ಬೆಂಗಳೂರು : ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಬಹುನಿರೀಕ್ಷಿತ ‘ಟಾಕ್ಸಿಕ್’ ಸಿನಿಮಾ ಬಿಡುಗಡೆಯಾಗಿ ಒಂದು ವಾರ ಪೂರ್ಣಗೊಂಡಿದ್ದು, ಚಿತ್ರಕ್ಕೆ ಪ್ರೇಕ್ಷಕರಿಂದ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಇದರ ಪರಿಣಾಮ ಬಾಕ್ಸ್ ಆಫೀಸ್ ಗಳಿಕೆಯ ಮೇಲೂ ಕಂಡುಬಂದಿದೆ. ಭರ್ಜರಿ ಆರಂಭ ಪಡೆದಿದ್ದ ಸಿನಿಮಾ ಬಳಿಕದ ದಿನಗಳಲ್ಲಿ ನಿಧಾನಗತಿಯ ಕಲೆಕ್ಷನ್ ಕಂಡಿದೆ.
ಚಿತ್ರವು ಬಿಡುಗಡೆಯಾದ ಮೊದಲ ದಿನವೇ ಭಾರತದಲ್ಲಿ ₹101.10 ಕೋಟಿ ನೆಟ್ ಗಳಿಸುವ ಮೂಲಕ ಭರ್ಜರಿ ಆರಂಭ ಕಂಡಿತ್ತು. ಎರಡನೇ ದಿನ ₹37.65 ಕೋಟಿ, ಮೂರನೇ ದಿನ ₹27.20 ಕೋಟಿ, ನಾಲ್ಕನೇ ದಿನ ₹25.15 ಕೋಟಿ ಹಾಗೂ ಐದನೇ ದಿನ ₹23 ಕೋಟಿ ಗಳಿಸಿದೆ.
ಆರನೇ ದಿನ ಕೆಲಸದ ದಿನವಾಗಿದ್ದರಿಂದ ಕಲೆಕ್ಷನ್ ಗಣನೀಯವಾಗಿ ಇಳಿಕೆಯಾಗಿ ₹7.65 ಕೋಟಿಗೆ ತಲುಪಿತ್ತು. ಏಳನೇ ದಿನ ಶೇ.2.6ರಷ್ಟು ಚೇತರಿಕೆ ಕಂಡು ₹7.85 ಕೋಟಿ ಗಳಿಸಿದೆ.
ಈ ಮೂಲಕ ‘ಟಾಕ್ಸಿಕ್’ ಸಿನಿಮಾ ಭಾರತದಲ್ಲಿ ಏಳು ದಿನಗಳಲ್ಲಿ ₹229.60 ಕೋಟಿ ನೆಟ್ ಕಲೆಕ್ಷನ್ ಮಾಡಿದೆ. ಚಿತ್ರದ ಭಾರತದ ಒಟ್ಟು ಗ್ರಾಸ್ ಗಳಿಕೆ ₹274.25 ಕೋಟಿ ತಲುಪಿದೆ.
ವಿದೇಶದಲ್ಲೂ ಯಶ್ ಸಿನಿಮಾಗೆ ಉತ್ತಮ ಪ್ರತಿಕ್ರಿಯೆ
ವಿದೇಶಿ ಮಾರುಕಟ್ಟೆಯಲ್ಲೂ ‘ಟಾಕ್ಸಿಕ್’ ಚಿತ್ರಕ್ಕೆ ಉತ್ತಮ ಬೆಂಬಲ ದೊರೆತಿದೆ. ಏಳನೇ ದಿನ ವಿದೇಶಗಳಲ್ಲಿ ₹1.50 ಕೋಟಿ ಗಳಿಸಿರುವ ಸಿನಿಮಾ, ಈವರೆಗೆ ಒಟ್ಟು ₹40.75 ಕೋಟಿ ಗ್ರಾಸ್ ಕಲೆಕ್ಷನ್ ಮಾಡಿದೆ.
ಭಾರತ ಹಾಗೂ ವಿದೇಶಿ ಮಾರುಕಟ್ಟೆಗಳ ಗಳಿಕೆಯನ್ನು ಒಟ್ಟುಗೂಡಿಸಿದರೆ, ‘ಟಾಕ್ಸಿಕ್’ ಸಿನಿಮಾ ಮೊದಲ ವಾರದಲ್ಲಿ ವಿಶ್ವದಾದ್ಯಂತ ₹315 ಕೋಟಿ ಗ್ರಾಸ್ ಕಲೆಕ್ಷನ್ ಮಾಡಿದ್ದು, 300 ಕೋಟಿ ರೂಪಾಯಿಯ ಮೈಲಿಗಲ್ಲು ದಾಟಿದೆ.
ಚಿತ್ರದ ಮುಂದಿನ ದಿನಗಳ ಗಳಿಕೆ ಹೇಗಿರಲಿದೆ ಎಂಬುದು ಕುತೂಹಲ ಮೂಡಿಸಿದ್ದು, ಇದೇ ವೇಗ ಮುಂದುವರಿದರೆ ‘ಟಾಕ್ಸಿಕ್’ ಚಿತ್ರದ ಅಂತಿಮ ಕಲೆಕ್ಷನ್ ₹400 ಕೋಟಿಯ ಆಸುಪಾಸಿಗೆ ತಲುಪುವ ಸಾಧ್ಯತೆ ಇದೆ ಎಂದು ಅಂದಾಜಿಸಲಾಗಿದೆ.