ಮಂಗಳೂರು: ವಿಶ್ವ ತುಳುವೇರ್ ರಿಜಿಸ್ಟರ್ ಮಂಗಳೂರು ವತಿಯಿಂದ ತುಳುನಾಡಿನ ಸಾಮಾಜಿಕ, ಸಾಂಸ್ಕೃತಿಕ, ಶೈಕ್ಷಣಿಕ ಹಾಗೂ ಕ್ರೀಡಾ ಪರಂಪರೆಯನ್ನು ಉಳಿಸಿ ಬೆಳೆಸುವ ಉದ್ದೇಶದಿಂದ ಜಿಲ್ಲಾ ಮಟ್ಟದ ತುಳು ಲಿಪಿ ಕಲಿಕಾ ಸ್ಪರ್ಧೆ ಹಾಗೂ ವಿವಿಧ ಸಾಂಸ್ಕೃತಿಕ ಮತ್ತು ಕ್ರೀಡಾ ಕಾರ್ಯಕ್ರಮಗಳು ಆ.16ರಂದು ಕದ್ರಿ ಮಲ್ಲಿಕಟ್ಟೆಯ ಸರ್ಕಾರಿ ಹಿರಿಯ ಮತ್ತು ಪ್ರೌಢಶಾಲಾ ವಠಾರದಲ್ಲಿ ಅದ್ದೂರಿಯಾಗಿ ನಡೆಯಿತು.
ಬೆಳಿಗ್ಗೆ 10ರಿಂದ ಸಂಜೆ 5ರವರೆಗೆ ನಡೆದ ಕಾರ್ಯಕ್ರಮದಲ್ಲಿ ತುಳು ಲಿಪಿ ಕಲಿಕಾ ಸ್ಪರ್ಧೆ, ಚೆನ್ನದ ಮನೆ, ಲಗೋರಿ ಸೇರಿದಂತೆ ವಿವಿಧ ಸಾಂಸ್ಕೃತಿಕ ಹಾಗೂ ಕ್ರೀಡಾ ಸ್ಪರ್ಧೆಗಳು ಜನಸಾಗರದ ನಡುವೆ ಸಂಭ್ರಮದಿಂದ ಜರುಗಿದವು. ಕೊಂಬು ವಾದ್ಯದೊಂದಿಗೆ ನಡೆದ ಕಾರ್ಯಕ್ರಮ ತುಳುನಾಡಿನ ಸಾಂಸ್ಕೃತಿಕ ವೈಭವವನ್ನು ಬಿಂಬಿಸಿತು.
ಕಾರ್ಯಕ್ರಮವನ್ನು ಸರ್ಕಾರಿ ಸೊಸೈಟಿ ಮತ್ತು ಸಂಘಗಳ ಸೀನಿಯರ್ ಸಬ್ ಇನ್ಸ್ಪೆಕ್ಟರ್ ವಿಲಾಸ್ ರಾವ್ ಅವರು ದೀಪ ಬೆಳಗಿಸುವ ಮೂಲಕ ಉದ್ಘಾಟಿಸಿದರು. ವೇದಿಕೆಯಲ್ಲಿ ಅಬ್ದುಲ್ ವಾಜಿದ್, ಕ್ರೈಮ್ ಸಂಪದಕರು, ಭರತ್ ಕುಮಾರ್, ಆರೋಗ್ಯ ನಿರೀಕ್ಷಕರು, ಮಹಾನಗರ ಪಾಲಿಕೆ ಮಂಗಳೂರು ಸೇರಿದಂತೆ ಹಲವು ಗಣ್ಯರು ಉಪಸ್ಥಿತರಿದ್ದರು.
ತುಳುನಾಡಿಗರಲ್ಲಿ ತುಳು ಲಿಪಿಯ ಬಗ್ಗೆ ಜ್ಞಾನ ಹಾಗೂ ಆಸಕ್ತಿ ಮೂಡಿಸುವ ಮತ್ತು ತುಳು ಭಾಷೆ–ಲಿಪಿಯನ್ನು ಉಳಿಸಿ ಬೆಳೆಸುವ ಉದ್ದೇಶದಿಂದ **‘ಎರಡು ನಿಮಿಷದಲ್ಲಿ ತುಳು ಲಿಪಿ ಕಲಿಕಾ ಸ್ಪರ್ಧೆ’**ಯನ್ನು ಪ್ರಥಮ ಬಾರಿಗೆ ಆಯೋಜಿಸಲಾಗಿತ್ತು.
ಸ್ಪರ್ಧೆಯಲ್ಲಿ ಮೊದಲಿಗೆ ತುಳು ಲಿಪಿಯ ಮಾದರಿ ಪತ್ರವನ್ನು ಐದು ನಿಮಿಷಗಳ ಕಾಲ ನೀಡಲಾಗಿದ್ದು, ಬಳಿಕ ಅದನ್ನು ಹಿಂದಕ್ಕೆ ಪಡೆದು ಖಾಲಿ ಹಾಳೆ ನೀಡಲಾಯಿತು. ಕೇವಲ ಎರಡು ನಿಮಿಷಗಳ ಅವಧಿಯಲ್ಲಿ 62 ಮಂದಿ ಸ್ಪರ್ಧಿಗಳು ತುಳು ಲಿಪಿಯ ಅಕ್ಷರಗಳನ್ನು ಬರೆದು ದಾಖಲೆ ನಿರ್ಮಿಸಿದರು. ಇವರಲ್ಲಿ 30 ಮಂದಿ ತುಳು ಲಿಪಿಯನ್ನು ಸರಿಯಾಗಿ ಬರೆದಿದ್ದು, ಅಕ್ಷರಗಳ ಸ್ಪಷ್ಟತೆ ಮತ್ತು ಅಚ್ಚುಕಟ್ಟಾದ ಬರವಣಿಗೆಯ ಆಧಾರದ ಮೇಲೆ ವಿಜೇತರನ್ನು ಆಯ್ಕೆ ಮಾಡಲಾಯಿತು.
ವಿಶ್ವ ತುಳುವೇರ್ ಸಂಘದ ಕೇಂದ್ರ ಸಮಿತಿಯ ಎರಡನೇ ಉಪಾಧ್ಯಕ್ಷ ಜಿ.ವಿ.ಎಸ್. ಉಳ್ಳಾಲ್ ಹಾಗೂ ಕೇಂದ್ರ ಸಮಿತಿಯ ಸದಸ್ಯ ರಾಜೇಶ್ ಉಳ್ಳಾಲ್ ಅವರ ತಂಡ ವಿಜೇತರನ್ನು ಆಯ್ಕೆ ಮಾಡಿತು. ತುಳು ಲಿಪಿ ಕಲಿಕಾ ಸ್ಪರ್ಧೆಯಲ್ಲಿ ಜನ್ವಿತ್ ಶೆಟ್ಟಿ ಪಡಿಲ್ ಪ್ರಥಮ ಸ್ಥಾನ ಪಡೆದರು. ಅವರು ಎಸ್.ಡಿ.ಎಂ. ಶಾಲೆ ಶೇಡಿಗುರಿಯ ವಿದ್ಯಾರ್ಥಿಯಾಗಿದ್ದಾರೆ. ಕುಮಾರಿ ಸಹಜ್ಞ ಮೂಡಬಿದಿರೆ ದ್ವಿತೀಯ ಸ್ಥಾನ ಪಡೆದುಕೊಂಡಿದ್ದು, ಅವರು ಆಳ್ವಾಸ್ ಕಾಲೇಜಿನ ವಿದ್ಯಾರ್ಥಿನಿಯಾಗಿದ್ದಾರೆ.
ಚೆನ್ನದ ಮನೆ ಮಹಿಳಾ ವಿಭಾಗದಲ್ಲಿ ಸಂಧ್ಯಾ ಮೂಡಬಿದಿರೆ ಪ್ರಥಮ ಹಾಗೂ ಮೋಹಿನಿ ಮಂಗಳೂರು ದ್ವಿತೀಯ ಸ್ಥಾನ ಪಡೆದರು. ಪುರುಷರ ವಿಭಾಗದಲ್ಲಿ ಪ್ರವೀಣ್ ಶೆಟ್ಟಿ ಪುತ್ತಿಗೆ, ಮೂಡಬಿದಿರೆ ಪ್ರಥಮ ಹಾಗೂ ಜಗನ್ನಾಥ ಶೆಟ್ಟಿ ಪಡೀಲ್, ಮಂಗಳೂರು ದ್ವಿತೀಯ ಸ್ಥಾನ ಗಳಿಸಿದರು.
ಲಗೋರಿ ಮಹಿಳಾ ವಿಭಾಗದಲ್ಲಿ ಹೇಮಲತಾ ಕೆ. ಮತ್ತು ತಂಡ ಪ್ರಥಮ ಹಾಗೂ ನಿಶಾ ಮತ್ತು ತಂಡ ದ್ವಿತೀಯ ಸ್ಥಾನ ಪಡೆದರು. ಪುರುಷರ ವಿಭಾಗದಲ್ಲಿ ಪ್ರವೀಣ್ ಶೆಟ್ಟಿ ಪುತ್ತಿಗೆ ಮತ್ತು ತಂಡ ಪ್ರಥಮ, ಡಿ.ಟಿ. ಪ್ರಮೋದ್ ದೇವಾಡಿಗ ಮತ್ತು ತಂಡ ದ್ವಿತೀಯ ಹಾಗೂ ವಿಜಯ್ ಪ್ರಭು ಮತ್ತು ತಂಡ ತೃತೀಯ ಸ್ಥಾನ ಪಡೆದುಕೊಂಡರು.
ಕಾರ್ಯಕ್ರಮದಲ್ಲಿ 12 ವರ್ಷದ ಮಕ್ಕಳಿಂದ ಹಿಡಿದು 78 ವರ್ಷದ ಮಹಿಳೆಯರು ಮತ್ತು ಪುರುಷರು ಸೇರಿದಂತೆ ವಿವಿಧ ವಯೋಮಾನದವರು ಉತ್ಸಾಹದಿಂದ ಭಾಗವಹಿಸಿದ್ದು ವಿಶೇಷವಾಗಿತ್ತು. ಹಿರಿಯರು, ಯುವಕರು ಹಾಗೂ ಮಕ್ಕಳು ಒಂದೇ ವೇದಿಕೆಯಲ್ಲಿ ತುಳು ಭಾಷೆ, ಲಿಪಿ, ಕ್ರೀಡೆ ಮತ್ತು ಸಂಸ್ಕೃತಿಯೊಂದಿಗೆ ಬೆರೆತು ಸಂಭ್ರಮಿಸಿದರು.
ತುಳುನಾಡಿನ ಪರಂಪರೆಯ ಕ್ರೀಡೆಗಳು ಹಾಗೂ ತುಳು ಲಿಪಿಯ ಬಗ್ಗೆ ಜನರಲ್ಲಿ ಆಸಕ್ತಿ ಮೂಡಿಸುವಲ್ಲಿ ಕಾರ್ಯಕ್ರಮ ಯಶಸ್ವಿಯಾಗಿದ್ದು, ಕಾರ್ಯಕ್ರಮ ವೀಕ್ಷಿಸಿದ ತುಳುನಾಡಿಗರು ಮೆಚ್ಚುಗೆ ವ್ಯಕ್ತಪಡಿಸಿದರು. ಸಂಘಟನೆಯ ಈ ಪ್ರಯತ್ನವು ತುಳು ಭಾಷೆ ಮತ್ತು ಲಿಪಿಯ ಸಂರಕ್ಷಣೆ ಹಾಗೂ ಮುಂದಿನ ಪೀಳಿಗೆಗೆ ಪರಿಚಯಿಸುವ ನಿಟ್ಟಿನಲ್ಲಿ ಮಹತ್ವದ ಹೆಜ್ಜೆಯಾಗಿದೆ.