ನವದೆಹಲಿ : ಭಾರತೀಯ ಬಾಹ್ಯಾಕಾಶ ಕ್ಷೇತ್ರವನ್ನು ಖಾಸಗಿ ವಲಯಕ್ಕೆ ಮುಕ್ತಗೊಳಿಸಿದ ಬಳಿಕ ದೇಶದಲ್ಲಿ ಬಾಹ್ಯಾಕಾಶ ಸ್ಟಾರ್ಟ್ಅಪ್ಗಳ ಸಂಖ್ಯೆ ವೇಗವಾಗಿ ಏರಿಕೆಯಾಗಿದ್ದು, ಕಳೆದ ನಾಲ್ಕು ವರ್ಷಗಳಲ್ಲಿ ಖಾಸಗಿ ಕಂಪನಿಗಳಿಂದ 800ಕ್ಕೂ ಹೆಚ್ಚು ಅರ್ಜಿಗಳು ಸಲ್ಲಿಕೆಯಾಗಿವೆ ಎಂದು ಭಾರತೀಯ ರಾಷ್ಟ್ರೀಯ ಬಾಹ್ಯಾಕಾಶ ಪ್ರಚಾರ ಮತ್ತು ಅಧಿಕಾರ ಕೇಂದ್ರ (IN-SPACe) ತಿಳಿಸಿದೆ.
ಐಎಎಫ್ಐ (AIFI) ಬಾಹ್ಯಾಕಾಶ ನೀತಿ ಸಮ್ಮೇಳನ-2026ರಲ್ಲಿ ಮಾತನಾಡಿದ IN-SPACeನ ಪ್ರೋಗ್ರಾಮ್ ಮ್ಯಾನೇಜ್ಮೆಂಟ್ ಮತ್ತು ಆಥರೈಸೇಶನ್ ನಿರ್ದೇಶಕ ಪಿ.ಕೆ. ಜೈನ್, ಕೇಂದ್ರ ಸರ್ಕಾರದ ಸುಧಾರಣೆಗಳು ಹಾಗೂ ಹೊಸ ನೀತಿಗಳಿಂದ ಭಾರತೀಯ ಬಾಹ್ಯಾಕಾಶ ಕ್ಷೇತ್ರದಲ್ಲಿ ಹೊಸ ಅವಕಾಶಗಳು ಸೃಷ್ಟಿಯಾಗಿವೆ ಎಂದು ಹೇಳಿದರು.
ಪ್ರಮುಖ ಅಂಶಗಳು
- ಕಳೆದ 6 ವರ್ಷಗಳ ಹಿಂದೆ ಒಂದಂಕಿಯಲ್ಲಿದ್ದ ಬಾಹ್ಯಾಕಾಶ ಸ್ಟಾರ್ಟ್ಅಪ್ಗಳ ಸಂಖ್ಯೆ ಇದೀಗ 450ಕ್ಕೂ ಅಧಿಕವಾಗಿದೆ.
- ಖಾಸಗಿ ವಲಯದಿಂದ ಬಂದ 800ಕ್ಕೂ ಹೆಚ್ಚು ಅರ್ಜಿಗಳಲ್ಲಿ 130ಕ್ಕೂ ಅಧಿಕ ಯೋಜನೆಗಳಿಗೆ IN-SPACe ಅನುಮೋದನೆ ನೀಡಿದೆ.
- ಇಸ್ರೋ (ISRO) ಅಭಿವೃದ್ಧಿಪಡಿಸಿದ 100ಕ್ಕೂ ಹೆಚ್ಚು ತಂತ್ರಜ್ಞಾನಗಳನ್ನು ಖಾಸಗಿ ಕಂಪನಿಗಳಿಗೆ ಹಸ್ತಾಂತರಿಸಲಾಗಿದೆ.
- ಕಳೆದ ಮೂರು ವರ್ಷಗಳಲ್ಲಿ ಭಾರತೀಯ ಬಾಹ್ಯಾಕಾಶ ಸ್ಟಾರ್ಟ್ಅಪ್ಗಳು 390 ಮಿಲಿಯನ್ ಡಾಲರ್ (ಸುಮಾರು ₹3,750 ಕೋಟಿ) ಹೂಡಿಕೆ ಆಕರ್ಷಿಸಿವೆ.
ಇಸ್ರೋ ಸೌಲಭ್ಯಗಳು ಖಾಸಗಿ ಕಂಪನಿಗಳಿಗೆ
ಖಾಸಗಿ ಕಂಪನಿಗಳು ಇಸ್ರೋದ ಪರೀಕ್ಷಾ ಕೇಂದ್ರಗಳು, ತಾಂತ್ರಿಕ ಬೆಂಬಲ ಹಾಗೂ ತಂತ್ರಜ್ಞಾನ ಹಸ್ತಾಂತರದ ಸೌಲಭ್ಯಗಳನ್ನು ಬಳಸಿಕೊಳ್ಳಲು ಅವಕಾಶ ಕಲ್ಪಿಸಲಾಗಿದೆ ಎಂದು ಪಿ.ಕೆ. ಜೈನ್ ತಿಳಿಸಿದರು.
ಉದ್ಯಮಿಗಳಿಗೆ ವಿವಿಧ ಸರ್ಕಾರಿ ಇಲಾಖೆಗಳ ಅನುಮತಿ ಪಡೆಯುವ ಪ್ರಕ್ರಿಯೆಯನ್ನು ಸುಲಭಗೊಳಿಸಲು ‘ಸಿಂಗಲ್ ವಿಂಡೋ ಇಂಟರ್ಫೇಸ್’ ವ್ಯವಸ್ಥೆಯನ್ನು ಜಾರಿಗೆ ತರಲು ದೂರಸಂಪರ್ಕ ಹಾಗೂ ಮಾಹಿತಿ ಮತ್ತು ಪ್ರಸಾರ ಸಚಿವಾಲಯಗಳೊಂದಿಗೆ ಸಮನ್ವಯ ಸಾಧಿಸಲಾಗುತ್ತಿದೆ ಎಂದರು.
ಸ್ಕೈರೂಟ್ ಸಾಧನೆಗೆ ಮೆಚ್ಚುಗೆ
ಈ ವೇಳೆ ಸ್ಕೈರೂಟ್ ಏರೋಸ್ಪೇಸ್ ಸಾಧನೆಯನ್ನು ಶ್ಲಾಘಿಸಿದ ಪಿ.ಕೆ. ಜೈನ್, ಭಾರತದಲ್ಲಿ ಮೊದಲ ಬಾಹ್ಯಾಕಾಶ ಯೂನಿಕಾರ್ನ್ ಸಂಸ್ಥೆಯಾಗಿ ಸ್ಕೈರೂಟ್ ಹೊರಹೊಮ್ಮಿದ್ದು, ವಿಕ್ರಮ್-1 ರಾಕೆಟ್ ಉಡಾವಣೆಯ ಮೂಲಕ ಖಾಸಗಿ ಬಾಹ್ಯಾಕಾಶ ಕ್ಷೇತ್ರದಲ್ಲಿ ಹೊಸ ಇತಿಹಾಸ ನಿರ್ಮಿಸಿದೆ ಎಂದು ಹೇಳಿದರು.