ಕೋಟ : ರೋಟರಿ ಕ್ಲಬ್ ಆಫ್ ಕೋಟ ಸಾಲಿಗ್ರಾಮದ ಸದಸ್ಯರಾದ ರೊಟೇರಿಯನ್ ತಿಮ್ಮ ಪೂಜಾರಿ ಅವರನ್ನು ರೋಟರಿ ಇಂಟರ್ನ್ಯಾಷನಲ್ ಜಿಲ್ಲೆ 3182ರ ವಲಯ-2ರ ಸಹಾಯಕ ಗವರ್ನರ್ ಆಗಿ 2027-28ನೇ ಸಾಲಿನ ರೋಟರಿ ವರ್ಷಕ್ಕೆ ನೇಮಕ ಮಾಡಲಾಗಿದೆ.
ರೋಟರಿ ಇಂಟರ್ನ್ಯಾಷನಲ್ ಜಿಲ್ಲೆ 3182ರ 2027-28ನೇ ಸಾಲಿನ ಜಿಲ್ಲಾ ಗವರ್ನರ್ ಪಿ.ಎಚ್.ಎಸ್.ಎಂ. ರೊಟೇರಿಯನ್ ವಸಂತ್ ಹೋಬಳಿದಾರ್ ಅವರು ತಿಮ್ಮ ಪೂಜಾರಿ ಅವರ ನೇಮಕಾತಿಯನ್ನು ಅಧಿಕೃತವಾಗಿ ಘೋಷಿಸಿದ್ದಾರೆ.
ರೋಟರಿ ಸಂಸ್ಥೆಯ ವಿವಿಧ ಚಟುವಟಿಕೆಗಳಲ್ಲಿ ತಿಮ್ಮ ಪೂಜಾರಿ ಅವರು ನೀಡಿರುವ ಸೇವೆ, ನಾಯಕತ್ವ ಗುಣಗಳು ಹಾಗೂ ಸಮಾಜಮುಖಿ ಕಾರ್ಯಗಳಲ್ಲಿ ತೋರಿರುವ ಬದ್ಧತೆಯನ್ನು ಪರಿಗಣಿಸಿ ಅವರಿಗೆ ಈ ಮಹತ್ವದ ಜವಾಬ್ದಾರಿ ನೀಡಲಾಗಿದೆ ಎಂದು ನೇಮಕಾತಿ ಪತ್ರದಲ್ಲಿ ತಿಳಿಸಲಾಗಿದೆ.
ಸಹಾಯಕ ಗವರ್ನರ್ ಆಗಿ ತಿಮ್ಮ ಪೂಜಾರಿ ಅವರು ಜಿಲ್ಲಾ ಗವರ್ನರ್ ತಂಡ ಹಾಗೂ ವಲಯ-2ಕ್ಕೆ ಒಳಪಡುವ ರೋಟರಿ ಕ್ಲಬ್ಗಳ ನಡುವಿನ ಪ್ರಮುಖ ಕೊಂಡಿಯಾಗಿ ಕಾರ್ಯನಿರ್ವಹಿಸಲಿದ್ದಾರೆ. ವಲಯದ ವ್ಯಾಪ್ತಿಯಲ್ಲಿರುವ ರೋಟರಿ ಕ್ಲಬ್ಗಳ ಅಧ್ಯಕ್ಷರು ಹಾಗೂ ಆಡಳಿತ ಮಂಡಳಿಗಳಿಗೆ ಮಾರ್ಗದರ್ಶನ ನೀಡುವುದು, ವಾರ್ಷಿಕ ಗುರಿಗಳನ್ನು ಸಾಧಿಸಲು ಅಗತ್ಯ ಸಹಕಾರ ಒದಗಿಸುವುದು ಹಾಗೂ ಕ್ಲಬ್ಗಳ ಕಾರ್ಯಚಟುವಟಿಕೆಗಳನ್ನು ಮತ್ತಷ್ಟು ಪರಿಣಾಮಕಾರಿಯಾಗಿಸಲು ನೆರವಾಗುವುದು ಅವರ ಪ್ರಮುಖ ಜವಾಬ್ದಾರಿಗಳಾಗಿವೆ.
ಇದರೊಂದಿಗೆ ರೋಟರಿ ಸದಸ್ಯತ್ವ ವೃದ್ಧಿ, ರೋಟರಿ ಫೌಂಡೇಶನ್ಗೆ ಕೊಡುಗೆ ಹೆಚ್ಚಿಸುವುದು, ಜಿಲ್ಲಾ ನಾಯಕತ್ವ ಮತ್ತು ಕ್ಲಬ್ಗಳ ನಡುವೆ ಸಮರ್ಪಕ ಸಂವಹನ ಕಲ್ಪಿಸುವುದು ಹಾಗೂ ಕ್ಲಬ್ಗಳ ಕಾರ್ಯಯೋಜನೆಗಳ ಅನುಷ್ಠಾನಕ್ಕೆ ಸಹಕರಿಸುವ ಜವಾಬ್ದಾರಿಯೂ ಅವರ ಮೇಲಿರಲಿದೆ.
ಜಿಲ್ಲಾ ಗವರ್ನರ್ ಅವರ ಅಧಿಕೃತ ಕ್ಲಬ್ ಭೇಟಿಗಳನ್ನು ಸಂಯೋಜಿಸುವುದು, ವಲಯ ಮಟ್ಟದ ಕಾರ್ಯಕ್ರಮಗಳು ಹಾಗೂ ಜಂಟಿ ಕ್ಲಬ್ ಸಭೆಗಳಿಗೆ ಸಹಕಾರ ನೀಡುವುದು ಸೇರಿದಂತೆ ಹಲವು ಪ್ರಮುಖ ಕಾರ್ಯಗಳನ್ನು ಅವರು ನಿರ್ವಹಿಸಲಿದ್ದಾರೆ. ಅಲ್ಲದೆ, ವಲಯ ಮತ್ತು ಜಿಲ್ಲಾ ಮಟ್ಟದಲ್ಲಿ ನಡೆಯುವ ತರಬೇತಿ ಕಾರ್ಯಕ್ರಮಗಳು, ಸೆಮಿನಾರ್ಗಳು, ಅಸೆಂಬ್ಲಿಗಳು, ವಿವಿಧ ಸೇವಾ ಕಾರ್ಯಕ್ರಮಗಳು ಹಾಗೂ ಜಿಲ್ಲಾ ಸಮ್ಮೇಳನಗಳಲ್ಲಿ ಸಕ್ರಿಯವಾಗಿ ಭಾಗವಹಿಸಿ ಅವುಗಳ ಯಶಸ್ಸಿಗೆ ಸಹಕರಿಸಲಿದ್ದಾರೆ.
ಸಮಾಜಮುಖಿ ಸೇವೆ, ನಾಯಕತ್ವ ಹಾಗೂ ಸಂಘಟನಾ ಚಟುವಟಿಕೆಗಳಲ್ಲಿ ತಿಮ್ಮ ಪೂಜಾರಿ ಅವರ ಅನುಭವವು ವಲಯ-2ರ ರೋಟರಿ ಕ್ಲಬ್ಗಳ ಪ್ರಗತಿಗೆ ಸಹಕಾರಿಯಾಗಲಿದೆ ಎಂಬ ವಿಶ್ವಾಸವನ್ನು ಜಿಲ್ಲಾ ಗವರ್ನರ್ ವಸಂತ್ ಹೋಬಳಿದಾರ್ ವ್ಯಕ್ತಪಡಿಸಿದ್ದಾರೆ. ‘ಸೇವೆಯೇ ಶ್ರೇಷ್ಠ’ ಎಂಬ ರೋಟರಿಯ ಧ್ಯೇಯವನ್ನು ಮುಂದಿಟ್ಟುಕೊಂಡು ಅವರು ತಮ್ಮ ಜವಾಬ್ದಾರಿಯನ್ನು ಯಶಸ್ವಿಯಾಗಿ ನಿರ್ವಹಿಸಲಿದ್ದಾರೆ ಎಂದು ಅವರು ಶುಭ ಹಾರೈಸಿದ್ದಾರೆ.
ಪ್ರತಿಷ್ಠಿತ ಜವಾಬ್ದಾರಿಗೆ ತಿಮ್ಮ ಪೂಜಾರಿ ನೇಮಕಗೊಂಡಿರುವ ಹಿನ್ನೆಲೆಯಲ್ಲಿ ರೋಟರಿ ಕ್ಲಬ್ ಆಫ್ ಕೋಟ ಸಾಲಿಗ್ರಾಮದ ಸದಸ್ಯರು, ರೋಟರಿ ಕುಟುಂಬದವರು, ಸ್ನೇಹಿತರು ಹಾಗೂ ವಿವಿಧ ಗಣ್ಯರು ಅಭಿನಂದನೆ ಸಲ್ಲಿಸಿ ಶುಭ ಹಾರೈಸಿದ್ದಾರೆ.