ಹಕ್ಕುಪತ್ರದ ಮರೆಯಲ್ಲಿ ಅಕ್ರಮದ ಹೂರಣ : ನಿಯಮ ಗಾಳಿಗೆ ತೂರಿ ಹಕ್ಕುಪತ್ರ ಪಡೆದ ಕುಟುಂಬ – ಅಧಿಕಾರಿಗಳ ನಿರ್ಲಕ್ಷ್ಯದ ಮೇಲೆ ಹೈಕೋರ್ಟ್ ಮೊರೆ ಸಾಧ್ಯತೆ

ಅರ್ಹರಿಗಿಲ್ಲದ ಭಾಗ್ಯ, ಅನರ್ಹರಿಗೆ ಅಧಿಕಾರಿಗಳ ಸೌಭಾಗ್ಯ ಇದು ಆಡಳಿತ ವ್ಯವಸ್ಥೆಯ ವ್ಯಂಗ್ಯ

ವರದಿ : ಮಂದಾರ ರಾಜೇಶ್ ಭಟ್

​ಬೆಳ್ತಂಗಡಿ ತಾಲೂಕಿನ ವೇಣೂರು ಹೋಬಳಿಯ ಹೊಸಂಗಡಿ ಗ್ರಾಮದಲ್ಲಿ ನಡೆದ ಈ ಘಟನೆ ಕಂದಾಯ ಇಲಾಖೆಯ ಕಾರ್ಯವೈಖರಿಗೆ ಹಿಡಿದ ಕೈಗನ್ನಡಿಯಾಗಿದೆ.

ಅಕ್ರಮ-ಸಕ್ರಮ ಯೋಜನೆಯಡಿ ನಿವೇಶನ ಅಥವಾ ಮನೆ ಪಡೆಯಲು ನೂರಾರು ಬಡವರು ಕಚೇರಿ ಅಲೆದಾಡುತ್ತಿರುವಾಗ, ಈಗಾಗಲೇ ಸ್ವಂತ ಮನೆ ಮತ್ತು ಜಮೀನು ಹೊಂದಿರುವ ಕುಟುಂಬವೊಂದು ಸುಳ್ಳು ಮಾಹಿತಿ ನೀಡಿ ಹಕ್ಕುಪತ್ರ ಗಿಟ್ಟಿಸಿಕೊಂಡಿರುವುದು ವ್ಯವಸ್ಥೆಯ ವ್ಯಂಗ್ಯವಾಗಿದೆ.

​ಪ್ರಕರಣದ ಹಿನ್ನೆಲೆ ಮತ್ತು ನಿಯಮ ಉಲ್ಲಂಘನೆ

ಕುಟುಂಬವೊಂದು ತಮಗೆ ಯಾವುದೇ ಸ್ವತ್ತು ಇಲ್ಲವೆಂದು ಸುಳ್ಳು ಮಾಹಿತಿ ನೀಡಿ ಸರ್ಕಾರದ ಹಕ್ಕುಪತ್ರ ಪಡೆದಿದೆ. ಆದರೆ ಪಂಚಾಯತ್ ದಾಖಲೆಗಳು ಮತ್ತು ಪಹಣಿ (RTC) ದಾಖಲೆಗಳನ್ನು ಪರಿಶೀಲಿಸಿದಾಗ ಅರ್ಜಿದಾರರ ಹೆಸರಿನಲ್ಲಿ ಈಗಾಗಲೇ ಸ್ವಂತ ಮನೆ ಇರುವುದು ದೃಢಪಟ್ಟಿದೆ. ಕುಟುಂಬದ ಹೆಸರಿನಲ್ಲಿ ಈಗಾಗಲೇ ಅಕ್ರಮ-ಸಕ್ರಮದಡಿ ಮಂಜೂರಾದ ಭೂಮಿ ಇರುವುದು ದಾಖಲಾಗಿದೆ.

​ನಿಯಮದ ಉಲ್ಲಂಘನೆ

ಹಕ್ಕುಪತ್ರದ ಶರತ್ತು ಕ್ರಮ ಸಂಖ್ಯೆ 2ರ ಪ್ರಕಾರ, ಕುಟುಂಬಕ್ಕೆ ಈಗಾಗಲೇ ಸ್ವಂತ ಮನೆ ಇದ್ದಲ್ಲಿ ಮತ್ತೊಂದು ಹಕ್ಕುಪತ್ರ ನೀಡಲು ಅವಕಾಶವಿಲ್ಲ. ಈ ನಿಯಮದ ಸ್ಪಷ್ಟ ಉಲ್ಲಂಘನೆ ಇಲ್ಲಿ ಎದ್ದು ಕಾಣುತ್ತಿದೆ.

​ನ್ಯಾಯಾಲಯದ ಹೋರಾಟ ಮತ್ತು ತಹಶೀಲ್ದಾರರ ಆದೇಶ

​ಈ ಅಕ್ರಮದ ವಿರುದ್ಧ ಧ್ವನಿ ಎತ್ತಿದಾಗ, ಬೆಳ್ತಂಗಡಿ ತಹಶೀಲ್ದಾರರ ನ್ಯಾಯಾಲಯವು ಸದರಿ ಹಕ್ಕುಪತ್ರವನ್ನು ರದ್ದುಗೊಳಿಸಿ, ಅಕ್ರಮವನ್ನು ತೆರವುಗೊಳಿಸಲು ಆದೇಶಿಸಿತ್ತು. ಇದನ್ನು ಪ್ರಶ್ನಿಸಿ ಅರ್ಜಿದಾರರು ಪುತ್ತೂರು ಸಹಾಯಕ ಆಯುಕ್ತರ (AC) ನ್ಯಾಯಾಲಯಕ್ಕೆ ಮೇಲ್ಮನವಿ ಸಲ್ಲಿಸಿದ್ದರು. ಸಹಾಯಕ ಆಯುಕ್ತರು ಪ್ರಕರಣವನ್ನು ಮರುಪರಿಶೀಲನೆಗೆ (Remand) ತಹಶೀಲ್ದಾರರಿಗೆ ಕಳುಹಿಸಿದ್ದರು.

​ಪ್ರಕರಣವನ್ನು ಮರು ಕೈಗೆತ್ತಿಕೊಂಡ ತಹಶೀಲ್ದಾರರು, ಈಗಾಗಲೇ ಸಾಕ್ಷ್ಯಧಾರಗಳ ಆಧಾರದ ಮೇಲೆ ಆದೇಶ ನೀಡಿರುವುದರಿಂದ ಮತ್ತೆ ಹೊಸ ಆದೇಶದ ಅಗತ್ಯವಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ಅಲ್ಲದೆ, ಹಿಂದಿನ ತೆರವು ಆದೇಶವನ್ನು ಕೂಡಲೇ ಪಾಲಿಸಲು ಕಂದಾಯ ಅಧಿಕಾರಿಗಳಿಗೆ ಸೂಚಿಸಿ ಪ್ರಕರಣವನ್ನು ಮುಕ್ತಾಯಗೊಳಿಸಿದ್ದಾರೆ. ಅತೃಪ್ತರು ಬೇಕಿದ್ದಲ್ಲಿ ಜಿಲ್ಲಾಧಿಕಾರಿಗಳಿಗೆ ಮೇಲ್ಮನವಿ ಸಲ್ಲಿಸಬಹುದು ಎಂದು ತಿಳಿಸಿದ್ದಾರೆ.

​ಸ್ಥಳೀಯ ಅಧಿಕಾರಿಗಳ ‘ಮಿಲಾಪಿ’ ಮತ್ತು ಕರ್ತವ್ಯ ಲೋಪ

​ಈ ಇಡೀ ಪ್ರಕರಣದಲ್ಲಿ ಸ್ಥಳೀಯ ಕಂದಾಯ ಅಧಿಕಾರಿಗಳ ಪಾತ್ರ ಸಂಶಯಾಸ್ಪದವಾಗಿದೆ.

​ಪರಿಶೀಲನೆಯ ವೈಫಲ್ಯ

ಹಕ್ಕುಪತ್ರ ನೀಡುವ ಮೊದಲು ಅರ್ಜಿದಾರರ ಹಿನ್ನೆಲೆ ಮತ್ತು ಆಸ್ತಿ ವಿವರಗಳನ್ನು ಕಂದಾಯ ನಿರೀಕ್ಷಕರು (RI) ಮತ್ತು ಗ್ರಾಮ ಆಡಳಿತಾಧಿಕಾರಿಗಳು (VA) ಪರಿಶೀಲಿಸಬೇಕಿತ್ತು.

​ಆಮಿಷದ ಸಂಶಯ

ಸ್ಥಳೀಯ ಅಧಿಕಾರಿಗಳು ಆಮಿಷಕ್ಕೆ ಒಳಗಾಗಿ ಸುಳ್ಳು ವರದಿ ನೀಡಿದ್ದರಿಂದಲೇ ಈ ಗೊಂದಲ ಸೃಷ್ಟಿಯಾಗಿದೆ ಎಂಬ ಬಲವಾದ ಆರೋಪವಿದೆ.

​ಆದೇಶ ಪಾಲನೆಯಲ್ಲಿ ವಿಳಂಬ

ತಹಶೀಲ್ದಾರರು ಅಕ್ರಮ ತೆರವುಗೊಳಿಸಿ ಭೂಮಿಯನ್ನು ಸರ್ಕಾರಕ್ಕೆ ಮರುಪಡೆಯುವಂತೆ ಆದೇಶಿಸಿದ್ದರೂ, ವೇಣೂರು ಹೋಬಳಿ ಕಂದಾಯ ಅಧಿಕಾರಿಗಳು ಈವರೆಗೂ ಕ್ರಮ ಕೈಗೊಳ್ಳದೆ ಇರುವುದು ಅವರ ಕಾರ್ಯವೈಖರಿಯನ್ನು ಪ್ರಶ್ನಿಸುವಂತೆ ಮಾಡಿದೆ.

​ಹೈಕೋರ್ಟ್ ಮೆಟ್ಟಿಲೇರಲಿರುವ ಅಕ್ರಮದ ಕತೆ, ಅಧಿಕಾರಿಗಳಿಗೆ ಉರುಳಾಗುವ ಸಾಧ್ಯತೆ

ಸದ್ಯದ ಪರಿಸ್ಥಿತಿಯಲ್ಲಿ, ಸುಳ್ಳು ಮಾಹಿತಿ ನೀಡಿದ ವ್ಯಕ್ತಿಗಳಿಗಿಂತ, ಅವರಿಗೆ ಸಾಥ್ ನೀಡಿದ ಅಧಿಕಾರಿಗಳ ವಿರುದ್ಧ ಕ್ರಮ ಕೈಗೊಳ್ಳಬೇಕಾದ ಅನಿವಾರ್ಯತೆ ಇದೆ. ಈ ಹಿನ್ನೆಲೆಯಲ್ಲಿ ಕರ್ತವ್ಯ ಲೋಪ ಎಸಗಿದ ಅಧಿಕಾರಿಗಳ ವಿರುದ್ಧ ಕರ್ನಾಟಕ ಉಚ್ಚ ನ್ಯಾಯಾಲಯದಲ್ಲಿ (High Court) ಪ್ರಕರಣ ದಾಖಲಾಗುವ ಸಾಧ್ಯತೆಗಳು ದಟ್ಟವಾಗಿವೆ.

​ನಿದ್ದೆ ಮಾಡುವವರನ್ನು ಎಚ್ಚರಿಸಬಹುದು, ನಟಿಸುವವರನ್ನಲ್ಲ!

ಸರ್ಕಾರಿ ಸೌಲಭ್ಯಗಳು ಸಮಾಜದ ಕಟ್ಟಕಡೆಯ ಅರ್ಹ ಫಲಾನುಭವಿಗೆ ತಲುಪಬೇಕು. ಆದರೆ ಇಲ್ಲಿ ಹಸಿ ಹಸಿ ಸುಳ್ಳುಗಳನ್ನು ಹೇಳಿ ಹಕ್ಕುಪತ್ರ ಪಡೆದವರ ಜಾಣ್ಮೆ ಮತ್ತು ಅದಕ್ಕೆ ಬೆಂಬಲ ನೀಡಿದ ಅಧಿಕಾರಿಗಳ ಧೋರಣೆ ಆತಂಕಕಾರಿ. ವ್ಯವಸ್ಥೆಯಲ್ಲಿ “ನಿದ್ದೆ ಬಂದಂತೆ ನಟಿಸುವ” ಅಧಿಕಾರಿಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳದಿದ್ದರೆ, ಜನಸಾಮಾನ್ಯರಿಗೆ ಕಾನೂನಿನ ಮೇಲಿರುವ ನಂಬಿಕೆ ಕುಸಿಯುವುದರಲ್ಲಿ ಸಂಶಯವಿಲ್ಲ. ಜಿಲ್ಲಾಡಳಿತವು ಈ ಕೂಡಲೇ ಮಧ್ಯಪ್ರವೇಶಿಸಿ, ಅಕ್ರಮ ಹಕ್ಕುಪತ್ರ ರದ್ದುಗೊಳಿಸಿ ಸರ್ಕಾರಿ ಜಾಗವನ್ನು ಮರುಸ್ವಾಧೀನಪಡಿಸಿಕೊಳ್ಳುವ ಮೂಲಕ ನ್ಯಾಯ ಒದಗಿಸಬೇಕಿದೆ.