ಮೂಡುಮರ್ನಾಡು : ಶ್ರೀ ಮಂಜುಶ್ರೀ ಭಜನಾ ಮಂಡಳಿ (ರಿ) ಮೂಡುಮರ್ನಾಡು ಇದರ ಆಶ್ರಯದಲ್ಲಿ ಶ್ರೀ ಕೃಷ್ಣ ಜನ್ಮಾಷ್ಟಮಿಯ ಪ್ರಯುಕ್ತ ವೈಭವದ ಮೊಸರು ಕುಡಿಕೆ ಹಾಗೂ ಸಾಂಪ್ರದಾಯಿಕ ಆಟೋಟ ಸ್ಪರ್ಧೆಗಳ ಕಾರ್ಯಕ್ರಮವು ಅತ್ಯಂತ ಸಡಗರ-ಸಂಭ್ರಮದಿಂದ ಜರುಗಿತು. ಕಾರ್ಯಕ್ರಮದ ಅಂಗವಾಗಿ ಸಾರ್ವಜನಿಕರಿಗೆ, ಯುವಕರಿಗೆ ಮತ್ತು ಮಕ್ಕಳಿಗೆ ವಿವಿಧ ರೀತಿಯ ಕ್ರೀಡಾ ಸ್ಪರ್ಧೆಗಳನ್ನು ಆಯೋಜಿಸಲಾಗಿತ್ತು.
ಕಾರ್ಯಕ್ರಮವನ್ನು ಉದ್ದೇಶಿಸಿ ಧರ್ಮಸ್ಥಳ ಸಮನ್ವಯ ಅಧಿಕಾರಿ ಸಂತೋಷ್ ಅವರು ಮಾತನಾಡಿ, “ಭಜನೆ ಎನ್ನುವುದು ಕೇವಲ ಶ್ರದ್ಧಾಭಕ್ತಿಯ ಮಾರ್ಗವಲ್ಲ; ಅದು ಇಡೀ ಸಮಾಜವನ್ನು ಒಂದಗೂಡಿಸುವ ದಿವ್ಯ ಶಕ್ತಿ. ಭಜನೆ ಇರುವಲ್ಲಿ ವಿಭಜನೆಗೆ ಅಥವಾ ಭೇದಭಾವಕ್ಕೆ ಜಾಗವೇ ಇರುವುದಿಲ್ಲ. ಸತ್ಸಂಗ ಮತ್ತು ಭಜನೆಗಳು ಮನಸ್ಸಿನಲ್ಲಿರುವ ಕಲ್ಮಷ ಹಾಗೂ ಅಹಂಕಾರವನ್ನು ದೂರ ಮಾಡಿ ಸೌಹಾರ್ದತೆಯನ್ನು ಬೆಳೆಸುತ್ತವೆ” ಎಂದು ಹೇಳಿದರು.
ಮುಂದುವರಿದು ಶ್ರೀ ಕೃಷ್ಣನ ಜೀವನ ಲೀಲೆಗಳನ್ನು ಸ್ಮರಿಸಿದ ಅವರು, “ಕೃಷ್ಣನ ಪ್ರತಿಯೊಂದು ಲೀಲೆಯೂ ನಮಗೆ ಧರ್ಮದ ಹಾದಿಯಲ್ಲಿ ನಡೆಯಲು ಮಾರ್ಗದರ್ಶನ ನೀಡುತ್ತದೆ. ಪ್ರಸ್ತುತ ಸಮಾಜದಲ್ಲಿ ಕೃಷ್ಣನ ಭೋದನೆಗಳನ್ನು ಬದುಕಿನಲ್ಲಿ ಅಳವಡಿಸಿಕೊಂಡಾಗ ಮಾತ್ರ ಜೀವನದಲ್ಲಿ ಶಾಂತಿ ಮತ್ತು ನೆಮ್ಮದಿ ಸಾಧ್ಯ” ಎಂದು ಅಭಿಪ್ರಾಯಪಟ್ಟರು.
”ಒಗ್ಗಟ್ಟು ಮತ್ತು ಸಾಧನೆಯ ಸಂಕೇತ ಮೊಸರು ಕುಡಿಕೆ”: ನ್ಯಾಯವಾದಿ ರೂಪ ಬಳ್ಳಾಲ್
ಕಾರ್ಯಕ್ರಮದ ಮುಖ್ಯ ಅಭ್ಯಾಗತರಾಗಿ ಭಾಗವಹಿಸಿ ಮಾತನಾಡಿದ ಮೂಡಬಿದ್ರೆಯ ಖ್ಯಾತ ನ್ಯಾಯವಾದಿ ರೂಪ ಬಳ್ಳಾಲ್ ಅವರು, “ಶ್ರೀ ಕೃಷ್ಣನ ಬಾಲ್ಯದ ಲೀಲೆಗಳು ಮತ್ತು ಆತನ ಗೀತೋಪದೇಶಗಳು ಇಂದಿನ ಯುವಜನತೆಗೆ ದೊಡ್ಡ ಪ್ರೇರಣೆಯಾಗಿದೆ. ಜೀವನದಲ್ಲಿ ಎಷ್ಟೇ ಕಷ್ಟಗಳು ಎದುರಾದರೂ ಧರ್ಮದ ದಾರಿಯಲ್ಲಿದ್ದು, ಮುಗುಳ್ನಗುತ್ತಲೇ ಆ ಸವಾಲುಗಳನ್ನು ಸ್ವೀಕರಿಸಿ ಮುನ್ನಡೆಯುವುದನ್ನು ಕೃಷ್ಣನ ಜೀವನ ನಮಗೆ ಕಲಿಸಿಕೊಡುತ್ತದೆ” ಎಂದರು.
ಮೊಸರು ಕುಡಿಕೆ ಆಚರಣೆಯ ತತ್ತ್ವವನ್ನು ವಿಸ್ತೃತವಾಗಿ ವಿವರಿಸಿ, “ಮೊಸರು ಕುಡಿಕೆ ಎನ್ನುವುದು ಬರೀ ವಿನೋದದ ಆಟವಲ್ಲ. ಅದು ಯುವಜನತೆಯಲ್ಲಿ ಒಗ್ಗಟ್ಟು, ಸಾಹಸ ಪ್ರವೃತ್ತಿ ಮತ್ತು ಪರಸ್ಪರ ಸಹಕಾರ ಮನೋಭಾವವನ್ನು ಬೆಳೆಸುವ ಅದ್ಭುತ ಸಂಕೇತ. ಎಷ್ಟೇ ಎತ್ತರದಲ್ಲಿದ್ದ ಗುರಿಯನ್ನು (ಮಡಕೆ) ತಲುಪಬೇಕಾದರೂ ಎಲ್ಲರೂ ಒಂದಾಗಿ, ಒಬ್ಬರಿಗೊಬ್ಬರು ಆಸರೆಯಾಗಿ ನಿಂತಾಗ ಮಾತ್ರ ಆ ಗುರಿಯನ್ನು ಸಾಧಿಸಲು ಸಾಧ್ಯ. ಅದೇ ರೀತಿ ಸಮಾಜದಲ್ಲಿ ಕಷ್ಟದಲ್ಲಿರುವವರನ್ನು, ನೊಂದವರನ್ನು ಕೈಹಿಡಿದು ಮೇಲೆತ್ತುವ ಜವಾಬ್ದಾರಿಯನ್ನೂ ಈ ಆಚರಣೆ ನಮಗೆ ನೆನಪಿಸುತ್ತದೆ” ಎಂದು ಉಲ್ಲೇಖಿಸಿದರು.
ಈ ಸಂದರ್ಭದಲ್ಲಿ ಮಂಜುಶ್ರೀ ಭಜನಾ ಮಂಡಳಿಯ ಅಧ್ಯಕ್ಷರಾದ ಮೋಹನ್ ಸ್ಥಾಪಕ ಅಧ್ಯಕ್ಷರು ನೀಲಯ ಬಂಡಾರಿ, ಯಶೋಧರ, ಫಣಿರಾಜ್ ಜೈನ್, ನಾಗಶ್ರೀ, ಶಾಂತ, ఆಶಾ ಹಾಗೂ ಭಜನಾ ಮಂಡಳಿಯ ಸದಸ್ಯರು ಮತ್ತು ಊರಿನ ಸಮಸ್ತ ಬಂಧುಗಳು ಉಪಸ್ಥಿತರಿದ್ದರು.
ಕಾರ್ಯಕ್ರಮದ ನಿರೂಪಣೆಯನ್ನು ರಾಜೇಶ್ ಆಚಾರ್ಯ ಅವರು ಅತ್ಯಂತ ಸೊಗಸಾಗಿ ನಡೆಸಿಕೊಟ್ಟರು. ಸ್ಪರ್ಧೆಗಳಲ್ಲಿ ವಿಜೇತರಾದ ಸ್ಪರ್ಧಿಗಳಿಗೆ ಬಹುಮಾನ ವಿತರಣೆಯೊಂದಿಗೆ ಕಾರ್ಯಕ್ರಮವು ಯಶಸ್ವಿಯಾಗಿ ಮುಕ್ತಾಯಗೊಂಡಿತು.