ಮಂಗಳೂರು : ಬಹುಮುಖ ಪ್ರತಿಭೆಯ ಕನ್ನಡ ಕವಿ, ಸಂಗೀತಗಾರ ಹಾಗೂ ಗ್ರಾಮೀಣ ನಾಯಕ ದಿವಂಗತ ಕೇದಿಗೆ ಭಾಸ್ಕರ ರಾವ್ ಅವರ ಜನ್ಮ ಶತಮಾನೋತ್ಸವದ ಅಂಗವಾಗಿ ಕೇದಿಗೆ ಪ್ರತಿಷ್ಠಾನ ಮಂಗಳೂರು ಆಶ್ರಯದಲ್ಲಿ ಆಯೋಜಿಸಿದ್ದ ‘ಭಾಸ್ಕರ ಶತಾಬ್ದಿ ಸಂಸ್ಮರಣೆ ಮತ್ತು ಲಕ್ಷ್ಮೀ ಭಾಸ್ಕರ ಪ್ರಶಸ್ತಿ ಪ್ರದಾನ ಸಮಾರಂಭ’ ಆಗಸ್ಟ್ 16ರಂದು ಮಲ್ಲಿಕಟ್ಟೆಯ ಲಯನ್ಸ್ ಸೇವಾ ಮಂದಿರದಲ್ಲಿ ವೈಭವದಿಂದ ನಡೆಯಿತು.
ಕಾರ್ಯಕ್ರಮದಲ್ಲಿ ಲಯನ್ಸ್ ಕ್ಲಬ್, ಸೀನಿಯರ್ ಚೇಂಬರ್ ಇಂಟರ್ನ್ಯಾಷನಲ್ (SCI) ಮಂಗಳೂರು ಪದಾಧಿಕಾರಿಗಳು, ಕೇದಿಗೆ ಕುಟುಂಬಸ್ಥರು, ಹಿತೈಷಿಗಳು ಹಾಗೂ ಸಾರ್ವಜನಿಕರು ಸೇರಿದಂತೆ 200ಕ್ಕೂ ಅಧಿಕ ಮಂದಿ ಪಾಲ್ಗೊಂಡಿದ್ದರು.
ಸಂಜೆ 5 ಗಂಟೆಗೆ ಆರಂಭಗೊಂಡ ಕಾರ್ಯಕ್ರಮದಲ್ಲಿ ಟೀಮ್ ಅರೆಹೊಳೆ ತಂಡದ ರಂಗಗೀತೆ ಗಾಯನ, ಕುಮಾರಿ ನಿಧಿ ಅವರ ಸ್ವಾಗತ ನೃತ್ಯ ಹಾಗೂ ಪೇಜೆಂಟ್ರಿ ಪ್ರದರ್ಶನ ಗಮನ ಸೆಳೆಯಿತು. ಬಳಿಕ ಗಣ್ಯರಿಂದ ಪುಷ್ಪನಮನ ಹಾಗೂ ದೀಪಪ್ರಜ್ವಲನೆ ನಡೆಯಿತು. ವಿದ್ಯಾಶ್ರೀ ಅವರು ಪ್ರಾರ್ಥನೆ ಸಲ್ಲಿಸಿದರು.
ಕೇದಿಗೆ ಪ್ರತಿಷ್ಠಾನ ಮಂಗಳೂರು ಅಧ್ಯಕ್ಷ ಡಾ. ಕೇದಿಗೆ ಅರವಿಂದ ರಾವ್ ಸ್ವಾಗತಿಸಿದರು. ಇದೇ ಸಂದರ್ಭದಲ್ಲಿ ದಿವಂಗತ ಕೇದಿಗೆ ಭಾಸ್ಕರ ರಾವ್ ಅವರು ರಚಿಸಿದ ಪ್ರಸಿದ್ಧ ಮಕ್ಕಳ ಕವನ ಸಂಕಲನ ‘ಕೇದಿಗೆ ಹೂವು’ ಕೃತಿಯ ಮರುಮುದ್ರಿತ ಪ್ರತಿಯನ್ನು ಹಿರಿಯ ಸಾಂಸ್ಕೃತಿಕ ಹರಿಕಾರ ಸುಧಾಕರ ಪೇಜಾವರ ಅವರು ಮುಖ್ಯ ಅತಿಥಿ ಯಾಜಿ ಪಾವಂಜೆ ದಿವಾಕರ ಭಟ್ ಹಾಗೂ ಇತರ ಗಣ್ಯರ ಸಮ್ಮುಖದಲ್ಲಿ ಲೋಕಾರ್ಪಣೆಗೊಳಿಸಿದರು.
ನಾಲ್ವರು ಸಾಧಕರಿಗೆ ‘ಲಕ್ಷ್ಮೀ ಭಾಸ್ಕರ ಪ್ರಶಸ್ತಿ’
ವಿವಿಧ ಕ್ಷೇತ್ರಗಳಲ್ಲಿ ಗಣನೀಯ ಸೇವೆ ಸಲ್ಲಿಸಿದ ನಾಲ್ವರು ಸಾಧಕರಿಗೆ ಬಿರುದುಗಳೊಂದಿಗೆ ಪ್ರತಿಷ್ಠಿತ ‘ಲಕ್ಷ್ಮೀ ಭಾಸ್ಕರ ಪ್ರಶಸ್ತಿ’ ನೀಡಿ ಗೌರವಿಸಲಾಯಿತು.
- ಕರ್ನಲ್ ನಿತಿನ್ ಭಿಡೆ – ದೇಶರಕ್ಷಣೆ ಹಾಗೂ ಅತ್ಯುನ್ನತ ಮಿಲಿಟರಿ ಸೇವೆಗಾಗಿ ‘ರಾಷ್ಟ್ರಸೇವಾ ನಿಷ್ಠ’ ಪ್ರಶಸ್ತಿ.
- ಪ್ರೊ. ಡಾ. ಎಂ. ಪ್ರಭಾಕರ ಜೋಶಿ – ಯಕ್ಷಗಾನ, ಸಾಹಿತ್ಯ ಹಾಗೂ ಕಲಾ ವಿಮರ್ಶೆ ಕ್ಷೇತ್ರದ ಕೊಡುಗೆಗಾಗಿ ‘ಯಕ್ಷಕಲಾ ನಿಷ್ಠ’ ಪ್ರಶಸ್ತಿ.
- ಪ್ರೊ. ಅನಂತ ಪದ್ಮನಾಭ ರಾವ್ – ಶೈಕ್ಷಣಿಕ ಶ್ರೇಷ್ಠತೆ, ರೇಖಾಚಿತ್ರ ಹಾಗೂ ಸಾಂಸ್ಥಿಕ ನಾಯಕತ್ವಕ್ಕಾಗಿ ‘ಚಿತ್ರಕಲಾ ನಿಷ್ಠ’ ಪ್ರಶಸ್ತಿ.
- ಕೆ. ತಿರುಮಲೇಶ್ವರ ಭಟ್ – ಆದರ್ಶ ಕೃಷಿ ಚಿಂತನೆ, ಸಮಾಜಸೇವೆ ಹಾಗೂ ಗ್ರಾಮೀಣಾಭಿವೃದ್ಧಿಗಾಗಿ ‘ಕೃಷಿಸೇವಾ ನಿಷ್ಠ’ ಪ್ರಶಸ್ತಿ.
ಪ್ರಶಸ್ತಿ ಸ್ವೀಕರಿಸಿದ ಸಾಧಕರು ತಮ್ಮ ಅನಿಸಿಕೆಗಳನ್ನು ಹಂಚಿಕೊಂಡು ಕೇದಿಗೆ ಪ್ರತಿಷ್ಠಾನಕ್ಕೆ ಕೃತಜ್ಞತೆ ಸಲ್ಲಿಸಿದರು.
ಶತಾಯುಷಿ ಮೃದಂಗ ವಿದ್ವಾಂಸರಿಗೆ ಗೌರವ
ಕಾರ್ಯಕ್ರಮದ ಭಾವುಕ ಕ್ಷಣವಾಗಿ 103 ವರ್ಷದ ಶತಾಯುಷಿ ಮೃದಂಗ ವಿದ್ವಾಂಸ ಬಾಬು ರೈ ಅವರಿಗೆ ಗೌರವ ಸಲ್ಲಿಸಲಾಯಿತು. ಅವರ ದೈನಂದಿನ ಓಡಾಟ ಹಾಗೂ ವಿಶ್ರಾಂತಿಗೆ ಅನುಕೂಲವಾಗುವಂತೆ ವೀಲ್ಚೇರ್ ಅನ್ನು ಅವರ ಪುತ್ರ ಸುಭಾಷ್ ರೈ ಅವರ ಮೂಲಕ ಗೌರವಪೂರ್ವಕವಾಗಿ ಹಸ್ತಾಂತರಿಸಲಾಯಿತು.
ಅರ್ಹ ವಿದ್ಯಾರ್ಥಿಗಳಿಗೆ ವಿದ್ಯಾರ್ಥಿವೇತನ
ಮಂಗಳೂರು ಲಯನ್ಸ್ ಚಾರಿಟೇಬಲ್ ಮತ್ತು ಎಜುಕೇಶನಲ್ ಟ್ರಸ್ಟ್ ಸಹಯೋಗದಲ್ಲಿ ಅರ್ಹ ವಿದ್ಯಾರ್ಥಿಗಳಾದ ಪರ್ಣಿಕಾ, ಮೇಘಾ ವಿ. ಶೆಟ್, ಕುಶಿತ್, ರಂಜಿತಾ ಹಾಗೂ ಹರ್ಷ ಡಿ. ರಮೇಶ್ ಅವರಿಗೆ ವಿದ್ಯಾರ್ಥಿವೇತನ ವಿತರಿಸಲಾಯಿತು. ಈ ಸಂದರ್ಭದಲ್ಲಿ ನಾಗರಾಜ್ ಶರ್ಮ ಸೇರಿದಂತೆ ಗಣ್ಯರು ಉಪಸ್ಥಿತರಿದ್ದರು.
ಮುಖ್ಯ ಅತಿಥಿಯಾಗಿ ಭಾಗವಹಿಸಿದ್ದ ಯಾಜಿ ಪಾವಂಜೆ ದಿವಾಕರ ಭಟ್, ಸಂಸ್ಕೃತ ಪ್ರಾಧ್ಯಾಪಕರು, ಶ್ರೀನಿವಾಸ್ ವಿಶ್ವವಿದ್ಯಾಲಯ, ಅವರು ಕೇದಿಗೆ ಪ್ರತಿಷ್ಠಾನದ ಸಮಾಜಮುಖಿ ಕಾರ್ಯಗಳನ್ನು ಶ್ಲಾಘಿಸಿದರು. ವೃದ್ಧ ತಂದೆ-ತಾಯಂದಿರನ್ನು ವೃದ್ಧಾಪ್ಯದಲ್ಲಿ ಆಶ್ರಮಗಳಿಗೆ ಕಳುಹಿಸದೆ ತಮ್ಮೊಂದಿಗೇ ಇರಿಸಿಕೊಂಡು ಕೊನೆಯವರೆಗೂ ಆರೈಕೆ ಮಾಡುವ ಮೂಲಕ ಸಮಾಜಕ್ಕೆ ಮಾದರಿಯಾಗಬೇಕು ಎಂಬ ಸಂದೇಶ ನೀಡಿದರು.
ವೇದಿಕೆಯಲ್ಲಿ ಕಾರ್ಯಕ್ರಮ ಸಂಯೋಜಕ ದತ್ತಾತ್ರೇಯ ಬಾಳ, ಎಸ್ಸಿಐ ಮಂಗಳೂರು ಅಧ್ಯಕ್ಷ ಹರೀಶ್, ಲಯನ್ಸ್ ಕ್ಲಬ್ ಮಂಗಳೂರು ಅಧ್ಯಕ್ಷೆ ಹೇಮಾ ರಾವ್ ಹಾಗೂ ಕುಟುಂಬದ ಹಿರಿಯರಾದ ಹರ್ಷ ಕುಮಾರ್ ಕೇದಿಗೆ ಉಪಸ್ಥಿತರಿದ್ದರು.
ಚಿತ್ರಕಲೆ ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮ
ಕಾರ್ಯಕ್ರಮದ ಮತ್ತೊಂದು ವಿಶೇಷ ಆಕರ್ಷಣೆಯಾಗಿ ಖ್ಯಾತ ಹಿರಿಯ ಕಲಾವಿದ ದಿನೇಶ್ ಹೊಳ್ಳ ಅವರು ಕ್ಯಾನ್ವಾಸ್ನಲ್ಲಿ ವಿನ್ಯಾಸಗೊಳಿಸಿದ ಚಿತ್ರಕ್ಕೆ ಪ್ರೇಕ್ಷಕರು ಸ್ಥಳದಲ್ಲೇ ಬಣ್ಣ ಹಚ್ಚುವ ಅವಕಾಶ ಕಲ್ಪಿಸಲಾಗಿತ್ತು. ಇದರಿಂದ ಭಾಗವಹಿಸಿದ್ದವರಿಗೆ ಚಿತ್ರಕಲೆಯ ಅನುಭವವನ್ನು ನೇರವಾಗಿ ಪಡೆಯಲು ಸಾಧ್ಯವಾಯಿತು.
ಲಯನ್ಸ್ ಅಧ್ಯಕ್ಷರು ಶುಭಾಶಂಸನೆ ಸಲ್ಲಿಸಿದರು. ಮುಖ್ಯ ಅತಿಥಿ ದಂಪತಿಗಳನ್ನು ಶಾಲು ಹಾಗೂ ಸ್ಮರಣಿಕೆಯೊಂದಿಗೆ ಗೌರವಿಸಲಾಯಿತು. ದತ್ತಾತ್ರೇಯ ಬಾಳ ವಂದನಾರ್ಪಣೆ ಸಲ್ಲಿಸಿದರು.
ಸಭಾ ಕಾರ್ಯಕ್ರಮದ ಬಳಿಕ ಟೀಮ್ ಅರೆಹೊಳೆ ನಂದಗೋಕುಲ ತಂಡದವರ ಸಾಂಸ್ಕೃತಿಕ ಪ್ರದರ್ಶನ ಹಾಗೂ ಎಸ್ಸಿಐ ಮಂಗಳೂರು ಸದಸ್ಯರು ಮತ್ತು ಚೇತನಾ ದತ್ತಾತ್ರೇಯ ತಂಡದವರ ಪ್ರದರ್ಶನ ಪ್ರೇಕ್ಷಕರನ್ನು ರಂಜಿಸಿತು. ರಾತ್ರಿ 8.30ಕ್ಕೆ ಪ್ರೀತಿಭೋಜನದೊಂದಿಗೆ ಕಾರ್ಯಕ್ರಮ ಸಂಪನ್ನಗೊಂಡಿತು.