ಮಂಗಳೂರು : ಹೊಸ ಉತ್ಪನ್ನಗಳನ್ನು ಮಾರಾಟ ಮಾಡುವಾಗ ತೋರುವ ಉತ್ಸಾಹವನ್ನು ರಿಪೇರಿ ಸೇವೆ ನೀಡುವಾಗ ತೋರದೆ, ವರ್ಲ್ಪೂಲ್ (Whirlpool) ಕಂಪನಿಯು ದಕ್ಷಿಣ ಕನ್ನಡದ ಗ್ರಾಹಕರನ್ನು ಸತಾಯಿಸುತ್ತಿರುವ ಗಂಭೀರ ಸೇವಾ ನ್ಯೂನತೆ ಬೆಳಕಿಗೆ ಬಂದಿದೆ.
ಇಲ್ಲಿನ ಗ್ರಾಹಕರೊಬ್ಬರು ಖರೀದಿಸಿದ್ದ ಹೊಸ ಫ್ರೋಸ್ಟ್-ಫ್ರೀ ರೆಫ್ರಿಜರೇಟರ್ (Model: NDT23523FAQGNCPE) ತಾಂತ್ರಿಕ ದೋಷದಿಂದ ಕೈಕೊಟ್ಟಿದೆ.
ಸಮಸ್ಯೆಯ ಕುರಿತು ಈಗಾಗಲೇ ಕಂಪನಿಯ ಗ್ರಾಹಕ ಸೇವಾ ಕೇಂದ್ರಕ್ಕೆ ದೂರನ್ನು ದಾಖಲಿಸಿ, ಸೇವಾ ವಿನಂತಿ ಸಂಖ್ಯೆ (MAN04072617058) ಪಡೆದು, ನಾಲ್ಕಕ್ಕೂ ಹೆಚ್ಚು ಬಾರಿ ಸಂಪರ್ಕಿಸಿದರೂ ಕಂಪನಿ ಕನಿಷ್ಠ ಸ್ಪಂದನೆ ನೀಡಿಲ್ಲ.
ಕಂಪ್ರೆಸರ್ ಮೇಲೆ 10 ವರ್ಷಗಳ ವಾರಂಟಿ ಪ್ರಚಾರ ಮಾಡುವ ಕಂಪನಿಯಲ್ಲಿ, ಗ್ರಾಹಕರು ಶುಲ್ಕ ನೀಡಲು ಸಿದ್ಧರಿದ್ದರೂ ಸಮಸ್ಯೆಯನ್ನು ಬಗೆಹರಿಸಲು ಅರ್ಹ ತಂತ್ರಜ್ಞರೇ ಇಲ್ಲದಂತಾಗಿದೆ.
ತ್ವರಿತ ಹಾಗೂ ಗುಣಮಟ್ಟದ ಸೇವೆ ನೀಡುವುದು ಕಂಪನಿಯ ಕಾನೂನಾತ್ಮಕ ಕರ್ತವ್ಯವಾಗಿದ್ದು, ಇದರಲ್ಲಿ ವಿಫಲವಾಗಿರುವ ಕಂಪನಿಯ ವಿರುದ್ಧ ಗ್ರಾಹಕರು ನ್ಯಾಯಾಲಯದ ಮೊರೆ ಹೋಗಲು ಸಿದ್ಧರಾಗಿದ್ದಾರೆ.
ಗ್ರಾಹಕರಿಗೊಂದು ಗಂಭೀರ ಎಚ್ಚರಿಕೆ ಸಂದೇಶ!
”ಗ್ರಾಹಕರೇ ಎಚ್ಚರ! ಯಾವುದೇ ಕಂಪನಿಯ ಪ್ರಸಿದ್ಧ ಹೆಸರು ಅಥವಾ ಆಕರ್ಷಕ ಜಾಹೀರಾತುಗಳನ್ನು ನೋಡಿ ಮೋಸ ಹೋಗಬೇಡಿ. ವಸ್ತುಗಳನ್ನು ಖರೀದಿಸುವ ಮುನ್ನ ಆ ಕಂಪನಿಯು ನಿಮ್ಮ ಭಾಗದಲ್ಲಿ ‘ಮಾರಾಟದ ನಂತರದ ಸೇವೆ’ (After Sales Service) ಮತ್ತು ನುರಿತ ತಂತ್ರಜ್ಞರ ವ್ಯವಸ್ಥೆಯನ್ನು ಹೊಂದಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಿ. ಗ್ರಾಹಕ ಹಕ್ಕುಗಳನ್ನು ಕೇವಲ ಭರವಸೆಗಳ ಮೂಲಕ ಧ್ವಂಸಗೊಳಿಸುವ ಇಂತಹ ಬೇಜವಾಬ್ದಾರಿ ಕಂಪನಿಗಳ ವಿರುದ್ಧ ಸಾರ್ವಜನಿಕರು ಒಗ್ಗಟ್ಟಾಗಿ ಜಾಗೃತರಾಗಬೇಕಿದೆ. ವಂಚನೆಯಾದಾಗ ಸುಮ್ಮನೆ ಕೂರದೆ ತಕ್ಷಣ ರಾಷ್ಟ್ರೀಯ ಗ್ರಾಹಕ ಸಹಾಯವಾಣಿ ಅಥವಾ ಗ್ರಾಹಕ ವೇದಿಕೆಗೆ ದೂರು ನೀಡಿ ನಿಮ್ಮ ಹಕ್ಕನ್ನು ಚಲಾಯಿಸಿ.”
ವರದಿ-ನರಸಿಂಹ