-ಮಂದಾರ ರಾಜೇಶ್ ಭಟ್
ಜಗದ್ಗುರುಗಳ ಆಶೀರ್ವಾದದೊಂದಿಗೆ ಭಕ್ತಿಪೂರ್ವಕ ಚಾಲನೆ
ಅಜ್ಞಾನದ ಕತ್ತಲನ್ನು ಓಡಿಸಿ ಜ್ಞಾನದ ಜ್ಯೋತಿಯನ್ನು ಬೆಳಗಿದ ಜಗದ್ಗುರು ಶ್ರೀ ಆದಿ ಶಂಕರಾಚಾರ್ಯರ ಜಯಂತಿ ಮಹೋತ್ಸವವು ಮಂಗಳೂರಿನಲ್ಲಿ ಅತ್ಯಂತ ಶ್ರದ್ಧಾಭಕ್ತಿಗಳಿಂದ ಆಯೋಜಿತವಾಗಿದೆ.
ದಕ್ಷಿಣಾಮ್ನಾಯ ಶ್ರೀ ಶಾರದಾ ಪೀಠ ಶೃಂಗೇರಿಯ ಜಗದ್ಗುರುಗಳಾದ ಶ್ರೀ ಶ್ರೀ ಭಾರತೀ ತೀರ್ಥ ಮಹಾಸನ್ನಿಧಾನಂಗಳವರ ಹಾಗೂ ಶ್ರೀ ಶ್ರೀ ವಿಧುಶೇಖರ ಭಾರತೀ ಸನ್ನಿಧಾನಂಗಳವರ ದಿವ್ಯ ಕೃಪಾಶೀರ್ವಾದಗಳೊಂದಿಗೆ ಈ ಕಾರ್ಯಕ್ರಮವು ನೆರವೇರುತ್ತಿದೆ.
ಲೋಕಗುರು ಶಂಕರರ ತತ್ವಗಳು ಕೇವಲ ಇತಿಹಾಸವಲ್ಲ, ಅವು ಇಂದಿನ ಅಸ್ತವ್ಯಸ್ತ ಜೀವನಕ್ಕೆ ಶಾಂತಿಯ ಮಾರ್ಗ ತೋರುವ ದಿವ್ಯ ಮಂತ್ರಗಳಾಗಿವೆ. ಅಂತಹ ಮಹಾನ್ ಚೇತನಕ್ಕೆ ಸಂಗೀತ ಮತ್ತು ಸ್ತೋತ್ರಗಳ ಮೂಲಕ ಭಕ್ತಿ ಅರ್ಪಿಸುವ ಅಪೂರ್ವ ಸುಸಂದರ್ಭ ಇದು.
ಸಹಯೋಗ ಮತ್ತು ಸ್ತೋತ್ರ
ರತ್ನಗಳ ನಾದಲಹರಿ
ಅಖಿಲ ಕರ್ನಾಟಕ ಬ್ರಾಹ್ಮಣ ಮಹಾಸಭಾ (ದ.ಕ.) ಹಾಗೂ ಭರತಾಂಜಲಿ (ರಿ.) ಕೋಟ್ಟಾರ ಇವರ ಸಂಯುಕ್ತ ಆಶ್ರಯದಲ್ಲಿ ಮತ್ತು ಕನ್ನಡ ಹಾಗೂ ಸಂಸ್ಕೃತಿ ಇಲಾಖೆ, ಬೆಂಗಳೂರು ಇದರ ವಿಶೇಷ ಸಹಯೋಗದೊಂದಿಗೆ, ಮಂಗಳೂರಿನ ಕರಂಗಲ್ಪಾಡಿ ಶ್ರೀ ಸುಬ್ರಹ್ಮಣ್ಯ ಸಭಾದಲ್ಲಿ ಶನಿವಾರ ಸಂಜೆ ಗಂಟೆ 4.15ಕ್ಕೆ ಈ ಪುಣ್ಯ ಕಾರ್ಯಕ್ರಮಕ್ಕೆ ಚಾಲನೆ ದೊರೆಯಲಿದೆ.
ಅಖಿಲ ಕರ್ನಾಟಕ ಬ್ರಾಹ್ಮಣ ಮಹಾಸಭಾದ ಉಪಾಧ್ಯಕ್ಷರಾದ ಶ್ರೀ ಮಹೇಶ್ ಕಜೆ ಅವರು ದೀಪ ಪ್ರಜ್ವಲಿಸಿ ಕಾರ್ಯಕ್ರಮ ಉದ್ಘಾಟಿಸಲಿದ್ದು, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಸಹಾಯಕ ನಿರ್ದೇಶಕರಾದ ಶ್ರೀ ರಾಜೇಶ್ ಜಿ. ಹಾಗೂ ಇತರ ಗಣ್ಯರು ಸಾಕ್ಷಿಯಾಗಲಿದ್ದಾರೆ.
ಕಾರ್ಯಕ್ರಮದ ವಿಶೇಷ ಆಕರ್ಷಣೆಯಾಗಿ ‘ಶಂಕರಸ್ತೋತ್ರ ರತ್ನ ಸಮರ್ಪಣಂ’ ಎಂಬ ವಿನೂತನ ಸ್ತೋತ್ರ ಸಮರ್ಪಣ ಕಾರ್ಯಕ್ರಮ ಜರುಗಲಿದೆ.
ವಿದುಷಿ ವಂದನಾ ರಾಣಿ, ವಿದುಷಿ ಮಧುರ ಕಾರಂತ್ ಮತ್ತು ವಿದುಷಿ ರಮ್ಯ ಮಂಗಳಲಕ್ಷ್ಮಿ ಅವರ ಕಂಠಸಿರಿಯಲ್ಲಿ ಶಂಕರರ ಸ್ತೋತ್ರಗಳು ನಾದಸುಧೆಯಾಗಿ ಹರಿಯಲಿವೆ. ಇವರಿಗೆ ವಿದ್ವಾನ್ ಮನೋಹರ್ ರಾವ್ (ಮೃದಂಗ) ಹಾಗೂ ವಿದುಷಿ ಧನಶ್ರೀ ಶಬರಾಯ (ವಯೋಲಿನ್) ಅವರು ಪಕ್ಕವಾದ್ಯದ ಸಹಕಾರ ನೀಡಲಿದ್ದಾರೆ.
ಶಂಕರರ ಆದರ್ಶದ ಹಾದಿಯಲ್ಲಿ
ಜಗದ್ಗುರು ಆದಿ ಶಂಕರಾಚಾರ್ಯರು ಸಂದೇಶದಂತೆ ಈ ಜಗತ್ತಿನಲ್ಲಿ ಶಾಶ್ವತವಾದ ಸತ್ಯದ ದರ್ಶನ ಆಗಬೇಕಿದೆ
ಭಜಗೋವಿಂದಂನಂತಹ ಸರಳ ಸ್ತೋತ್ರಗಳಿಂದ ಹಿಡಿದು ಗಹನವಾದ ಭಾಷ್ಯಗಳವರೆಗೆ ಅವರು ನೀಡಿದ ಜ್ಞಾನದ ಕೊಡುಗೆ ಸನಾತನ ಧರ್ಮದ ಗಟ್ಟಿ ಅಡಿಪಾಯವಾಗಿದೆ.
ಶೃಂಗೇರಿ ಪೀಠದ ಪರಂಪರೆಯು ಅಂದಿನಿಂದ ಇಂದಿನವರೆಗೂ ಆ ಜ್ಞಾನದೀಪವನ್ನು ಆರದಂತೆ ಕಾಯ್ದುಕೊಂಡು ಬಂದಿದೆ. ನಮ್ಮ ಸಂಸ್ಕೃತಿಯನ್ನು ಉಳಿಸಿ ಬೆಳೆಸುವ ಈ ಕಾರ್ಯಕ್ರಮದಲ್ಲಿ ಇಲಾಖೆಯ ಸಹಯೋಗವು ಶ್ಲಾಘನೀಯ.
ಶಂಕರರ ಜಯಂತಿಯ ಈ ಸಂದರ್ಭದಲ್ಲಿ ಅವರ ಆದರ್ಶಗಳನ್ನು ನೆನೆಯುತ್ತಾ, ಧರ್ಮದ ಹಾದಿಯಲ್ಲಿ ಸಾಗುವ ಸಂಕಲ್ಪ ಮಾಡೋಣ. ಈ ಆಧ್ಯಾತ್ಮಿಕ ಕಾರ್ಯಕ್ರಮಕ್ಕೆ ಸಮಸ್ತ ಧರ್ಮಪ್ರೇಮಿ ಭಕ್ತ ಬಂಧುಗಳಿಗೆ ಆದರದ ಸ್ವಾಗತ.