ಕಣ್ಮರೆಯಾಗುತ್ತಿರುವ ವೈದಿಕ ಯಜ್ಞ ಪರಂಪರೆಯ ಪುನರುಜ್ಜೀವನ ಮತ್ತು ‘ಶ್ರೀ ಮಹಾಧನ್ವಂತರಿ ಯಾಗ’ !

0
5

ಭಾರತೀಯ ಸಂಸ್ಕೃತಿಯಲ್ಲಿ ಯಜ್ಞವು ಕೇವಲ ಧಾರ್ಮಿಕ ವಿಧಿಯ ಪರಂಪರೆಯಲ್ಲ, ಬದಲಾಗಿ ದೇವತೆಗಳ ಉಪಾಸನೆ, ಮಂತ್ರಶಕ್ತಿ, ಆಧ್ಯಾತ್ಮಿಕ ಸಾಧನೆ ಮತ್ತು ಸಮಷ್ಟಿಯ ಕಲ್ಯಾಣ ಇವುಗಳ ಸಂಗಮವಾಗಿದೆ. ವೇದಕಾಲದಿಂದಲೂ ಅಶ್ವಮೇಧ, ರಾಜಸೂಯ, ಸೋಮಯಾಗ, ವಾಜಪೇಯದಂತಹ ಅನೇಕ ವೈಶಿಷ್ಟ್ಯಪೂರ್ಣ ಯಜ್ಞಗಳನ್ನು ಮಾಡಲಾಗುತ್ತಿತ್ತು. ಪ್ರತಿಯೊಂದು ಯಜ್ಞಕ್ಕೂ ಅದರದ್ದೇ ಆದ ನಿರ್ದಿಷ್ಟ ದೇವತಾತತ್ತ್ವ, ಮಂತ್ರ, ಹವಿಸ್ಸು, ಸಂಕಲ್ಪ ಮತ್ತು ವಿಧಿವಿಧಾನಗಳಿವೆ. ಕಾಲಕ್ರಮೇಣ ಅನೇಕ ಅಪರೂಪದ ಯಜ್ಞಗಳ ಪರಂಪರೆಯು ಕಣ್ಮರೆಯಾಗುತ್ತಿರುವಾಗ, ಈ ಪ್ರಾಚೀನ ಜ್ಞಾನದ ಸಂರಕ್ಷಣೆ ಮತ್ತು ಪುನರುಜ್ಜೀವನ ಅತ್ಯಗತ್ಯವಾಗಿದೆ. ಇದೇ ಉದ್ದೇಶದಿಂದ ಸಚ್ಚಿದಾನಂದ ಪರಬ್ರಹ್ಮ ಡಾ. ಜಯಂತ ಆಠವಲೆಯವರ ಪ್ರೇರಣೆಯಿಂದ ಸನಾತನ ಸಂಸ್ಥೆಯು ಸಂತರು ಮತ್ತು ಅನುಭವಿ ಪುರೋಹಿತರ ಮಾರ್ಗದರ್ಶನದಲ್ಲಿ ಈವರೆಗೆ 300 ಕ್ಕೂ ಹೆಚ್ಚು ಯಜ್ಞಗಳು ಮತ್ತು 1000 ಕ್ಕೂ ಹೆಚ್ಚು ಧಾರ್ಮಿಕ ಅನುಷ್ಠಾನಗಳನ್ನು ಸಂಪನ್ನಗೊಳಿಸಿದೆ.

 ಅಪರೂಪದ ಯಜ್ಞಗಳ ಆಯೋಜನೆ, ಪ್ರಾಚೀನ ಜ್ಞಾನದ ಸಂರಕ್ಷಣೆ ಮತ್ತು ವೈಜ್ಞಾನಿಕ ಸಂಶೋಧನೆ !

ಸನಾತನ ಸಂಸ್ಥೆಯ ಯಜ್ಞ ಪರಂಪರೆಯಲ್ಲಿ, 2012

ರಲ್ಲಿ ಬಾರ್ಶಿಯಲ್ಲಿ (ಸೋಲಾಪುರ ಜಿಲ್ಲೆ) ಅಶ್ವಮೇಧಯಾಜಿ ಪ. ಪೂ. ನಾನಾ ಕಾಳೆಗುರೂಜಿ ಅವರ ಮಾರ್ಗದರ್ಶನದಲ್ಲಿ ನಡೆದ ಸಾಗ್ನಿಚಿತ್ ಅಶ್ವಮೇಧ ಮಹಾಸೋಮಯಾಗವು ವಿಶೇಷವಾಗಿ ಉಲ್ಲೇಖನೀಯವಾಗಿದೆ. ಇದಲ್ಲದೆ, ಶ್ರೀ ಮಹಾಸುದರ್ಶನ ಯಾಗ, ಶ್ರೀ ಬಗಲಾಮುಖಿ ಯಜ್ಞ, ಮಹಾಚಂಡಿ ಯಾಗ, ಮಹಾರುದ್ರಯಾಗ, ಶ್ರೀ ತ್ರಿಪುರಸುಂದರಿ ಲಲಿತಾಂಬಾ ಯಜ್ಞ, ಶ್ರೀ ರಾಜಮಾತಂಗಿ ದೇವಿ ಯಾಗ, ಪಂಚಮಹಾಭೂತತತ್ತ್ವ ಯಾಗ, ಋಷಿಯಾಗ, ಗರುಡಪಂಚಾಕ್ಷರಿ ಯಜ್ಞ, ಪಿತೃಯಜ್ಞ ಮತ್ತು ಶ್ರೀ ಉಗ್ರಪ್ರತ್ಯಂಗಿರಾ ಯಾಗದಂತಹ ಅನೇಕ ವಿಶಿಷ್ಟ ಯಜ್ಞಗಳನ್ನು ಆಯೋಜಿಸಲಾಗಿದೆ. ಪ. ಪೂ. ದಾಸ ಮಹಾರಾಜ, ಪ.ಪೂ. ರಾಮಭಾವುಸ್ವಾಮಿ, ಪ.ಪೂ. ಆಬಾ ಉಪಾಧ್ಯೆ ಅವರಂತಹ ಸಂತರ ಮಾರ್ಗದರ್ಶನವೂ ಈ ಯಜ್ಞಗಳಿಗೆ ಲಭಿಸಿದೆ.

ಯಜ್ಞ ಪರಂಪರೆಯ ಸಂರಕ್ಷಣೆಯನ್ನು ಕೇವಲ ಆಯೋಜನೆಯಿಂದಷ್ಟೇ ಅಲ್ಲ, ಅದರ ಹಿಂದಿನ ಶಾಸ್ತ್ರವನ್ನು ಮುಂದಿನ ಪೀಳಿಗೆಗೆ ತಲುಪಿಸುವ ಮೂಲಕವೂ ಮಾಡಲಾಗುತ್ತಿದೆ. ಇತ್ತೀಚಿನ ದಿನಗಳಲ್ಲಿ ಪ್ರಗತಿಪರರು ಮತ್ತು ನಾಸ್ತಿಕರು ಯಜ್ಞಗಳನ್ನು ಆಗಾಗ ಟೀಕಿಸುತ್ತಾರೆ, ‘ಯಜ್ಞದಲ್ಲಿ ತುಪ್ಪ, ಸುಗಂಧ ದ್ರವ್ಯಗಳು ಮತ್ತು ಅಪರೂಪದ ವನಸ್ಪತಿಗಳನ್ನು ಸುಡುವ ಮೂಲಕ ಕೋಟ್ಯಂತರ ರೂಪಾಯಿಗಳನ್ನು ಪೋಲು ಮಾಡಲಾಗುತ್ತದೆ; ಈ ಹಣವನ್ನು ಬಡವರು, ರೈತರು ಮತ್ತು ಶಿಕ್ಷಣಕ್ಕಾಗಿ ಬಳಸಬೇಕು’ ಎಂದು ಹೇಳುತ್ತಾರೆ. ಆದರೆ ಸನಾತನ ಸಂಸ್ಥೆಯು ಕೇವಲ ಶ್ರದ್ಧೆಯಿಂದ ಮಾತ್ರವಲ್ಲದೆ ಆಧುನಿಕ ಉಪಕರಣಗಳ ಸಹಾಯದಿಂದ ಯಜ್ಞದ ಹಿಂದಿನ ಶಾಸ್ತ್ರವನ್ನು ಸಿದ್ಧಪಡಿಸುವ ಮೂಲಕ ಈ ಟೀಕೆಗಳಿಗೆ ತಕ್ಕ ಉತ್ತರ ನೀಡಿದೆ.

ಸಂಸ್ಥೆಯು ‘ಯು.ಎ.ಎಸ್.’ (ಯುನಿವರ್ಸಲ್ ಔರಾ ಸ್ಕ್ಯಾನರ್) ನಂತಹ ಆಧುನಿಕ ವೈಜ್ಞಾನಿಕ ಉಪಕರಣಗಳ ಮೂಲಕ ಯಜ್ಞಗಳ ಆಳವಾದ ಅಧ್ಯಯನವನ್ನು ಮಾಡಿದೆ. ಯಜ್ಞಗಳಿಂದ ಬರುವ ಅನುಭೂತಿಗಳು, ವಾತಾವರಣದಲ್ಲಿನ ಸಾತ್ತ್ವಿಕತೆಯಲ್ಲಿ ಆಗುವ ಅಗಾಧವಾದ ಹೆಚ್ಚಳ ಮತ್ತು ಪರಿಸರದ ಮೇಲಾಗುವ ಸಕಾರಾತ್ಮಕ ಪರಿಣಾಮಗಳನ್ನು ವೈಜ್ಞಾನಿಕವಾಗಿ ಸಂಶೋಧಿಸಿ ದಾಖಲಿಸಲಾಗುತ್ತಿದೆ. ಸಂಸ್ಥೆಯು ಈ ಸಂಶೋಧನೆಯನ್ನು ಕೇವಲ ಸಂಗ್ರಹಿಸಿಡದೆ, ವಿವಿಧ ರಾಷ್ಟ್ರೀಯ ಮತ್ತು ಅಂತರರಾಷ್ಟ್ರೀಯ ವೈಜ್ಞಾನಿಕ ಸಮ್ಮೇಳನಗಳಲ್ಲೂ ಮಂಡಿಸುತ್ತಿದೆ. ಇದರ ಮೂಲಕ ‘ಯಜ್ಞವು ಹಣದ ಪೋಲಲ್ಲ, ಬದಲಾಗಿ ಇದು ಸಮಷ್ಟಿಯ ಮತ್ತು ಪರಿಸರದ ಕಲ್ಯಾಣಕ್ಕಾಗಿ ಮಾಡುವ ಅತ್ಯಂತ ಮಹತ್ವದ ಮತ್ತು ವೈಜ್ಞಾನಿಕ ಕಾರ್ಯವಾಗಿದೆ’ ಎಂಬುದನ್ನು ಆಧುನಿಕ ಪರಿಭಾಷೆಯಲ್ಲಿ ಸಮಾಜದ ಮುಂದಿಡಲಾಗುತ್ತಿದೆ. ಇದಲ್ಲದೆ ಸನಾತನ ಪುರೋಹಿತ ಪಾಠಶಾಲೆಯ ಮೂಲಕ ‘ಈಶ್ವರಪ್ರಾಪ್ತಿಗಾಗಿ ಪೌರೋಹಿತ್ಯ’ ಎಂಬ ಭಾವದಿಂದ ಪುರೋಹಿತ ಸಾಧಕರನ್ನು ಸಿದ್ಧಪಡಿಸುವುದು ಈ ಕಾರ್ಯದ ಮತ್ತೊಂದು ಪ್ರಮುಖ ಅಂಶವಾಗಿದೆ.

ಆರೋಗ್ಯ ಮತ್ತು ಆಯುರ್ವೇದದ ಅಧಿದೇವತೆ ಭಗವಾನ್ ಧನ್ವಂತರಿ !

ಹಿಂದೂ ಧರ್ಮದಲ್ಲಿನ 33 ಕೋಟಿ ದೇವತೆಗಳ ಪರಿಕಲ್ಪನೆಯು ಸೃಷ್ಟಿಯ ವಿವಿಧ ಶಕ್ತಿಗಳು ಮತ್ತು ತತ್ತ್ವಗಳ ಉಪಾಸನೆಗೆ ಸಂಬಂಧಿಸಿದೆ. ಬುದ್ಧಿ, ವಿದ್ಯೆ, ಧನ, ಅನ್ನ ಮತ್ತು ಆರೋಗ್ಯದಂತಹ ಜೀವನದ ವಿವಿಧ ಕ್ಷೇತ್ರಗಳಿಗಾಗಿ ನಿರ್ದಿಷ್ಟ ದೇವತೆಗಳ ಉಪಾಸನೆಯನ್ನು ಹೇಳಲಾಗಿದೆ. ಭಗವಾನ್ ಧನ್ವಂತರಿಯನ್ನು ಆಯುರ್ವೇದದ ಅಧಿದೇವತೆ ಎಂದು ಪರಿಗಣಿಸಲಾಗಿದೆ. ಸಮುದ್ರ ಮಂಥನದಿಂದ ಅಮೃತಕಲಶವನ್ನು ಹಿಡಿದುಕೊಂಡು ಅವರು ಪ್ರಕಟರಾದರು ಎಂದು ಶ್ರೀಮದ್ಭಾಗವತದಲ್ಲಿ ವಿವರಿಸಲಾಗಿದೆ. ಭಗವಾನ್ ವಿಷ್ಣುವಿನ ಅಂಶಾವತಾರವಾಗಿರುವ ಧನ್ವಂತರಿ ದೇವತೆಯು ಮಾನವಕುಲಕ್ಕೆ ಆರೋಗ್ಯ ರಕ್ಷಣೆ ಮತ್ತು ರೋಗನಿವಾರಣೆಗಾಗಿ ಆಯುರ್ವೇದದ ಜ್ಞಾನವನ್ನು ನೀಡಿದರು. ಆದ್ದರಿಂದ ದೈಹಿಕ ಆರೋಗ್ಯದ ಜೊತೆಗೆ ಮಾನಸಿಕ ಮತ್ತು ಆಧ್ಯಾತ್ಮಿಕ ಕಲ್ಯಾಣಕ್ಕಾಗಿಯೂ ಅವರ ಉಪಾಸನೆಯು ಮಹತ್ವದ್ದಾಗಿದೆ ಎಂದು ಪರಿಗಣಿಸಲಾಗಿದೆ.

ಯುದ್ಧ, ನೈಸರ್ಗಿಕ ವಿಕೋಪಗಳು ಮತ್ತು ಸಾಂಕ್ರಾಮಿಕ ರೋಗಗಳ ಹಿನ್ನೆಲೆಯಲ್ಲಿ ಮಹಾಯಾಗದ ಆಯೋಜನೆ !

ಪ್ರಸ್ತುತ ಜಾಗತಿಕ ಮಟ್ಟದಲ್ಲಿ ಯುದ್ಧದ ಪರಿಸ್ಥಿತಿ, ವಿವಿಧ ದೇಶಗಳಲ್ಲಿನ ಅಸ್ಥಿರತೆ, ನೈಸರ್ಗಿಕ ವಿಕೋಪಗಳು, ಹವಾಮಾನ ವೈಪರೀತ್ಯಗಳು ಮತ್ತು ಸಾಂಕ್ರಾಮಿಕ ರೋಗಗಳ ಸವಾಲುಗಳು ಹೆಚ್ಚಾಗುತ್ತಿವೆ. ಭವಿಷ್ಯದಲ್ಲಿ ಭೀಕರ ಬಿಕ್ಕಟ್ಟುಗಳನ್ನು ಎದುರಿಸಬೇಕಾಗಬಹುದು ಎಂದು ಅನೇಕ ದಾರ್ಶನಿಕ ಸಂತರು ಸೂಚಿಸಿದ್ದಾರೆ. ಇಂತಹ ಪರಿಸ್ಥಿತಿಯಲ್ಲಿ ಸಮಾಜದ ಆರೋಗ್ಯ ರಕ್ಷಣೆಯ ಜೊತೆಗೆ ರಾಷ್ಟ್ರ ಮತ್ತು ಧರ್ಮದ ಕಾರ್ಯಗಳಿಗಾಗಿ ಜನರಿಗೆ ಆಧ್ಯಾತ್ಮಿಕ ಬಲ ಸಿಗುವುದು ಅತ್ಯಗತ್ಯ. ಈ ವ್ಯಾಪಕ ಸಂಕಲ್ಪದೊಂದಿಗೆ ಕರ್ನಾಟಕದ ಶ್ರೀಕೃಷ್ಣಕ್ಷೇತ್ರ ಉಡುಪಿಯಲ್ಲಿ ‘ಶ್ರೀ ಮಹಾಧನ್ವಂತರಿ ಯಾಗ’ವನ್ನು ಆಯೋಜಿಸಲಾಗಿದೆ.

ಈ ಮಹಾಯಾಗದ ಮೂಲಕ ಭಗವಾನ್ ಧನ್ವಂತರಿಯ ಚರಣಗಳಲ್ಲಿ ಸಾಮೂಹಿಕ ಪ್ರಾರ್ಥನೆ ಮಾಡಲಾಗುವುದು. ಶರೀರ, ಮನಸ್ಸು ಮತ್ತು ಬುದ್ಧಿಯ ಸ್ವಾಸ್ಥ್ಯವು ಉಳಿಯಲಿ, ಕಾಯಿಲೆಗಳು ಮತ್ತು ಮಾನಸಿಕ ಒತ್ತಡಗಳನ್ನು ಜಯಿಸಲು ಬಲ ಸಿಗಲಿ ಹಾಗೂ ಸಾಧನೆ ಮತ್ತು ರಾಷ್ಟ್ರಸೇವೆ ಮಾಡುವ ಸಾಮರ್ಥ್ಯ ಪ್ರಾಪ್ತವಾಗಲಿ ಎಂಬುದು ಇದರ ಹಿಂದಿನ ಭಾವವಾಗಿದೆ. ಯಜ್ಞದ ಮೂಲಕ ವ್ಯಕ್ತಿಯ ಕಲ್ಯಾಣದೊಂದಿಗೆ ಇಡೀ ಸಮಾಜದ ಸ್ವಾಸ್ಥ್ಯಕ್ಕಾಗಿ ಪ್ರಾರ್ಥಿಸಲು ಇದೊಂದು ಮಹತ್ವದ ಅವಕಾಶವಾಗಿದೆ.