ನವದೆಹಲಿ : 2026ರ ನವೆಂಬರ್ ತಿಂಗಳಲ್ಲಿ ದೀಪಾವಳಿ, ಬಲಿಪಾಡ್ಯಮಿ, ಕನಕದಾಸ ಜಯಂತಿ ಸೇರಿದಂತೆ ವಿವಿಧ ಹಬ್ಬಗಳು ಹಾಗೂ ವಾರಾಂತ್ಯದ ರಜೆಗಳ ಹಿನ್ನೆಲೆಯಲ್ಲಿ ಬ್ಯಾಂಕ್‌ಗಳಿಗೆ ಹಲವು ದಿನ ರಜೆ ಇರಲಿದೆ. ದೇಶದ ವಿವಿಧ ರಾಜ್ಯಗಳಲ್ಲಿ ಪ್ರಾದೇಶಿಕ ಹಬ್ಬಗಳ ಆಧಾರದ ಮೇಲೆ ಬ್ಯಾಂಕ್ ರಜಾದಿನಗಳು ಬದಲಾಗಲಿದ್ದು, ಕರ್ನಾಟಕದಲ್ಲಿ ಒಟ್ಟು 8 ದಿನ ಬ್ಯಾಂಕ್‌ಗಳು ಕಾರ್ಯನಿರ್ವಹಿಸುವುದಿಲ್ಲ ಎಂದು ಪ್ರಕಟಿತ ರಜಾಪಟ್ಟಿಯಲ್ಲಿ ತಿಳಿಸಲಾಗಿದೆ.
ನವೆಂಬರ್ 1 ಮತ್ತು 8ರಂದು ಭಾನುವಾರದ ರಜೆ ಇರಲಿದೆ. ನವೆಂಬರ್ 9ರಂದು ದೀಪಾವಳಿ, ಲಕ್ಷ್ಮೀ ಪೂಜೆ ಹಾಗೂ ಗೋವರ್ಧನ ಪೂಜೆಯ ಪ್ರಯುಕ್ತ ಹಲವು ರಾಜ್ಯಗಳಲ್ಲಿ ಬ್ಯಾಂಕ್‌ಗಳಿಗೆ ರಜೆ ಇರಲಿದೆ. ನವೆಂಬರ್ 10ರಂದು ದೀಪಾವಳಿ ಮತ್ತು ಬಲಿಪಾಡ್ಯಮಿ ಹಿನ್ನೆಲೆಯಲ್ಲಿ ಕರ್ನಾಟಕ ಸೇರಿದಂತೆ ಹಲವು ರಾಜ್ಯಗಳಲ್ಲಿ ಬ್ಯಾಂಕ್‌ಗಳು ಬಂದ್ ಆಗಲಿವೆ.
ನವೆಂಬರ್ 11ರಂದು ಭಾಯ್ ದೂಜ್, ನಿಂಗೋಲ್ ಚಕ್ಕೋಬಾ ಹಾಗೂ ಚಿತ್ರಗುಪ್ತ ಜಯಂತಿಯ ಹಿನ್ನೆಲೆಯಲ್ಲಿ ಕೆಲವು ರಾಜ್ಯಗಳಲ್ಲಿ ರಜೆ ಇರಲಿದೆ. ನವೆಂಬರ್ 14ರಂದು ಎರಡನೇ ಶನಿವಾರ ಮತ್ತು ನವೆಂಬರ್ 15ರಂದು ಭಾನುವಾರದ ರಜೆ ಇರಲಿದೆ.
ಇನ್ನು ನವೆಂಬರ್ 13ರಂದು ಮೇಘಾಲಯದಲ್ಲಿ ವಂಗಲ ಉತ್ಸವ, ನವೆಂಬರ್ 16ರಂದು ಬಿಹಾರ ಮತ್ತು ಜಾರ್ಖಂಡ್‌ನಲ್ಲಿ ಛಾತ್ ಪೂಜೆ ಹಾಗೂ ನವೆಂಬರ್ 20ರಂದು ಉತ್ತರಾಖಂಡದಲ್ಲಿ ಇಗಸ್ ಬಾಗವಲ್ ಹಿನ್ನೆಲೆಯಲ್ಲಿ ಬ್ಯಾಂಕ್‌ಗಳಿಗೆ ರಜೆ ಇರಲಿದೆ.
ನವೆಂಬರ್ 22ರಂದು ಭಾನುವಾರದ ರಜೆ ಇರಲಿದ್ದು, ನವೆಂಬರ್ 23ರಂದು ಮೇಘಾಲಯದಲ್ಲಿ ಸೆಂಗ್ ಕುಟ್ ಸ್ನೆಮ್ ಹಬ್ಬದ ಪ್ರಯುಕ್ತ ಬ್ಯಾಂಕ್‌ಗಳು ಬಂದ್ ಆಗಲಿವೆ. ನವೆಂಬರ್ 24ರಂದು ಗುರು ನಾನಕ್ ಜಯಂತಿ ಮತ್ತು ಕಾರ್ತಿಕ ಪೂರ್ಣಿಮೆಯ ಹಿನ್ನೆಲೆಯಲ್ಲಿ ಕೆಲವು ರಾಜ್ಯಗಳಲ್ಲಿ ರಜೆ ಇರಲಿದೆ. ನವೆಂಬರ್ 27ರಂದು ಕನಕದಾಸ ಜಯಂತಿ ಹಾಗೂ ನವೆಂಬರ್ 29ರಂದು ಭಾನುವಾರದ ರಜೆ ಇರಲಿದೆ.
ಕರ್ನಾಟಕದಲ್ಲಿ ನವೆಂಬರ್ ತಿಂಗಳ ಬ್ಯಾಂಕ್ ರಜೆಗಳ ಪಟ್ಟಿ
ಕರ್ನಾಟಕದಲ್ಲಿ ನವೆಂಬರ್ ತಿಂಗಳಲ್ಲಿ ಬ್ಯಾಂಕ್‌ಗಳಿಗೆ ಒಟ್ಟು 8 ದಿನ ರಜೆ ಇರಲಿದೆ. ರಜಾದಿನಗಳ ವಿವರ ಹೀಗಿದೆ:
- ನವೆಂಬರ್ 1, ಭಾನುವಾರ: ವಾರದ ರಜೆ
- ನವೆಂಬರ್ 8, ಭಾನುವಾರ: ವಾರದ ರಜೆ
- ನವೆಂಬರ್ 10, ಮಂಗಳವಾರ: ದೀಪಾವಳಿ, ಬಲಿಪಾಡ್ಯಮಿ
- ನವೆಂಬರ್ 14, ಶನಿವಾರ: ಎರಡನೇ ಶನಿವಾರ
- ನವೆಂಬರ್ 15, ಭಾನುವಾರ: ವಾರದ ರಜೆ
- ನವೆಂಬರ್ 22, ಭಾನುವಾರ: ವಾರದ ರಜೆ
- ನವೆಂಬರ್ 27, ಶುಕ್ರವಾರ: ಕನಕದಾಸ ಜಯಂತಿ
- ನವೆಂಬರ್ 29, ಭಾನುವಾರ: ವಾರದ ರಜೆ
ಆನ್‌ಲೈನ್ ಬ್ಯಾಂಕಿಂಗ್ ಸೇವೆಗಳು ಲಭ್ಯ
ಬ್ಯಾಂಕ್ ರಜಾದಿನಗಳಲ್ಲಿ ಶಾಖೆಗಳು ಮುಚ್ಚಿದ್ದರೂ, ಬಹುತೇಕ ಡಿಜಿಟಲ್ ಬ್ಯಾಂಕಿಂಗ್ ಸೇವೆಗಳು ಲಭ್ಯವಿರುತ್ತವೆ. ಗ್ರಾಹಕರು ಯುಪಿಐ, ಇಂಟರ್‌ನೆಟ್ ಬ್ಯಾಂಕಿಂಗ್, ಮೊಬೈಲ್ ಬ್ಯಾಂಕಿಂಗ್ ಹಾಗೂ ಎಟಿಎಂ ಸೇವೆಗಳನ್ನು ಬಳಸಬಹುದು. ಆದರೆ ಚೆಕ್ ಕ್ಲಿಯರೆನ್ಸ್ ಮತ್ತು ಶಾಖೆಯಲ್ಲಿ ನಡೆಯುವ ಕೆಲವು ವಹಿವಾಟುಗಳು ರಜೆಯ ಕಾರಣದಿಂದ ವಿಳಂಬವಾಗುವ ಸಾಧ್ಯತೆ ಇದೆ.
ಆದ್ದರಿಂದ ಹಣಕಾಸಿನ ವಹಿವಾಟುಗಳು, ಚೆಕ್‌ಗಳ ಜಮೆ ಹಾಗೂ ಇತರ ಬ್ಯಾಂಕಿಂಗ್ ಕೆಲಸಗಳನ್ನು ಮುಂಚಿತವಾಗಿ ಯೋಜಿಸಿಕೊಳ್ಳುವುದು ಉತ್ತಮ. ಗ್ರಾಹಕರು ತಮ್ಮ ಬ್ಯಾಂಕ್ ಅಥವಾ ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್‌ಬಿಐ) ಪ್ರಕಟಿಸಿರುವ ಅಧಿಕೃತ ರಜಾಪಟ್ಟಿಯನ್ನು ಪರಿಶೀಲಿಸಿ ವಹಿವಾಟು ನಡೆಸುವುದು ಸೂಕ್ತ.