ಮೂಡುಬಿದಿರೆಯ ಪ್ರೇರಣಾ ಶಾಲೆಯಲ್ಲಿ ಸುಪ್ರಸಿದ್ಧ ಭಾಗವತರಾದ ಶ್ರೀ ಪಟ್ಲ ಸತೀಶ್ ಶೆಟ್ಟರ ನೇತೃತ್ವದ ಯಕ್ಷಧ್ರುವ ಪಟ್ಲ ಫೌಂಡೇಶನ್ ( ರಿ ) ಮಂಗಳೂರು – ಇವರ ಮಹತ್ವಾಕಾಂಕ್ಷೆಯ ಯೋಜನೆಯಾದ
” ಯಕ್ಷಧ್ರುವ – ಯಕ್ಷ ಶಿಕ್ಷಣ ” ದ ಉದ್ಘಾಟನೆಯು ಇಂದು ನೆರವೇರಿತು . ( 14.07.2025 ) . ಉದ್ಯಮಿ ಹಾಗೂ ಯಕ್ಷಧ್ರುವ ಪಟ್ಲ ಫೌಂಡೇಶನ್ ನ ಕೇಂದ್ರೀಯ ಸಮಿತಿಯ ಟ್ರಸ್ಟಿಗಳಾದ ಶ್ರೀ ಪ್ರೇಮನಾಥ ಮಾರ್ಲರು ದೀಪ ಪ್ರಜ್ವಲನ ಮಾಡುವ ಮೂಲಕ ” ಯಕ್ಷ – ಶಿಕ್ಷಣ ” ಕ್ಕೆ ಚಾಲನೆ ನೀಡಿದರು . ಸೇವಾಂಜಲಿ ಎಜುಕೇಷನಲ್ ಟ್ರಸ್ಟ್ ಪ್ರವರ್ತಿತ ಪ್ರೇರಣಾ ಶಾಲೆಯ ಸಂಚಾಲಕರಾದ ಶ್ರೀ ಎಂ.ಶಾಂತರಾಮ ಕುಡ್ವರ ಸಭಾಧ್ಯಕ್ಷತೆಯಲ್ಲಿ ಯಕ್ಷಧ್ರುವ ಪಟ್ಲ ಫೌಂಡೇಶನ್ ನ ಮೂಡುಬಿದಿರೆ ಘಟಕದ ಅಧ್ಯಕ್ಷರಾದ ಶ್ರೀ ದಿವಾಕರ ಶೆಟ್ಟಿ , ಖಂಡಿಗ , ಸಂಚಾಲಕರಾದ ಶ್ರೀ ಮನೋಜ್ ಶೆಟ್ಟಿ , ಶ್ರೀ ರವಿಪ್ರಸಾದ್ ಶೆಟ್ಟಿ , ಪ್ರಧಾನ ಕಾರ್ಯದರ್ಶಿಗಳಾದ ಶ್ರೀ ಅರುಣ ಕುಮಾರ್ ಅಭ್ಯಾಗತರಾಗಿ ಕಾರ್ಯಕ್ರಮದಲ್ಲಿ ಭಾಗವಹಿಸಿದರು . ಸೇವಾಂಜಲಿ ಎಜುಕೇಷನಲ್ ಟ್ರಸ್ಟ್ ನ ಅಧ್ಯಕ್ಷರಾದ ರಾಜೇಶ್ ಬಂಗೇರರು ಉಪಸ್ಥಿತರಿದ್ದು ಶುಭ ಹಾರೈಸಿದರು .
ಪ್ರಾಸ್ತಾವಿಕವಾಗಿ ಮಾತನಾಡಿದ ರವಿಪ್ರಸಾದ್ ಶೆಟ್ಟರು ” ಕರಾವಳಿಯ ಮಣ್ಣಿನ ಕಲೆಯಾದ ಯಕ್ಷಗಾನದ ಬಗ್ಗೆ ಅತೀವವಾದ ಕಾಳಜಿಯುಳ್ಳವರಾದ ಶ್ರೀ ಪಟ್ಲ ಸತೀಶ ಶೆಟ್ಟರು , ವಿದ್ಯಾರ್ಥಿಗಳಲ್ಲಿ ಯಕ್ಷಗಾನದ ಅಭಿರುಚಿ ಮೂಡಿಸಲು ಶಾಲೆಗಳಲ್ಲಿ ಉಚಿತ ಯಕ್ಷಗಾನ ತರಬೇತಿ ನೀಡುವ ಅಭಿಯಾನ ಕೈಗೊಂಡಿರುವುದು ಸ್ತುತ್ಯಾರ್ಹ . ಕಲಾವಿದರ ಪಾಲಿನ ಕಾಮಧೇನು ಎನಿಸಿದ ಪಟ್ಲ ಭಾಗವತರ ಈ ಹೊಸ ಪರಿಕಲ್ಪನೆ ಹಲವಾರು ವಿದ್ಯಾರ್ಥಿಗಳಿಗೆ ವರದಾನವಾಗಿದೆ ” ಎಂದರು .
ಅಧ್ಯಕ್ಷೀಯ ನೆಲೆಯಲ್ಲಿ ಮಾತನಾಡಿದ ಎಂ.ಶಾಂತರಾಮ ಕುಡ್ವರು , ” ಯಾವುದೇ ಕಲೆ , ಸಂಸ್ಕೃತಿ , ಕ್ರೀಡೆಗಳು ಅಳಿಯದೇ , ಉಳಿಯಬೇಕಾದರೆ ಯುವಜನರ , ವಿದ್ಯಾರ್ಥಿಗಳ ತೊಡಗಿಸುವಿಕೆ ಮುಖ್ಯ . ಈ ನಿಟ್ಟಿನಲ್ಲಿ , ಯಕ್ಷಗಾನವನ್ನು ಮುಂದಿನ ಪೀಳಿಗೆಗೆ ಕೊಂಡು ಹೋಗಲು , ವಿದ್ಯಾರ್ಥಿಗಳಿಗೆ ಶಾಲೆಗಳಲ್ಲಿ ಉಚಿತ
” ಯಕ್ಷ ಶಿಕ್ಷಣ ” ದ ವ್ಯವಸ್ಥೆ ಮಾಡುವ ಮೂಲಕ ಪಟ್ಲ ಫೌಂಡೇಶನ್ ಮುಂಚೂಣಿಯಲ್ಲಿದ್ದು ಮಾದರಿಯಾಗಿ ನಿಲ್ಲತ್ತದೆ . ಪಟ್ಲ ಫೌಂಡೇಶನ್ ಕಲಾವಿದರ ಬಗ್ಗೆ ಮಾತ್ರವಲ್ಲದೇ ಯಕ್ಷಗಾನದ ಭವಿಷ್ಯದ ಬಗ್ಗೆಯೂ ಗಮನ ಹರಿಸಿರುವುದು ಉತ್ತಮ ಬೆಳವಣಿಗೆ ” ಎಂದರು .
ಯಕ್ಷ ಗುರುಗಳಾದ ಶ್ರೀ ಅಕ್ಷಯ ಭಟ್ ರವರು ವಿದ್ಯಾರ್ಥಿಗಳಿಗೆ ಯಕ್ಷ ಶಿಕ್ಷಣದ ಕುರಿತಾಗಿ ಮಾಹಿತಿ ಹಾಗೂ ಅದರಿಂದ ಲಭ್ಯವಾಗುವ ಅನುಕೂಲತೆಯ ಬಗ್ಗೆ ತಿಳಿಸುತ್ತಾ , ಯಕ್ಷಧ್ರುವ ಪಟ್ಲ ಫೌಂಡೇಶನ್ ಯಕ್ಷ ಶಿಕ್ಷಣವನ್ನು ಉಚಿತವಾಗಿ ನೀಡುತ್ತಿದ್ದು , ವಿದ್ಯಾರ್ಥಿಗಳು ಆಸಕ್ತಿಯಿಂದ ಕಲಿತರೆ ,ಅವರಿಗೆ ಫೌಂಡೇಶನ್ ವತಿಯಿಂದ , ತಮ್ಮ ಪ್ರತಿಭಾ ಪ್ರದರ್ಶನಕ್ಕೆ ವೇದಿಕೆಯೂ ದೊರಕುತ್ತದೆ ” ಎಂದರು . ಶ್ರೀಮತಿ ಶಶಿಕಲಾ ಮಾತಾಜಿ ಕಾರ್ಯಕ್ರಮ ನಿರೂಪಿಸಿದರು . ಮುಖ್ಯ ಮಾತಾಜಿ ವತ್ಸಲಾ ರಾಜೇಶ್ ಸ್ವಾಗತಿಸಿದರು . ಸುರೇಂದ್ರ ಶ್ರೀಮಾನ್ ರವರು ಧನ್ಯವಾದ ಅರ್ಪಿಸಿದರು .ಸೇವಾಂಜಲಿಯ ಅಧ್ಯಕ್ಷರಾದ ರಾಜೇಶ್ ಬಂಗೇರರು ಸ್ಮರಣಿಕೆ ನೀಡಿದರು . ಸೇವಾಂಜಲಿಯ ಕೋಶಾಧಿಕಾರಿಎಸ್‌.ಎನ್.ಬೋರ್ಕರ್ , ಉಪಾಧ್ಯಕ್ಷ ಸೋಮನಾಥ ಕೋಟ್ಯಾನ್ , ಸದಸ್ಯರಾದ ಮಂಜುನಾಥ ಶೆಟ್ಟಿ , ಆನಂದ ಕಾರ್ಲರು ಹಾಗೂ ಯಕ್ಷಧ್ರುವ ಫೌಂಡೇಶನ್ ನ ಸದಸ್ಯರಾದ ಸಚಿನ್ ಮತ್ತು ಧನಂಜಯ ಉಪಸ್ಥಿತರಿದ್ದರು .