಲಿ ಸುಮಾರು 70 ರಿಂದ 75 ಬದಲಾವಣೆಗಳನ್ನು (Mutations) ಹೊಂದಿದೆ. ಇದು ಹಿಂದಿನ ಒಮಿಕ್ರಾನ್ ತಳಿಗಳಿಗಿಂತಲೂ ಎರಡು ಪಟ್ಟು ಹೆಚ್ಚು.
ಪ್ರತಿರೋಧಕ ಶಕ್ತಿ ತಪ್ಪಿಸುವ ಶಕ್ತಿ : ತನ್ನಲ್ಲಿರುವ ಅತಿ ಹೆಚ್ಚು ರೂಪಾಂತರಗಳಿಂದಾಗಿ, ಈ ವೈರಸ್ ಲಸಿಕೆ ಅಥವಾ ಹಿಂದಿನ ಸೋಂಕಿನಿಂದ ಬಂದಿರುವ ರೋಗನಿರೋಧಕ ಶಕ್ತಿಯನ್ನು (Immunity) ಸುಲಭವಾಗಿ ತಪ್ಪಿಸಿ ದಾಳಿ ಮಾಡುವ ಸಾಮರ್ಥ್ಯ ಹೊಂದಿದೆ.
ಸದ್ಯಕ್ಕೆ ಸಿಕ್ಕಿರುವ ಮಾಹಿತಿಯ ಪ್ರಕಾರ, ಇದು ವೇಗವಾಗಿ ಹರಡುತ್ತದೆಯಾದರೂ, ಸೋಂಕಿನ ತೀವ್ರತೆಯು ಹಿಂದಿನ ತಳಿಗಳಿಗಿಂತ ಹೆಚ್ಚಿದೆ ಎಂಬುದಕ್ಕೆ ಯಾವುದೇ ಪುರಾವೆಗಳಿಲ್ಲ. ಅಂದರೆ, ಇದು ಮಾರಣಾಂತಿಕವಾಗಿರುವ ಸಾಧ್ಯತೆ ಕಡಿಮೆ ಎಂದು ತಜ್ಞರು ಅಂದಾಜಿಸಿದ್ದಾರೆ.
ಸಿಕಾಡಾ ರೂಪಾಂತರಿಯ ಲಕ್ಷಣಗಳು ಬಹುತೇಕ ಒಮಿಕ್ರಾನ್ ತಳಿಯನ್ನೇ ಹೋಲುತ್ತವೆ :
ತೀವ್ರ ಗಂಟಲು ನೋವು : ಸೋಂಕಿತರಲ್ಲಿ ಕಂಡುಬರುವ ಪ್ರಮುಖ ಮತ್ತು ಆರಂಭಿಕ ಲಕ್ಷಣ.
ಜ್ವರ ಮತ್ತು ಚಳಿ : ಮೈಕೈ ನೋವಿನೊಂದಿಗೆ ಜ್ವರ ಕಾಣಿಸಿಕೊಳ್ಳುವುದು.
ತೀವ್ರ ಸುಸ್ತು (Fatigue) : ದೇಹವು ಅತಿಯಾದ ಆಯಾಸಕ್ಕೆ ಒಳಗಾಗುವುದು.
ಕೆಮ್ಮು ಮತ್ತು ಶೀತ : ನಿರಂತರ ಕೆಮ್ಮು ಮತ್ತು ಮೂಗು ಸೋರುವಿಕೆ.
ಜೀರ್ಣಕ್ರಿಯೆ ಸಮಸ್ಯೆ : ಕೆಲವು ರೋಗಿಗಳಲ್ಲಿ ವಾಂತಿ ಅಥವಾ ಭೇದಿಯ ಲಕ್ಷಣಗಳೂ ಕಂಡುಬರುತ್ತಿವೆ.
ಉಸಿರಾಟದ ತೊಂದರೆ : ಅಪರೂಪದ ಸಂದರ್ಭಗಳಲ್ಲಿ ಉಸಿರಾಟದಲ್ಲಿ ವ್ಯತ್ಯಯ ಉಂಟಾಗಬಹುದು.