ಮನುಷ್ಯರ ಜೊತೆ ಸಾಕು ನಾಯಿಗಳು, ಬೆಕ್ಕುಗಳಿಗೂ ಒಂದೇ ಆರೋಗ್ಯ ವಿಮೆ : ಬಜಾಜ್‌ನ ಹೊಸ ಯೋಜನೆ

ಬೆಂಗಳೂರು : ಸಾಕುಪ್ರಾಣಿಗಳನ್ನೂ ಕುಟುಂಬದ ಸದಸ್ಯರಂತೆ ಪರಿಗಣಿಸಿ ಆರೋಗ್ಯ ವಿಮೆ ಒದಗಿಸುವ ಉದ್ದೇಶದಿಂದ ಬಜಾಜ್ ಜನರಲ್ ಇನ್ಶೂರೆನ್ಸ್ ಲಿಮಿಟೆಡ್ ‘My Family Complete’ ಎಂಬ ಹೊಸ ಆರೋಗ್ಯ ವಿಮಾ ಯೋಜನೆಯನ್ನು ಪರಿಚಯಿಸಿದೆ. ಭಾರತದಲ್ಲಿ ಸಾಕು ನಾಯಿಗಳು ಮತ್ತು ಬೆಕ್ಕುಗಳನ್ನು ಕುಟುಂಬದ ಸದಸ್ಯರಾಗಿ ಒಳಗೊಂಡಿರುವ ಮೊದಲ ಆರೋಗ್ಯ ವಿಮಾ ಯೋಜನೆ ಇದಾಗಿದೆ ಎಂದು ಕಂಪನಿ ತಿಳಿಸಿದೆ.

ಮಾನವ ಕುಟುಂಬ ಸದಸ್ಯರು ಹಾಗೂ ಸಾಕುಪ್ರಾಣಿಗಳಿಗೆ ಪ್ರತ್ಯೇಕ ವಿಮಾ ಪಾಲಿಸಿಗಳ ಬದಲಾಗಿ, ಒಂದೇ ಸಮಗ್ರ ಆರೋಗ್ಯ ವಿಮಾ ಯೋಜನೆಯಡಿ ಇಬ್ಬರಿಗೂ ರಕ್ಷಣೆ ನೀಡುವುದು ಈ ಯೋಜನೆಯ ಪ್ರಮುಖ ವಿಶೇಷತೆಯಾಗಿದೆ. ₹5 ಲಕ್ಷದಿಂದ ₹5 ಕೋಟಿವರೆಗೆ ವಿಮಾ ಮೊತ್ತದ ಆಯ್ಕೆಗಳು ಲಭ್ಯವಿದ್ದು, ಗರಿಷ್ಠ ಐದು ವರ್ಷಗಳವರೆಗೆ ಪಾಲಿಸಿ ಅವಧಿಯನ್ನು ಆಯ್ಕೆ ಮಾಡಿಕೊಳ್ಳಬಹುದಾಗಿದೆ.

ಮನುಷ್ಯರು ಮತ್ತು ಸಾಕುಪ್ರಾಣಿಗಳಿಗೆ ಒಂದೇ ಆರೋಗ್ಯ ರಕ್ಷಣೆ

‘My Family Complete’ ಯೋಜನೆಯಡಿ 18 ವರ್ಷ ಮೇಲ್ಪಟ್ಟ ವಯಸ್ಕರು, 3 ತಿಂಗಳಿಂದ 30 ವರ್ಷ ವಯಸ್ಸಿನ ಅವಲಂಬಿತ ಮಕ್ಕಳು ಹಾಗೂ 3 ತಿಂಗಳ ವಯಸ್ಸಿನಿಂದ ಸಾಕು ನಾಯಿಗಳು ಮತ್ತು ಬೆಕ್ಕುಗಳನ್ನು ವಿಮಾ ವ್ಯಾಪ್ತಿಗೆ ಸೇರಿಸಬಹುದಾಗಿದೆ. ಸಾಕುಪ್ರಾಣಿಗಳಿಗೆ ಗರಿಷ್ಠ ವಯೋಮಿತಿ ಇಲ್ಲ ಎಂದು ಕಂಪನಿ ತಿಳಿಸಿದೆ.

ಯೋಜನೆಯಡಿ ಒಳರೋಗಿ ಚಿಕಿತ್ಸಾ ವೆಚ್ಚ, ಕೊಠಡಿ ಬಾಡಿಗೆ, ರಸ್ತೆ ಆಂಬ್ಯುಲೆನ್ಸ್ ಹಾಗೂ ಪೆಟ್ ಆಂಬ್ಯುಲೆನ್ಸ್, ಆಸ್ಪತ್ರೆ ದಾಖಲಾತಿಗೆ ಮುನ್ನ ಮತ್ತು ನಂತರದ ವೆಚ್ಚ, ಮನೆಯಲ್ಲೇ ಚಿಕಿತ್ಸೆ, ಆಧುನಿಕ ಚಿಕಿತ್ಸಾ ವಿಧಾನಗಳು ಸೇರಿದಂತೆ ಹಲವು ಸೌಲಭ್ಯಗಳು ದೊರೆಯಲಿವೆ.

ಮಾನವ ಸದಸ್ಯರಿಗೆ ಆಯುಷ್ ಆಸ್ಪತ್ರೆ ಚಿಕಿತ್ಸೆ, ಅಂಗಾಂಗ ದಾನಿಗಳ ವೆಚ್ಚ, ಕುಟುಂಬ ಸದಸ್ಯರ ಭೇಟಿ ವೆಚ್ಚ ಸೇರಿದಂತೆ ವಿವಿಧ ಸೌಲಭ್ಯಗಳನ್ನೂ ಯೋಜನೆ ಒಳಗೊಂಡಿದೆ. ವಿಮಾ ಮೊತ್ತ ಬಳಕೆಯಾದ ಪ್ರತಿ ಬಾರಿಯೂ ಅದನ್ನು ಮರುಸ್ಥಾಪಿಸುವ ಅನ್‌ಲಿಮಿಟೆಡ್ ರೀಇನ್‌ಸ್ಟೇಟ್‌ಮೆಂಟ್ ಸೌಲಭ್ಯವೂ ಇದೆ.

ಸಾಕುಪ್ರಾಣಿಗಳಿಗೆ ವಿಶೇಷ ಸೌಲಭ್ಯ

ಸಾಕುಪ್ರಾಣಿಗಳನ್ನು ಕಳೆದುಕೊಂಡ ಸಂದರ್ಭದಲ್ಲಿ ಅವುಗಳನ್ನು ಹುಡುಕಲು ಜಾಹೀರಾತು ಮತ್ತು ಬಹುಮಾನ ವೆಚ್ಚಗಳ ಮರುಪಾವತಿ, ಸಾಕುಪ್ರಾಣಿಯ ಮಾಲೀಕರು ಆಸ್ಪತ್ರೆಗೆ ದಾಖಲಾದ ಸಂದರ್ಭದಲ್ಲಿ ತುರ್ತು ಪೆಟ್ ವಸತಿ ವ್ಯವಸ್ಥೆ ಹಾಗೂ ಸಾಕುಪ್ರಾಣಿಯಿಂದ ಇತರರಿಗೆ ಗಾಯ, ಸಾವು ಅಥವಾ ಆಸ್ತಿ ಹಾನಿಯಾದರೆ ಥರ್ಡ್ ಪಾರ್ಟಿ ಹೊಣೆಗಾರಿಕೆ ರಕ್ಷಣೆ ಸೇರಿದಂತೆ ವಿಶೇಷ ಸೌಲಭ್ಯಗಳನ್ನು ನೀಡಲಾಗಿದೆ.

ಸಾಕುಪ್ರಾಣಿಯ ನಷ್ಟ ಅಥವಾ ಮರಣದ ಬಳಿಕ ಮತ್ತೊಂದು ಸಾಕುಪ್ರಾಣಿಯನ್ನು ದತ್ತು ಪಡೆಯಲು ಆರ್ಥಿಕ ನೆರವು ನೀಡುವ Paw Promise, ದೀರ್ಘಕಾಲೀನ ಆರೈಕೆ ಹಾಗೂ ಹೆಚ್ಚುವರಿ ಪೆಟ್ ಸ್ಟೇ ಸೌಲಭ್ಯಗಳನ್ನೂ ಆಯ್ಕೆ ಮಾಡಿಕೊಳ್ಳಬಹುದಾಗಿದೆ.

ಹಲವು ಐಚ್ಛಿಕ ಕವರ್‌ಗಳ ಆಯ್ಕೆ

ಗ್ರಾಹಕರ ಅಗತ್ಯಕ್ಕೆ ಅನುಗುಣವಾಗಿ ಡಬಲ್ ಸಮ್ ಇನ್ಶೂರ್ಡ್ ಬೆನಿಫಿಟ್, ಮೇಜರ್ ಇಲ್ನೆಸ್ ಮತ್ತು ಆಕ್ಸಿಡೆಂಟ್ ಮಲ್ಟಿಪ್ಲೈಯರ್, ಏರ್ ಆಂಬ್ಯುಲೆನ್ಸ್ ಕವರ್, ಗ್ಲೋಬಲ್ ಕವರ್, Consumables Plus, Health Limitless, NRInsure ಮತ್ತು Age Shield ಸೇರಿದಂತೆ ಹಲವು ಹೆಚ್ಚುವರಿ ಕವರ್‌ಗಳನ್ನು ಆಯ್ಕೆ ಮಾಡಿಕೊಳ್ಳಬಹುದಾಗಿದೆ.

ಮಗು ಅಥವಾ ಸಾಕುಪ್ರಾಣಿಗಳಿಗೆ ಮರಿಗಳ ಜನನದ ಸಂದರ್ಭದಲ್ಲಿ ನಿಗದಿತ ಮೊತ್ತ ಪಾವತಿಸುವ Bundle of Joy Benefit ಕೂಡ ಯೋಜನೆಯಲ್ಲಿದೆ. ವಿದೇಶದಲ್ಲಿ ಯೋಜಿತ ಅಥವಾ ತುರ್ತು ಚಿಕಿತ್ಸೆ ಪಡೆಯುವವರಿಗೆ ಗ್ಲೋಬಲ್ ಕವರ್ ಸಹ ಲಭ್ಯವಿದೆ.

ವಿವಿಧ ರಿಯಾಯಿತಿ ಮತ್ತು ಬಹುಮಾನಗಳು

ದೀರ್ಘಾವಧಿ ಪಾಲಿಸಿ, ಕುಟುಂಬ ಪಾಲಿಸಿ ಹಾಗೂ ಲಾಯಲ್ಟಿ ಪ್ರಯೋಜನಗಳೊಂದಿಗೆ ಫಿಟ್‌ನೆಸ್ ರಿವಾರ್ಡ್, ಕ್ಯುಮ್ಯುಲೇಟಿವ್ ಬೋನಸ್, ಜೋನ್ ಆಧಾರಿತ ದರ ಹಾಗೂ Walk to Win ಡಿಸ್ಕೌಂಟ್‌ಗಳಂತಹ ಸೌಲಭ್ಯಗಳನ್ನು ನೀಡಲಾಗಿದೆ. ಕೆಲವು ಆಯ್ಕೆಗಳಡಿ ವಿಮಾ ಮೊತ್ತದ ಮೇಲಿನ ಕ್ಯುಮ್ಯುಲೇಟಿವ್ ಬೋನಸ್ ಶೇ.100ರವರೆಗೆ ಪಡೆಯುವ ಅವಕಾಶವಿದೆ.

ಈ ಕುರಿತು ಮಾತನಾಡಿದ ಬಜಾಜ್ ಜನರಲ್ ಇನ್ಶೂರೆನ್ಸ್‌ನ ಎಂಡಿ ಮತ್ತು ಸಿಇಒ ಡಾ. ತಪನ್ ಸಿಂಗಲ್, ಸಾಕುಪ್ರಾಣಿಗಳು ಕೇವಲ ಸಂಗಾತಿಗಳಲ್ಲ, ಅವು ಕುಟುಂಬದ ಭಾಗವಾಗಿವೆ. ಆದ್ದರಿಂದ ಅವುಗಳ ಆರೋಗ್ಯ ಮತ್ತು ಕ್ಷೇಮವೂ ಕುಟುಂಬದ ಆರೋಗ್ಯದ ಅವಿಭಾಜ್ಯ ಭಾಗವಾಗಬೇಕು ಎಂದು ಹೇಳಿದರು.

“ಕುಟುಂಬದಂತೆ ಸಾಕುಪ್ರಾಣಿಗಳಿಗೂ ಆರೋಗ್ಯ ರಕ್ಷಣೆ ಅಗತ್ಯ. My Family Complete ಮೂಲಕ ಸಾಕು ನಾಯಿಗಳು ಮತ್ತು ಬೆಕ್ಕುಗಳನ್ನು ಕುಟುಂಬದ ಸದಸ್ಯರಾಗಿ ಆರೋಗ್ಯ ವಿಮಾ ವ್ಯಾಪ್ತಿಗೆ ತರುವ ಪ್ರಯತ್ನ ಮಾಡಲಾಗಿದೆ” ಎಂದು ಅವರು ತಿಳಿಸಿದರು.

ಹೆಚ್ಚುತ್ತಿರುವ ವೈದ್ಯಕೀಯ ವೆಚ್ಚಗಳು ಹಾಗೂ ಸಾಕುಪ್ರಾಣಿಗಳೊಂದಿಗೆ ಕುಟುಂಬಗಳ ಭಾವನಾತ್ಮಕ ಬಾಂಧವ್ಯವನ್ನು ಗಮನದಲ್ಲಿಟ್ಟುಕೊಂಡು ಈ ಯೋಜನೆಯನ್ನು ರೂಪಿಸಲಾಗಿದೆ. ಆಧುನಿಕ ಕುಟುಂಬಗಳ ಜೀವನಶೈಲಿಗೆ ಹೊಂದಿಕೊಳ್ಳುವಂತೆ ಆರೋಗ್ಯ ವಿಮೆಯ ವ್ಯಾಪ್ತಿಯನ್ನು ವಿಸ್ತರಿಸುವುದು ಇದರ ಉದ್ದೇಶವಾಗಿದೆ ಎಂದು ಕಂಪನಿ ತಿಳಿಸಿದೆ.