ಭಜನೆಯ ನಾದದಲ್ಲಿ ಮಿಂದೇಳಲಿದೆ ಶ್ರೀನಿವಾಸಪುರ

ಶ್ರೀ ವಿಠೋಬ ಭಜನಾ ಮಂಡಳಿಯ 80ನೇ ಭಜನಾ ಸಪ್ತಾಹದ ಮಂಗಲೋತ್ಸವಕ್ಕೆ ಸಿದ್ಧತೆ

ವರದಿ-ಮಂದಾರ ರಾಜೇಶ್ ಭಟ್

ಶ್ರೀನಿವಾಸಪುರ ಗುಂಡ್ಯಡ್ಕ : ಭಕ್ತಿ ಎನ್ನುವುದು ಮನಸ್ಸಿಗೆ ನೆಮ್ಮದಿ ನೀಡುವ ದಿವ್ಯಶಕ್ತಿ. ಭಜನೆ ಎನ್ನುವುದು ಭಗವಂತನ ಸ್ಮರಣೆಯೊಂದಿಗೆ ಮನಸ್ಸುಗಳನ್ನು ಬೆಸೆಯುವ ಪವಿತ್ರ ಮಾಧ್ಯಮ.

ಇಂತಹ ಭಕ್ತಿ, ಶ್ರದ್ಧೆ ಮತ್ತು ಧಾರ್ಮಿಕ ಪರಂಪರೆಯನ್ನು ವರ್ಷಂಪ್ರತಿ ಮುಂದುವರಿಸಿಕೊಂಡು ಬರುತ್ತಿರುವ ಶ್ರೀನಿವಾಸಪುರದ ಶ್ರೀ ವಿಠೋಬ ರುಕುಮಾಯಿ ದೇವಸ್ಥಾನದಲ್ಲಿ ಈ ಬಾರಿಯೂ ಭಜನಾ ಸಂಭ್ರಮ ಮನೆಮಾಡಲಿದೆ.

ಶ್ರೀ ಪರಾಭವ ನಾಮ ಸಂವತ್ಸರದ ಕಾರ್ತಿಕ ಶುಕ್ಲಪಕ್ಷದ ಅಂಗವಾಗಿ ನ.18ರಿಂದ ಆರಂಭಗೊಳ್ಳಲಿರುವ ಶ್ರೀ ವಿಠೋಬ ಭಜನಾ ಮಂಡಳಿಯ 80ನೇ ಭಜನಾ ಸಪ್ತಾಹವು ನ.24ರಂದು ಭಜನಾ ಸಪ್ತಾಹದ ಮಂಗಲೋತ್ಸವದೊಂದಿಗೆ ಸಂಪನ್ನಗೊಳ್ಳಲಿದೆ.

ವರ್ಷದಿಂದ ವರ್ಷಕ್ಕೆ ಭಕ್ತರ ಶ್ರದ್ಧೆ ಮತ್ತು ಭಜನಾ ಪರಂಪರೆಯೊಂದಿಗೆ ಮುಂದುವರಿಯುತ್ತಿರುವ ಈ ಧಾರ್ಮಿಕ ಆಚರಣೆ ಒಂದು ಉತ್ಸವ ಮಾತ್ರವಲ್ಲ

ಭಗವಂತನ ನಾಮಸ್ಮರಣೆಯಲ್ಲಿ ಮನಸ್ಸುಗಳನ್ನು ಒಂದಾಗಿಸುವ ಪವಿತ್ರ ಭಕ್ತಿಯಾತ್ರೆ. ಭಜನೆಯ ಮಧುರ ನಾದ, ದೀಪಗಳ ಬೆಳಕು, ದೇವರ ಸನ್ನಿಧಿಯಲ್ಲಿ ನಡೆಯುವ ಪೂಜಾ ಕೈಂಕರ್ಯಗಳು ಭಕ್ತಿಭಾವದ ವಾತಾವರಣವನ್ನು ಸೃಷ್ಟಿಸಲಿವೆ.

ನ.24ರಂದು ಬೆಳಗ್ಗೆ 8ರಿಂದ ಕಲಶ, ಪ್ರಧಾನ ಹೋಮ, ಪಂಚಾಮೃತ, ಸೇವೆಗಳು, ವಿವಿಧ ಅಭಿಷೇಕಗಳು, ವಿಷ್ಣುಸಹಸ್ರನಾಮ ಪಾರಾಯಣ, ಅಲಂಕಾರ ಹಾಗೂ ಭಜನಾ ಕಾರ್ಯಕ್ರಮಗಳು ನಡೆಯಲಿವೆ. ಮಧ್ಯಾಹ್ನ 12 ಗಂಟೆಗೆ ಮಹಾಪೂಜೆ, ಪ್ರಸಾದ ವಿತರಣೆ ಮತ್ತು ಅನ್ನಸಂತರ್ಪಣೆ ಜರುಗಲಿದೆ.

ಸಂಜೆ 6ರಿಂದ ದೀಪಾರಾಧನೆ, ಪಲ್ಲಕ್ಕಿ ಸೇವೆ, ರಥೋತ್ಸವ ಸೇವೆ, ಅಷ್ಟಾವಧಾನ ಸೇವೆ, ಪ್ರಸಾದ ವಿತರಣೆ ಹಾಗೂ ಅನ್ನಸಂತರ್ಪಣೆ ನಡೆಯಲಿದೆ. ರಾತ್ರಿ 9ರಿಂದ ಮರುದಿನ ಸೂರ್ಯೋದಯದವರೆಗೆ ಭಜನೆ, ಮಹಾಪೂಜೆ ಹಾಗೂ ಮಂಗಲೋತ್ಸವದ ಧಾರ್ಮಿಕ ಕಾರ್ಯಕ್ರಮಗಳು ಜರುಗಲಿವೆ.

ಭಜನೆಯ ಮೂಲಕ ಭಗವಂತನನ್ನು ಆರಾಧಿಸುವ ಈ ಪವಿತ್ರ ಪರಂಪರೆಯಲ್ಲಿ ಭಕ್ತರು ಪಾಲ್ಗೊಂಡು ದೇವರ ಕೃಪೆಗೆ ಪಾತ್ರರಾಗಬೇಕೆಂದು ದೇವಸ್ಥಾನದ ಆಡಳಿತ ಮಂಡಳಿ ಹಾಗೂ ಭಜನಾ ಮಂಡಳಿ ವಿನಂತಿಸಿದೆ.

ಎಂಬತ್ತು ವರ್ಷಗಳ ಭಜನಾ ಪರಂಪರೆಯ ಈ ಸಾರ್ಥಕ ಹೆಜ್ಜೆ ಮುಂದಿನ ತಲೆಮಾರುಗಳಿಗೂ ಭಕ್ತಿ, ಶ್ರದ್ಧೆ ಮತ್ತು ಧಾರ್ಮಿಕ ಸಂಸ್ಕಾರವನ್ನು ಸಾರಲಿ ಎಂಬುದೇ ಭಕ್ತರ ಆಶಯ.