ವೈದ್ಯಕೀಯ ಲೋಕವನ್ನೇ ಬೆಚ್ಚಿಬೀಳಿಸಿದ ಅಪರೂಪದ ಘಟನೆಯೊಂದು ಮಹಾರಾಷ್ಟ್ರದ ಮುಂಬೈನಲ್ಲಿ ಬೆಳಕಿಗೆ ಬಂದಿತ್ತು. ನಾಗ್ಪುರ ಮೂಲದ ಸಂಜು ಭಗತ್ ಎಂಬ ವ್ಯಕ್ತಿ ಸುಮಾರು 36 ವರ್ಷಗಳ ಕಾಲ ಅಸಹಜವಾಗಿ ಉಬ್ಬಿದ ಹೊಟ್ಟೆಯೊಂದಿಗೇ ಜೀವನ ನಡೆಸುತ್ತಿದ್ದರು. ಅವರ ಹೊಟ್ಟೆ ಗರ್ಭಿಣಿಯ ಮಹಿಳೆಯ ಹೊಟ್ಟೆಯಂತೆ ಕಾಣುತ್ತಿದ್ದ ಕಾರಣ, ಸುತ್ತಮುತ್ತಲಿನವರು ವರ್ಷಗಳ ಕಾಲ ಅವರನ್ನು ಹಾಸ್ಯ ಮಾಡುತ್ತಿದ್ದರು.
ಆದರೆ 1999ರಲ್ಲಿ ಪರಿಸ್ಥಿತಿ ಗಂಭೀರವಾಗಿತ್ತು. ಹೊಟ್ಟೆಯ ಗಾತ್ರ ವಿಪರೀತವಾಗಿ ಹೆಚ್ಚಾಗಿ ಶ್ವಾಸಕೋಶದ ಸ್ನಾಯುವಿನ ಮೇಲೆ ಒತ್ತಡ ಉಂಟಾಗಿದ್ದರಿಂದ ಸಂಜು ಭಗತ್ ಅವರಿಗೆ ಉಸಿರಾಟದ ತೊಂದರೆ ಆರಂಭವಾಯಿತು. ತಕ್ಷಣ ಅವರನ್ನು ಮುಂಬೈನ ಆಸ್ಪತ್ರೆಗೆ ದಾಖಲಿಸಲಾಯಿತು.
ಪ್ರಾರಂಭದಲ್ಲಿ ವೈದ್ಯರು ಹೊಟ್ಟೆಯಲ್ಲಿ ಬೃಹತ್ ಗಾತ್ರದ ಗಡ್ಡೆ ಅಥವಾ ಟ್ಯೂಮರ್ ಬೆಳೆಯುತ್ತಿದೆ ಎಂದು ಶಂಕಿಸಿದ್ದರು. ಆದರೆ ಶಸ್ತ್ರಚಿಕಿತ್ಸೆ ಆರಂಭವಾದ ಕೆಲವೇ ಕ್ಷಣಗಳಲ್ಲಿ ವೈದ್ಯರು ಬೆಚ್ಚಿಬೀಳುವಂತಹ ಸತ್ಯ ಹೊರಬಂದಿತು.
ಮೊದಲು ಹೊಟ್ಟೆಯಿಂದ ಅಪಾರ ಪ್ರಮಾಣದ ದ್ರವ ಹೊರಬಂದಿದ್ದು, ನಂತರ ಶಸ್ತ್ರಚಿಕಿತ್ಸಕರಿಗೆ ಕೈ, ಕಾಲು, ಕೂದಲು, ಮೂಳೆಗಳು ಹಾಗೂ ಭಾಗಶಃ ರೂಪುಗೊಂಡ ದೇಹದ ಅಂಗಗಳು ಕಾಣಿಸಿಕೊಂಡವು. ಪರಿಶೀಲನೆಯ ಬಳಿಕ ಇದು ಟ್ಯೂಮರ್ ಅಲ್ಲ, ಬದಲಿಗೆ ಸಂಜು ಭಗತ್ ಅವರ ಹೊಟ್ಟೆಯೊಳಗೆ ಬೆಳೆಯುತ್ತಿದ್ದ ಅವಳಿ ಭ್ರೂಣದ ಅವಶೇಷಗಳು ಎಂಬುದು ದೃಢಪಟ್ಟಿತು.
ವೈದ್ಯರು ಇದನ್ನು “ಫೀಟಸ್ ಇನ್ ಫೆಟು” (Foetus in Fetu) ಎಂಬ ಅತ್ಯಂತ ಅಪರೂಪದ ವೈದ್ಯಕೀಯ ಸ್ಥಿತಿ ಎಂದು ಗುರುತಿಸಿದರು. ಗರ್ಭಾವಸ್ಥೆಯಲ್ಲಿ ಒಂದು ಭ್ರೂಣ ಮತ್ತೊಂದು ಭ್ರೂಣದ ಒಳಗೆ ಸಿಲುಕಿಕೊಂಡಾಗ ಈ ಸ್ಥಿತಿ ಉಂಟಾಗುತ್ತದೆ. ಹೊರಗೆ ಪ್ರತ್ಯೇಕವಾಗಿ ಬೆಳೆಯಬೇಕಾದ ಅವಳಿ ಭ್ರೂಣವು ಆತಿಥೇಯ ಭ್ರೂಣದ ದೇಹದೊಳಗೆ ಉಳಿದು, ಅದರ ರಕ್ತದ ಮೂಲಕ ಪೋಷಕಾಂಶ ಪಡೆದು ಬೆಳೆಯುತ್ತದೆ.
ವೈದ್ಯಕೀಯ ತಜ್ಞರ ಪ್ರಕಾರ, ವಿಶ್ವದಾದ್ಯಂತ ಇಂತಹ ಕೇವಲ 100 ರಿಂದ 200 ಪ್ರಕರಣಗಳು ಮಾತ್ರ ದಾಖಲಾಗಿವೆ. ಹೆಚ್ಚಿನ ಸಂದರ್ಭಗಳಲ್ಲಿ ಬಾಲ್ಯದಲ್ಲೇ ಈ ಸ್ಥಿತಿ ಪತ್ತೆಯಾಗುತ್ತದೆ. ಆದರೆ ಸಂಜು ಭಗತ್ ಅವರು 36 ವರ್ಷಗಳ ಕಾಲ ಯಾವುದೇ ಸ್ಪಷ್ಟ ಅರಿವಿಲ್ಲದೆ ಬದುಕಿದ್ದು ವೈದ್ಯಕೀಯ ಕ್ಷೇತ್ರದಲ್ಲಿ ಅಚ್ಚರಿ ಮೂಡಿಸಿತ್ತು.
ಶಸ್ತ್ರಚಿಕಿತ್ಸೆಯ ಬಳಿಕ ಸಂಜು ಭಗತ್ ಆರೋಗ್ಯವಾಗಿ ಚೇತರಿಸಿಕೊಂಡರು. ಹಲವು ವರ್ಷಗಳ ನಂತರ ಮೊದಲ ಬಾರಿಗೆ ಅವರು ನಿರಾಳವಾಗಿ ಉಸಿರಾಡಲು ಸಾಧ್ಯವಾಯಿತು. ಆದರೆ ತಮ್ಮ ಹೊಟ್ಟೆಯಿಂದ ಹೊರತೆಗೆದ ಆ ವಿಕಾರ ರೂಪದ ಭ್ರೂಣವನ್ನು ನೋಡುವುದಕ್ಕೆ ಅವರು ನಿರಾಕರಿಸಿದ್ದಾಗಿ ವರದಿಗಳು ತಿಳಿಸಿವೆ.