ಪಡುಬಿದ್ರಿ: “ಪ್ರಾಮಾಣಿಕರಿಗಿದು ಕಾಲವಲ್ಲ” ಎಂಬ ಮಾತು ಸಾಮಾನ್ಯವಾಗಿ ಕೇಳಿಬರುತ್ತದೆ. ಆದರೆ ಇಂದಿನ ದಿನಗಳಲ್ಲಿಯೂ ಪ್ರಾಮಾಣಿಕತೆ ಜೀವಂತವಾಗಿಯೇ ಇದೆ ಎಂಬುದಕ್ಕೆ ಪಡುಬಿದ್ರಿಯಲ್ಲಿ ನಡೆದ ಘಟನೆಯೊಂದು ಸ್ಪಷ್ಟ ಸಾಕ್ಷಿಯಾಗಿದೆ.
ಮೇ 3, 2026ರ ಭಾನುವಾರ ಬೆಳಿಗ್ಗೆ ಸುಮಾರು 10 ಗಂಟೆಯ ವೇಳೆ ಮುಂಬೈನ ಕೃಷ್ಣ ವಿ. ಶೆಟ್ಟಿ ಮತ್ತು ಕಲ್ಪನಾ ಶೆಟ್ಟಿ ದಂಪತಿಗಳು ಪಡುಬಿದ್ರಿಯ ವಿಜಯ ಭವನ ಹೋಟೆಲ್ಗೆ ಬೆಳಗಿನ ಉಪಹಾರಕ್ಕಾಗಿ ಭೇಟಿ ನೀಡಿದ್ದರು. ಉಪಹಾರ ಮುಗಿಸಿ ಹೊರಟಾಗ, ಅವರು ತಮ್ಮ ಪರ್ಸ್ ಅನ್ನು ಅಲ್ಲಿಯೇ ಮರೆತು ಹೋಗಿದ್ದರು.
ಆ ಪರ್ಸ್ನಲ್ಲಿ ಕುಟುಂಬದ ನಾಗದೇವರ ಪೂಜಾ ಕಾರ್ಯಕ್ಕಾಗಿ ತಂದಿದ್ದ ರೂ. 56,000 ನಗದು ಹಣವಿತ್ತು. ವಿಷಯ ತಿಳಿದು ಆತಂಕಗೊಂಡ ದಂಪತಿಗಳು ತಕ್ಷಣವೇ ಹೋಟೆಲಿಗೆ ಮರಳಿ ಬಂದು ವಿಚಾರಿಸಿದರು.
ಈ ಸಂದರ್ಭದಲ್ಲಿ ವಿಜಯ ಭವನದ ಯಜಮಾನರು ಮತ್ತು ಸಿಬ್ಬಂದಿ ವರ್ಗವು ಪ್ರಾಮಾಣಿಕತೆ ತೋರಿಸಿ, ಹಣವಿದ್ದ ಪರ್ಸ್ ಅನ್ನು ಸುರಕ್ಷಿತವಾಗಿ ಹಿಂತಿರುಗಿಸಿದರು. ಇದರಿಂದ ಸಂತೋಷಗೊಂಡ ದಂಪತಿಗಳು ಹೋಟೆಲ್ ಸಿಬ್ಬಂದಿಯನ್ನು ಹೃದಯಪೂರ್ವಕವಾಗಿ ಅಭಿನಂದಿಸಿದರು.
“ಇಂದಿನ ಕಾಲದಲ್ಲೂ ಮಾನವೀಯ ಮೌಲ್ಯಗಳು ಮತ್ತು ಪ್ರಾಮಾಣಿಕತೆ ಜೀವಂತವಾಗಿವೆ. ಇದು ದೇವರ ಕೃಪೆ ಮತ್ತು ಜನರ ನೈತಿಕತೆಯ ಪ್ರತೀಕ,” ಎಂದು ಮುಂಬೈ ಪೊಲೀಸ್ ಆಗಿರುವ ಕೃಷ್ಣ ವಿ. ಶೆಟ್ಟಿ ಅಭಿಪ್ರಾಯಪಟ್ಟರು.