ಎಷ್ಟೇ ಬಗೆಯ ಸಾಂಬಾರ್, ಪಲ್ಯ ಹಾಗೂ ಇತರ ಖಾದ್ಯಗಳಿದ್ದರೂ, ಬಿಸಿ ಬಿಸಿ ಅನ್ನಕ್ಕೆ ಒಂದು ಚಮಚ ಚಟ್ನಿ ಮತ್ತು ಸ್ವಲ್ಪ ಕೊಬ್ಬರಿ ಎಣ್ಣೆ ಸೇರಿಸಿ ಕಲಸಿ ತಿಂದರೆ ಸಿಗುವ ರುಚಿಯೇ ವಿಭಿನ್ನ. ಕಡಿಮೆ ಸಾಮಗ್ರಿಗಳಿಂದ ಸುಲಭವಾಗಿ ತಯಾರಿಸಬಹುದಾದ ಚಟ್ನಿಗಳು ಕೇವಲ ರುಚಿಯನ್ನಷ್ಟೇ ಅಲ್ಲ, ಆರೋಗ್ಯಕ್ಕೂ ಸಹಕಾರಿ. ಇಲ್ಲಿವೆ ಕೆಲ ಸರಳ ಹಾಗೂ ರುಚಿಕರ ಚಟ್ನಿ ರೆಸಿಪಿಗಳು.
1. ಕರಿಬೇವಿನ ಚಟ್ನಿ
ಕರಿಬೇವಿನಲ್ಲಿ ಕಬ್ಬಿಣಾಂಶ, ಫೈಬರ್ ಹಾಗೂ ಆಂಟಿಆಕ್ಸಿಡೆಂಟ್ಗಳು ಸಮೃದ್ಧವಾಗಿದ್ದು, ಆರೋಗ್ಯಕ್ಕೆ ತುಂಬಾ ಉಪಯುಕ್ತ.
ಬೇಕಾಗುವ ಸಾಮಗ್ರಿಗಳು:
- 2 ಕಪ್ ಕರಿಬೇವು
- 1 ಕಪ್ ತುರಿದ ತೆಂಗಿನಕಾಯಿ
- 5 ಒಣ ಮೆಣಸಿನಕಾಯಿ
- ಸಣ್ಣ ನೆಲ್ಲಿಕಾಯಿ ಗಾತ್ರದ ಹುಣಿಸೇಹಣ್ಣು
- 3 ಎಸಳು ಬೆಳ್ಳುಳ್ಳಿ
- ರುಚಿಗೆ ತಕ್ಕಷ್ಟು ಉಪ್ಪು
- 1 ಟೀಸ್ಪೂನ್ ಕೊಬ್ಬರಿ ಎಣ್ಣೆ
ತಯಾರಿಸುವ ವಿಧಾನ:
ಬಾಣಲೆಯಲ್ಲಿ ಕೊಬ್ಬರಿ ಎಣ್ಣೆ ಬಿಸಿ ಮಾಡಿ ಕರಿಬೇವು ಹಾಗೂ ಒಣ ಮೆಣಸಿನಕಾಯಿಯನ್ನು ಸ್ವಲ್ಪ ಹುರಿಯಿರಿ. ನಂತರ ತುರಿದ ತೆಂಗಿನಕಾಯಿ, ಹುಣಿಸೇಹಣ್ಣು, ಬೆಳ್ಳುಳ್ಳಿ ಹಾಗೂ ಉಪ್ಪು ಸೇರಿಸಿ ಗಟ್ಟಿಯಾಗಿ ರುಬ್ಬಿ. ಬಿಸಿ ಅನ್ನಕ್ಕೆ ಕೊಬ್ಬರಿ ಎಣ್ಣೆಯೊಂದಿಗೆ ಸವಿಯಿರಿ.
2. ಟೊಮೆಟೊ–ಬೆಳ್ಳುಳ್ಳಿ ಚಟ್ನಿ
ಮನೆಯಲ್ಲಿ ತರಕಾರಿ ಇಲ್ಲದ ದಿನಗಳಲ್ಲಿ ಅನ್ನ, ದೋಸೆ ಅಥವಾ ಚಪಾತಿಯೊಂದಿಗೆ ಸವಿಯಲು ಇದು ಅತ್ಯುತ್ತಮ.
ಬೇಕಾಗುವ ಸಾಮಗ್ರಿಗಳು:
- 4 ಹಣ್ಣಾದ ಟೊಮೆಟೊ
- 8 ಎಸಳು ಬೆಳ್ಳುಳ್ಳಿ
- 6 ಒಣ ಮೆಣಸಿನಕಾಯಿ
- 5 ಸಣ್ಣ ಈರುಳ್ಳಿ
- ರುಚಿಗೆ ತಕ್ಕಷ್ಟು ಉಪ್ಪು
- 1 ಟೇಬಲ್ ಚಮಚ ಕೊಬ್ಬರಿ ಎಣ್ಣೆ
ತಯಾರಿಸುವ ವಿಧಾನ:
ಎಣ್ಣೆಯಲ್ಲಿ ಬೆಳ್ಳುಳ್ಳಿ, ಈರುಳ್ಳಿ ಹಾಗೂ ಒಣ ಮೆಣಸಿನಕಾಯಿ ಹುರಿದು, ಬಳಿಕ ಟೊಮೆಟೊ ಸೇರಿಸಿ ಚೆನ್ನಾಗಿ ಬೇಯಿಸಿ. ತಣ್ಣಗಾದ ನಂತರ ಉಪ್ಪು ಸೇರಿಸಿ ರುಬ್ಬಿ. ಈ ಚಟ್ನಿ ಅನ್ನ, ದೋಸೆ ಹಾಗೂ ಚಪಾತಿಗೆ ಉತ್ತಮ ಜೊತೆಯಾಗುತ್ತದೆ.
3. ಹಸಿ ಮಾವಿನಕಾಯಿ ಚಟ್ನಿ
ಹಸಿ ಮಾವಿನಕಾಯಿಯ ಹುಳಿ ರುಚಿ ಬೇಸಿಗೆಯಲ್ಲಿ ಅನ್ನದ ಸವಿಯನ್ನು ಮತ್ತಷ್ಟು ಹೆಚ್ಚಿಸುತ್ತದೆ.
ಬೇಕಾಗುವ ಸಾಮಗ್ರಿಗಳು:
- 1 ಹಸಿ ಮಾವಿನಕಾಯಿ
- 1 ಕಪ್ ತುರಿದ ತೆಂಗಿನಕಾಯಿ
- 2 ಹಸಿ ಮೆಣಸಿನಕಾಯಿ
- 4 ಸಣ್ಣ ಈರುಳ್ಳಿ
- ರುಚಿಗೆ ತಕ್ಕಷ್ಟು ಉಪ್ಪು
ತಯಾರಿಸುವ ವಿಧಾನ:
ಮಾವಿನಕಾಯಿಯ ಸಿಪ್ಪೆ ತೆಗೆದು ಸಣ್ಣ ತುಂಡುಗಳಾಗಿ ಕತ್ತರಿಸಿ. ಎಲ್ಲಾ ಸಾಮಗ್ರಿಗಳನ್ನು ಒಟ್ಟಿಗೆ ಸೇರಿಸಿ ರುಬ್ಬಿ. ಕೊನೆಯಲ್ಲಿ ಸ್ವಲ್ಪ ಕೊಬ್ಬರಿ ಎಣ್ಣೆ ಸೇರಿಸಿ ಬಿಸಿ ಅನ್ನದೊಂದಿಗೆ ಸವಿಯಿರಿ.