ಸಚ್ಚೇರಿಪೇಟೆ : ಮುಂಡ್ಕೂರು–ಕಡಂದಲೆ ಲಯನ್ಸ್ ಕ್ಲಬ್ ಹಾಗೂ ಲಯನ್ಸ್ ಆಂಗ್ಲ ಮಾಧ್ಯಮ ಪ್ರೌಢಶಾಲೆ, ಸಚ್ಚೇರಿಪೇಟೆ ಇವರ ಜಂಟಿ ಆಶ್ರಯದಲ್ಲಿ ಶ್ರೀಕೃಷ್ಣ ಜನ್ಮಾಷ್ಟಮಿಯ ಪ್ರಯುಕ್ತ ಕೃಷ್ಣೋತ್ಸವ ಹಾಗೂ 7ನೇ ವರ್ಷದ ಸಾರ್ವಜನಿಕ ಮುದ್ದು ಕೃಷ್ಣ ವೇಷ ಸ್ಪರ್ಧೆ ಸೆಪ್ಟೆಂಬರ್ 5ರಂದು ಸಚ್ಚೇರಿಪೇಟೆಯ ಲಯನ್ಸ್ ಶಾಲಾ ಸಭಾಂಗಣದಲ್ಲಿ ವಿಜೃಂಭಣೆಯಿಂದ ನಡೆಯಿತು.
ಕಾರ್ಯಕ್ರಮದ ಮುಖ್ಯ ಅತಿಥಿಗಳಾಗಿ ಮುಂಡ್ಕೂರು ವಿದ್ಯಾವರ್ಧಕ ಪದವಿ ಕಾಲೇಜಿನ ಆಡಳಿತ ವಿಭಾಗದ ಅಧ್ಯಕ್ಷರಾದ ಸುಧಾಕರ್ ಶೆಟ್ಟಿ ಅವರು ಭಾಗವಹಿಸಿ ಕಾರ್ಯಕ್ರಮಕ್ಕೆ ಶುಭ ಹಾರೈಸಿದರು. ಮಹಾಮ್ಮಾಯಿ ಕ್ಷೇತ್ರ, ಕಜೆಯ ಗೌರವಾಧ್ಯಕ್ಷರಾದ ಎಂ.ಜಿ. ಕರ್ಕೇರಾ ಅವರು ಶಿಕ್ಷಕರ ದಿನಾಚರಣೆಯ ಅಂಗವಾಗಿ ಸಂಸ್ಥೆಯ ಶಿಕ್ಷಕರನ್ನು ಗೌರವಿಸಿ, ಅವರ ಸೇವೆಯನ್ನು ಅಭಿನಂದಿಸಿದರು.
ಲಯನ್ಸ್ ಕ್ಲಬ್ನ ಕಾರ್ಯದರ್ಶಿ ಲಯನ್ ರೋನಾಲ್ಡ್ ಪೀಟರ್ ಮಸ್ಕರೇನಸ್ ಹಾಗೂ ಸಂಸ್ಥೆಯ ಸಂಚಾಲಕರಾದ ಲಯನ್ ಕೆ.ಎಸ್. ಸತ್ಯಶಂಕರ್ ಶೆಟ್ಟಿ ಅವರು ಕಾರ್ಯಕ್ರಮಕ್ಕೆ ಶುಭ ಹಾರೈಸಿದರು.
ಸಾರ್ವಜನಿಕ ಮುದ್ದು ಕೃಷ್ಣ ವೇಷ ಸ್ಪರ್ಧೆಯಲ್ಲಿ 70ಕ್ಕೂ ಅಧಿಕ ಪುಟಾಣಿ ಸ್ಪರ್ಧಾಳುಗಳು ಉತ್ಸಾಹದಿಂದ ಭಾಗವಹಿಸಿ, ವಿವಿಧ ಬಗೆಯ ಮನಮೋಹಕ ಕೃಷ್ಣ ವೇಷ, ಅಭಿನಯ ಹಾಗೂ ಭಾವಾಭಿನಯದ ಮೂಲಕ ನೆರೆದಿದ್ದವರ ಮನಸೆಳೆದರು.
ಸ್ಪರ್ಧೆಯ ತೀರ್ಪುಗಾರರಾಗಿ ಲಯನ್ ಬಿ. ಸೀತಾರಾಮ ಭಟ್, ಲಯನ್ ವಿ.ಕೆ. ರಾವ್, ಸುಧಾಕರ್ ಕುಲಾಲ್, ಪವನ್ ಕಾಮತ್, ಅಭಿಜಿತ್ ಶೆಣೈ ಹಾಗೂ ಕಾರ್ತಿಕ್ ಅವರು ಸಹಕರಿಸಿ, ವಿವಿಧ ಮಾನದಂಡಗಳ ಆಧಾರದ ಮೇಲೆ ಸ್ಪರ್ಧಾಳುಗಳ ಪ್ರತಿಭೆಯನ್ನು ಮೌಲ್ಯಮಾಪನ ಮಾಡಿದರು.
ಸ್ಪರ್ಧೆಯನ್ನು ಆರು ವಿಭಾಗಗಳಲ್ಲಿ ಆಯೋಜಿಸಲಾಗಿತ್ತು. 0–1 ವರ್ಷದ ಪುಟಾಣಿ ಕೃಷ್ಣ, 1–2 ವರ್ಷದ ಪುಟಾಣಿ ಕೃಷ್ಣ, 2–4 ವರ್ಷದ ಮುದ್ದು ಕೃಷ್ಣ, 4–6 ವರ್ಷದ ಬೆಣ್ಣೆ ಕೃಷ್ಣ, 6–8 ವರ್ಷದ ಬಾಲಕೃಷ್ಣ ಹಾಗೂ 1–6 ವರ್ಷದ ಯಶೋಧೆ–ಕೃಷ್ಣ ತಾಯಿ–ಮಗು ವಿಭಾಗ ಸ್ಪರ್ಧೆಗಳು ನಡೆದವು.
ಪ್ರತಿ ವಿಭಾಗದಲ್ಲಿಯೂ ಪ್ರಥಮ, ದ್ವಿತೀಯ ಹಾಗೂ ತೃತೀಯ ಬಹುಮಾನಗಳನ್ನು ನೀಡಲಾಯಿತು. ಸ್ಪರ್ಧೆಯಲ್ಲಿ ಭಾಗವಹಿಸಿದ ಎಲ್ಲಾ ಮಕ್ಕಳಿಗೂ ಪ್ರಶಂಸಾ ಪತ್ರ ಹಾಗೂ ಬಹುಮಾನ ನೀಡಿ ಪ್ರೋತ್ಸಾಹಿಸಲಾಯಿತು.
ಕಾರ್ಯಕ್ರಮದಲ್ಲಿ ಸಂಸ್ಥೆಯ ಮುಖ್ಯ ಶಿಕ್ಷಕರಾದ ಗೌರವ್ ಆರ್.ಕೆ., ಮುಂಡ್ಕೂರು–ಕಡಂದಲೆ ಲಯನ್ಸ್ ಕ್ಲಬ್ನ ಪೂರ್ವಾಧ್ಯಕ್ಷರಾದ ಲಯನ್ ಆನಂದ್ ಆಚಾರ್ಯ, ಲಯನ್ ವಿಕಾಸ್ ಶೆಟ್ಟಿ, ಲಯನ್ ಪ್ರಶಾಂತ್ ಶೆಟ್ಟಿ, ಲಯನ್ ಯಶವಂತ ಆಚಾರ್ಯ, ಲಯನ್ ಜಿನ್ನೋಜಿ ರಾವ್, ಲಯನ್ ಕೃಷ್ಣ ಶೆಟ್ಟಿ, ಲಯನ್ ಶರತ್ ಶೆಟ್ಟಿ, ಪುರುಷೋತ್ತಮ ಪೂಜಾರಿ, ಶ್ರೀಕಾಂತ್ ಕಾಮತ್, ಸತೀಶ್ ಪ್ರಭು, ಅಂಗನವಾಡಿ ಕಾರ್ಯಕರ್ತರು, ಪೋಷಕರು, ಶಿಕ್ಷಕರು ಹಾಗೂ ವಿದ್ಯಾರ್ಥಿಗಳು ಉಪಸ್ಥಿತರಿದ್ದರು.
ಕಾರ್ಯಕ್ರಮದ ನಿರೂಪಣೆಯನ್ನು ಸುಶೀಲ ನೆರವೇರಿಸಿದರು. ಜಯಲಕ್ಷ್ಮಿ ಶೆಟ್ಟಿಗಾರ್ ಸ್ವಾಗತಿಸಿದರು. ದೀಪಿಕಾ ವಂದನಾರ್ಪಣೆ ಸಲ್ಲಿಸಿದರು. ಪುಟಾಣಿ ಮಕ್ಕಳ ಮನಮೋಹಕ ಕೃಷ್ಣ ವೇಷ, ಮುದ್ದಾದ ಅಭಿನಯ, ಆಕರ್ಷಕ ಭಾವಾಭಿನಯ ಹಾಗೂ ಪೋಷಕರ ಉತ್ಸಾಹಭರಿತ ಭಾಗವಹಿಸುವಿಕೆಯಿಂದ ಕೃಷ್ಣೋತ್ಸವವು ಸಂಭ್ರಮ, ಸಡಗರದಿಂದ ಯಶಸ್ವಿಯಾಗಿ ನೆರವೇರಿತು.
ಶ್ರೀಕೃಷ್ಣನ ಬಾಲಲೀಲೆಗಳನ್ನು ನೆನಪಿಸುವ ಈ ಕಾರ್ಯಕ್ರಮವು ಮಕ್ಕಳ ಪ್ರತಿಭೆಯನ್ನು ಅನಾವರಣಗೊಳಿಸುವುದರ ಜೊತೆಗೆ, ಪೋಷಕರು ಹಾಗೂ ಸಾರ್ವಜನಿಕರ ಮನದಲ್ಲಿ ಸಂತಸ, ಭಕ್ತಿ ಮತ್ತು ಸಂಭ್ರಮವನ್ನು ಮೂಡಿಸಿತು.