ಬ್ಯಾಂಕ್ ಆಫ್ ಬರೋಡಾ ಮತ್ತು ಮಿಜುಹೋ ಬ್ಯಾಂಕ್ ನಡುವೆ ಕಾರ್ಯತಂತ್ರದ ಸಹಭಾಗಿತ್ವ

ವಿಲೀನ ಮತ್ತು ಸ್ವಾಧೀನ (M&A) ಹಣಕಾಸು ಹಾಗೂ ಕಾರ್ಪೊರೇಟ್ ಬ್ಯಾಂಕಿಂಗ್ ಪರಿಹಾರಗಳಲ್ಲಿ ಸಹಯೋಗವನ್ನು ವೃದ್ಧಿಸಲು ಮಹತ್ವದ ಹೆಜ್ಜೆ

ಮಂಗಳೂರು : ವಿಶ್ವದ ಅತಿದೊಡ್ಡ ಸಮಗ್ರ ಹಣಕಾಸು ಸೇವಾ ಸಂಸ್ಥೆಗಳಲ್ಲಿ ಒಂದಾದ ಮಿಜುಹೋ ಫೈನಾನ್ಷಿಯಲ್ ಗ್ರೂಪ್, ಇಂಕ್. (NYSE: MFG) ನ ಬ್ಯಾಂಕಿಂಗ್ ಅಂಗಸಂಸ್ಥೆಯಾದ ಮಿಜುಹೋ ಬ್ಯಾಂಕ್ ಲಿಮಿಟೆಡ್ (Mizuho Bank Ltd.) ಹಾಗೂ ಭಾರತದ ಅಂತರರಾಷ್ಟ್ರೀಯ ಬ್ಯಾಂಕ್ ಬ್ಯಾಂಕ್ ಆಫ್ ಬರೋಡಾ ವಿಲೀನ ಮತ್ತು ಸ್ವಾಧೀನ (Mergers & Acquisitions – M&A) ಹಣಕಾಸು, ಸಂರಚಿತ ಸಾಲ (Structured Lending), ಗಡಿ-ದಾಟಿ ಹಣಕಾಸು ಪರಿಹಾರಗಳು ಹಾಗೂ ಕಾರ್ಪೊರೇಟ್ ಮತ್ತು ಹೂಡಿಕೆ ಬ್ಯಾಂಕಿಂಗ್ ಕ್ಷೇತ್ರಗಳಲ್ಲಿ ಸಹಯೋಗವನ್ನು ಮತ್ತಷ್ಟು ಬಲಪಡಿಸುವ ಉದ್ದೇಶದಿಂದ ಕಾರ್ಯತಂತ್ರದ ಸಹಭಾಗಿತ್ವವನ್ನು ಘೋಷಿಸಿವೆ.

ಈ ಸಹಭಾಗಿತ್ವವು ಮಿಜುಹೋ ಬ್ಯಾಂಕ್‌ನ ವ್ಯಾಪಕ ಜಾಗತಿಕ ಜಾಲ, ಗಡಿ-ದಾಟಿ ವ್ಯವಹಾರ ನಿರ್ವಹಣಾ ಸಾಮರ್ಥ್ಯ ಹಾಗೂ ಸಂರಚಿತ ಹಣಕಾಸಿನಲ್ಲಿನ ಪರಿಣತಿಯನ್ನು, ಬ್ಯಾಂಕ್ ಆಫ್ ಬರೋಡಾದ ಬಲಿಷ್ಠ ದೇಶೀಯ ನೆಲೆ, ಕಾರ್ಪೊರೇಟ್ ಗ್ರಾಹಕರೊಂದಿಗಿನ ಗಾಢ ಸಂಬಂಧಗಳು ಹಾಗೂ ಭಾರತೀಯ ಮಾರುಕಟ್ಟೆಯ ಸಮಗ್ರ ಅರಿವಿನೊಂದಿಗೆ ಸಂಯೋಜಿಸುತ್ತದೆ.

ಸಹಭಾಗಿತ್ವದ ಪ್ರಮುಖ ಕ್ಷೇತ್ರಗಳು

ಈ ಸಹಭಾಗಿತ್ವದಡಿ ಮಿಜುಹೋ ಬ್ಯಾಂಕ್ ಹಾಗೂ ಬ್ಯಾಂಕ್ ಆಫ್ ಬರೋಡಾ ಈ ಕೆಳಕಂಡ ಕ್ಷೇತ್ರಗಳಲ್ಲಿ ಪರಸ್ಪರ ಸಹಕರಿಸಲಿವೆ:

ಸ್ವಾಧೀನ ಹಣಕಾಸು (Acquisition Finance) – ಜಂಟಿ ವ್ಯವಹಾರ ಅಭಿವೃದ್ಧಿ, ವ್ಯವಹಾರ ರಚನೆ (Structuring), ಸಹ-ಅಂಡರ್‌ರೈಟಿಂಗ್ ಹಾಗೂ ಸಿಂಡಿಕೇಶನ್.

ಆಯ್ದ ವಿಲೀನ ಮತ್ತು ಸ್ವಾಧೀನ (M&A) ವ್ಯವಹಾರಗಳಿಗೆ ಸಲಹಾ ಸೇವೆಗಳು.

ಉಪ-ಭಾಗವಹಿಸುವಿಕೆ (Sub-participation) ಹಾಗೂ ದ್ವಿತೀಯ ಅಪಾಯ ವಿತರಣೆ (Secondary Risk Distribution)ಗಾಗಿ ಆದ್ಯತಾ ಪಾಲುದಾರ ವ್ಯವಸ್ಥೆ.

ವಿದೇಶಿ ವಿನಿಮಯ, ಬಡ್ಡಿದರ ಅಪಾಯ ನಿರ್ವಹಣೆ (Interest Rate Hedging), ಎಸ್ಕ್ರೋ (Escrow) ಸೇವೆಗಳು ಸೇರಿದಂತೆ ಪೂರಕ ಬ್ಯಾಂಕಿಂಗ್ ಸೇವೆಗಳಲ್ಲಿ ಸಹಕಾರ.

ಸ್ವಾಧೀನ ಹಣಕಾಸಿನ ಅಂಡರ್‌ರೈಟಿಂಗ್, ವ್ಯವಹಾರ ರಚನೆ ಹಾಗೂ ಅಂತರ-ಸಾಲದಾತರ ವ್ಯವಸ್ಥೆಗಳ (Inter-creditor Arrangements) ಉತ್ತಮ ಕಾರ್ಯಪದ್ಧತಿಗಳ ವಿನಿಮಯದ ಮೂಲಕ ಸಾಮರ್ಥ್ಯ ವೃದ್ಧಿ.

ಬ್ಯಾಂಕ್ ಆಫ್ ಬರೋಡಾದ ಕಾರ್ಯನಿರ್ವಾಹಕ ನಿರ್ದೇಶಕರಾದ ಲಲಿತ್ ತ್ಯಾಗಿ ಅವರು ಮಾತನಾಡಿ, “ಭಾರತದಲ್ಲಿ ವಿವಿಧ ಕ್ಷೇತ್ರಗಳಲ್ಲಿ ಪ್ರಮಾಣದ ವೃದ್ಧಿ, ಸ್ಪರ್ಧಾತ್ಮಕತೆ, ಇಂಧನ ಪರಿವರ್ತನೆ, ಡಿಜಿಟಲ್ ರೂಪಾಂತರ ಹಾಗೂ ಮೂಲಸೌಕರ್ಯ ಆಧಾರಿತ ಅಭಿವೃದ್ಧಿಯ ಪರಿಣಾಮವಾಗಿ ದೇಶೀಯ ಏಕೀಕರಣದ ಬಲವಾದ ಅಲೆ ಕಂಡುಬರುತ್ತಿದೆ. ಕಾರ್ಪೊರೇಟ್ ಸಂಸ್ಥೆಗಳು ತಮ್ಮ ಮಾರುಕಟ್ಟೆ ಸ್ಥಾನವನ್ನು ಮತ್ತಷ್ಟು ಬಲಪಡಿಸಲು ವಿಲೀನ, ಸ್ವಾಧೀನ ಮತ್ತು ಕಾರ್ಯತಂತ್ರದ ಹೂಡಿಕೆಗಳಿಗೆ ಹೆಚ್ಚಿನ ಆದ್ಯತೆ ನೀಡುತ್ತಿರುವ ಹಿನ್ನೆಲೆಯಲ್ಲಿ, ಅತ್ಯಾಧುನಿಕ ಹಣಕಾಸು ಹಾಗೂ ಸಲಹಾ ಪರಿಹಾರಗಳ ಅಗತ್ಯವೂ ಹೆಚ್ಚುತ್ತಿದೆ. ಮಿಜುಹೋ ಬ್ಯಾಂಕ್‌ನೊಂದಿಗಿನ ಈ ಸಹಭಾಗಿತ್ವದ ಮೂಲಕ ಬ್ಯಾಂಕ್ ಆಫ್ ಬರೋಡಾದ ಕಾರ್ಪೊರೇಟ್ ಗ್ರಾಹಕರೊಂದಿಗಿನ ಗಾಢ ಸಂಬಂಧಗಳು ಹಾಗೂ ಮಾರುಕಟ್ಟೆ ಒಳನೋಟಗಳನ್ನು, ಮಿಜುಹೋ ಬ್ಯಾಂಕ್‌ನ ಜಾಗತಿಕ ಪರಿಣತಿ ಮತ್ತು ಕ್ಷೇತ್ರವಾರು ಜ್ಞಾನದೊಂದಿಗೆ ಸಂಯೋಜಿಸಿ ದೇಶೀಯ ಹಾಗೂ ಗಡಿ-ದಾಟಿ M&A ಅವಕಾಶಗಳಿಗೆ ಬಲಿಷ್ಠ ವೇದಿಕೆಯನ್ನು ನಿರ್ಮಿಸುವ ಗುರಿಯನ್ನು ಹೊಂದಿದ್ದೇವೆ. ಸ್ವಾಧೀನ ಹಣಕಾಸು, ಸಿಂಡಿಕೇಟೆಡ್ ಸಾಲ, ಸಂರಚಿತ ಹಣಕಾಸು ಹಾಗೂ ಕಾರ್ಯತಂತ್ರದ ಸಲಹಾ ಸೇವೆಗಳ ಸಮಗ್ರ ಪರಿಹಾರಗಳನ್ನು ಒದಗಿಸುವ ಮೂಲಕ ನಮ್ಮ ಗ್ರಾಹಕರ ಬೆಳವಣಿಗೆಯ ಆಶಯಗಳಿಗೆ ಬೆಂಬಲ ನೀಡುವುದರ ಜೊತೆಗೆ ಭಾರತದ ಬೆಳೆಯುತ್ತಿರುವ ಕಾರ್ಪೊರೇಟ್ ಹಾಗೂ ಹೂಡಿಕೆ ಪರಿಸರಕ್ಕೆ ಮಹತ್ವದ ಕೊಡುಗೆ ನೀಡಲಿದ್ದೇವೆ.” ಎಂದು ಹೇಳಿದರು.

ಮಿಜುಹೋ ಬ್ಯಾಂಕ್‌ನ ಹಿರಿಯ ವ್ಯವಸ್ಥಾಪಕ ನಿರ್ದೇಶಕರು ಹಾಗೂ ಭಾರತ ಸಹ-ದೇಶ ಮುಖ್ಯಸ್ಥರಾದ ಪಿಯೂಷ್ ಅಗರ್ವಾಲ್ ಅವರು ಮಾತನಾಡಿ, “ಭಾರತವನ್ನು ಮಿಜುಹೋ ತನ್ನ ದೀರ್ಘಾವಧಿಯ ಕಾರ್ಯತಂತ್ರದ ಬೆಳವಣಿಗೆಯ ಪ್ರಮುಖ ಚಾಲಕ ಹಾಗೂ ಅಂತರರಾಷ್ಟ್ರೀಯ ವಿಸ್ತರಣೆಯ ಪ್ರಮುಖ ಸ್ತಂಭವೆಂದು ಪರಿಗಣಿಸುತ್ತದೆ. ಮಿಜುಹೋ ಜಪಾನ್‌ನ ಪ್ರಮುಖ ಹಣಕಾಸು ಸಂಸ್ಥೆಗಳಲ್ಲಿ ಒಂದಾಗಿದ್ದು, ಜಾಗತಿಕ ಮಟ್ಟದಲ್ಲಿ ಸ್ವಾಧೀನ ಹಣಕಾಸು ಹಾಗೂ M&A ಸಲಹಾ ಸೇವೆಗಳಲ್ಲಿ ಮುಂಚೂಣಿಯಲ್ಲಿದೆ. ಕಳೆದ 30 ವರ್ಷಗಳಿಂದ ಭಾರತದಲ್ಲಿ ತನ್ನ ಉಪಸ್ಥಿತಿಯ ಮೂಲಕ ದೇಶದ ಕಾರ್ಪೊರೇಟ್ ಮತ್ತು ಹಣಕಾಸು ಕ್ಷೇತ್ರಗಳ ಬಗ್ಗೆ ಆಳವಾದ ಅರಿವನ್ನು ಹೊಂದಿದೆ. ಭಾರತವು ಮಿಜುಹೋದ ಭವಿಷ್ಯದ ಬೆಳವಣಿಗೆಗೆ ಅತ್ಯಂತ ಪ್ರಮುಖ ಮಾರುಕಟ್ಟೆಯಾಗಿದೆ. ಬ್ಯಾಂಕ್ ಆಫ್ ಬರೋಡಾದೊಂದಿಗಿನ ನಮ್ಮ ಸಂಬಂಧವು ಪರಸ್ಪರ ನಂಬಿಕೆ, ಸಹಯೋಗ ಹಾಗೂ ಎರಡು ಪ್ರಮುಖ ರಾಷ್ಟ್ರೀಯ ಆರ್ಥಿಕತೆಗಳ ಬೆಳವಣಿಗೆಗೆ ಬೆಂಬಲ ನೀಡುವ ಸಾಮಾನ್ಯ ದೃಷ್ಟಿಕೋನದ ಮೇಲೆ ನಿರ್ಮಾಣಗೊಂಡಿದೆ. ಈ ತಿಳುವಳಿಕಾ ಒಪ್ಪಂದ (MoU) ಗಡಿ-ದಾಟಿ ವ್ಯವಹಾರಗಳ ರಚನೆ, ಸಿಂಡಿಕೇಶನ್ ಹಾಗೂ ಸ್ವಾಧೀನ ವ್ಯವಹಾರಗಳ ಅಂಡರ್‌ರೈಟಿಂಗ್ ಕ್ಷೇತ್ರಗಳಲ್ಲಿ ಎರಡೂ ಬ್ಯಾಂಕುಗಳ ಸಾಮರ್ಥ್ಯವನ್ನು ಪರಸ್ಪರ ಬಳಸಿಕೊಳ್ಳುವ ಮೂಲಕ ಜಂಟಿ ಅಭಿವೃದ್ಧಿಗೆ ಹೊಸ ಅವಕಾಶಗಳನ್ನು ಸೃಷ್ಟಿಸಲಿದೆ.” ಎಂದು ಹೇಳಿದರು.