ಭಾರತೀಯ ರೈಲ್ವೆ ಪ್ರಯಾಣಿಕರ ಅನುಕೂಲಕ್ಕಾಗಿ ಹೊಸ ತಂತ್ರಜ್ಞಾನ ಆಧಾರಿತ ‘RailOne’ ಸೂಪರ್ ಆಯಪ್ ಅನ್ನು ಪರಿಚಯಿಸಿದೆ. ಈ ಹೊಸ ಆಯಪ್ನ ವಿಶೇಷತೆ ಏನೆಂದರೆ, ರೈಲು ಟಿಕೆಟ್ ಬುಕ್ ಮಾಡುವ ಮೊದಲೇ ಅದು ಕನ್ಫರ್ಮ್ ಆಗುವ ಸಾಧ್ಯತೆ ಎಷ್ಟು ಇದೆ ಎಂಬುದನ್ನು AI ತಂತ್ರಜ್ಞಾನ ಬಳಸಿ ಮುನ್ಸೂಚನೆ ನೀಡುತ್ತದೆ.
ಈ ಹಿಂದೆ ವೇಟಿಂಗ್ ಲಿಸ್ಟ್ ಟಿಕೆಟ್ ಬುಕ್ ಮಾಡಿದ ಬಳಿಕ ಅದು ಕನ್ಫರ್ಮ್ ಆಗುತ್ತದೆಯೇ ಎಂಬ ಆತಂಕ ಪ್ರಯಾಣಿಕರಲ್ಲಿ ಸಾಮಾನ್ಯವಾಗಿತ್ತು. ಆದರೆ ಈಗ RailOne ಆಯಪ್ ಮೂಲಕ ಟಿಕೆಟ್ ಬುಕ್ ಮಾಡುವ ಮುನ್ನವೇ ಕನ್ಫರ್ಮೇಶನ್ ಸಾಧ್ಯತೆಗಳನ್ನು ಶೇಕಡಾವಾರು ರೂಪದಲ್ಲಿ ತಿಳಿದುಕೊಳ್ಳಬಹುದು.
AI ತಂತ್ರಜ್ಞಾನದೊಂದಿಗೆ ನಿಖರ ಮುನ್ಸೂಚನೆ
ರೈಲ್ವೆ ಸಚಿವಾಲಯವು ಹಳೆಯ ‘RailConnect’ ಮತ್ತು ‘UTS’ ಆಯಪ್ಗಳ ಬದಲಿಗೆ RailOne ಎಂಬ ಹೊಸ ಸೂಪರ್ ಆಯಪ್ ಬಿಡುಗಡೆ ಮಾಡಿದೆ. AI (ಕೃತಕ ಬುದ್ಧಿಮತ್ತೆ) ಆಧಾರಿತ ವ್ಯವಸ್ಥೆ ಪ್ರಯಾಣದ ದಿನಾಂಕ, ರೈಲಿನ ಬೇಡಿಕೆ, ಹಿಂದಿನ ಡೇಟಾ ಸೇರಿದಂತೆ ಹಲವು ಅಂಶಗಳನ್ನು ವಿಶ್ಲೇಷಿಸಿ ಟಿಕೆಟ್ ಕನ್ಫರ್ಮ್ ಆಗುವ ಸಾಧ್ಯತೆಯನ್ನು ಅಂದಾಜು ಮಾಡುತ್ತದೆ.
ಈ ಹಿಂದೆ ಇಂತಹ ಮುನ್ಸೂಚನೆಗಳ ನಿಖರತೆ ಕೇವಲ ಶೇ.53 ರಷ್ಟಿದ್ದರೆ, ಇದೀಗ ಅದನ್ನು ಶೇ.94 ರ ಮಟ್ಟಿಗೆ ಹೆಚ್ಚಿಸಲಾಗಿದೆ ಎಂದು ರೈಲ್ವೆ ಇಲಾಖೆ ತಿಳಿಸಿದೆ. ಇದರಿಂದ ಪ್ರಯಾಣಿಕರು ಅನಗತ್ಯವಾಗಿ ವೇಟಿಂಗ್ ಲಿಸ್ಟ್ ಟಿಕೆಟ್ ಬುಕ್ ಮಾಡುವ ತೊಂದರೆ ತಪ್ಪಿಸಿಕೊಳ್ಳಬಹುದು.
RailOne ಆಯಪ್ನಲ್ಲಿ ಲಭ್ಯವಿರುವ ಪ್ರಮುಖ ಸೇವೆಗಳು
- ರಿಸರ್ವ್ಡ್ ಮತ್ತು ಅನ್-ರಿಸರ್ವ್ಡ್ ಟಿಕೆಟ್ ಬುಕ್ಕಿಂಗ್
- ಮೊಬೈಲ್ನಲ್ಲೇ ಪ್ಲಾಟ್ಫಾರ್ಮ್ ಟಿಕೆಟ್ ಸೌಲಭ್ಯ
- ಲೈವ್ ಟ್ರೈನ್ ಸ್ಟೇಟಸ್ ಮತ್ತು ಪ್ಲಾಟ್ಫಾರ್ಮ್ ಮಾಹಿತಿ
- ಸೀಟಿನಲ್ಲೇ ಆಹಾರ ಆರ್ಡರ್ ಮಾಡುವ ವ್ಯವಸ್ಥೆ
- ಒಂದೇ ಲಾಗಿನ್ ಮೂಲಕ ಎಲ್ಲಾ ಸೇವೆಗಳ ಬಳಕೆ (SSO)
ರೈಲ್ವೆ ಇಲಾಖೆ ಆಗಸ್ಟ್ 2026ರೊಳಗೆ ತನ್ನ ಪ್ಯಾಸೆಂಜರ್ ರಿಸರ್ವೇಶನ್ ಸಿಸ್ಟಮ್ (PRS) ಅನ್ನು ಸಂಪೂರ್ಣ ಆಧುನೀಕರಿಸಿ, RailOne ವೇದಿಕೆಯನ್ನು ಇನ್ನಷ್ಟು ವೇಗವಾಗಿ ಮತ್ತು ಪರಿಣಾಮಕಾರಿಯಾಗಿ ರೂಪಿಸಲು ಯೋಜಿಸಿದೆ.