ಮಂಗಳೂರು : ಅಗತ್ಯ ವಸ್ತುಗಳ ಬೆಲೆ ಏರಿಕೆಯಿಂದ ತತ್ತರಿಸಿರುವ ಗ್ರಾಹಕರಿಗೆ ಇದೀಗ ಹಾಲಿನ ದರ ಏರಿಕೆಯ ಬಿಸಿ ತಟ್ಟಿದೆ. ಇತ್ತೀಚೆಗಷ್ಟೇ ರಾಜ್ಯದ ನಂದಿನಿ ಹಾಲಿನ ದರ ಹೆಚ್ಚಳವಾಗಿದ್ದ ಬೆನ್ನಲ್ಲೇ, ದೇಶದ ಪ್ರಮುಖ ಹಾಲು ಉತ್ಪಾದನಾ ಸಂಸ್ಥೆಗಳಾದ ಅಮುಲ್ ಮತ್ತು ಮದರ್ ಡೈರಿ ತಮ್ಮ ಹಾಲಿನ ದರವನ್ನು ಪ್ರತಿ ಲೀಟರ್‌ಗೆ ₹2ರಿಂದ ₹4ರವರೆಗೆ ಹೆಚ್ಚಿಸಿವೆ. ಪರಿಷ್ಕೃತ ದರಗಳು ನವೆಂಬರ್ 12, 2026ರಿಂದಲೇ ಜಾರಿಗೆ ಬಂದಿವೆ.
ಹಾಲಿನ ಉತ್ಪಾದನೆ, ಸಂಗ್ರಹಣೆ ಹಾಗೂ ಸಂಸ್ಕರಣಾ ವೆಚ್ಚದಲ್ಲಿ ಏರಿಕೆಯಾಗಿರುವ ಹಿನ್ನೆಲೆಯಲ್ಲಿ ದರ ಹೆಚ್ಚಳದ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಅಮುಲ್ ಸಂಸ್ಥೆ ತಿಳಿಸಿದೆ.
ಅಮುಲ್ ಹಾಲಿನ ಪರಿಷ್ಕೃತ ದರಗಳು:
- ಅಮುಲ್ ತಾಜಾ ಟೋನ್ಡ್ ಹಾಲು – ₹62
- ಅಮುಲ್ ಗೋಲ್ಡ್ ಫುಲ್ ಕ್ರೀಮ್ ಹಾಲು – ₹80
- ಅಮುಲ್ ಶಕ್ತಿ ಹಾಗೂ ಟೀ ಸ್ಪೆಷಲ್ ಹಾಲಿನ ದರದಲ್ಲೂ ಲೀಟರ್‌ಗೆ ₹2ರಿಂದ ₹4ರವರೆಗೆ ಹೆಚ್ಚಳ.
ಇನ್ನೊಂದೆಡೆ, ದೆಹಲಿ-ಎನ್‌ಸಿಆರ್ ಪ್ರದೇಶದ ಪ್ರಮುಖ ಹಾಲು ಪೂರೈಕೆದಾರ ಸಂಸ್ಥೆಯಾದ ಮದರ್ ಡೈರಿ ಕೂಡ ಹಾಲಿನ ದರವನ್ನು ಹೆಚ್ಚಿಸಿದೆ. ಹಾಲು ಉತ್ಪಾದಕರಿಂದ ಹಾಲು ಖರೀದಿಸುವ ವೆಚ್ಚ ಹೆಚ್ಚಾಗಿರುವುದರಿಂದ ಉಂಟಾದ ಆರ್ಥಿಕ ಹೊರೆಯನ್ನು ಗ್ರಾಹಕರಿಗೆ ವರ್ಗಾಯಿಸುವುದು ಅನಿವಾರ್ಯವಾಗಿದೆ ಎಂದು ಸಂಸ್ಥೆ ಹೇಳಿದೆ.
ಮದರ್ ಡೈರಿಯ ಪರಿಷ್ಕೃತ ದರಗಳು:
- ಟೋನ್ಡ್ ಹಾಲು – ₹58ರಿಂದ ₹60ಕ್ಕೆ
- ಪೌಚ್ ಟೋನ್ಡ್ ಹಾಲು – ₹60ರಿಂದ ₹62ಕ್ಕೆ
- ಫುಲ್ ಕ್ರೀಮ್ ಪೌಚ್ ಹಾಲು – ₹72ರಿಂದ ₹76ಕ್ಕೆ
- ಡಬಲ್ ಟೋನ್ಡ್ ಹಾಲು – ₹54ರಿಂದ ₹56ಕ್ಕೆ
- ಹಸುವಿನ ಹಾಲು – ₹62ರಿಂದ ₹65ಕ್ಕೆ ಏರಿಕೆಯಾಗಿದೆ.
ನಂದಿನಿ ಹಾಲಿನ ದರ ಏರಿಕೆಯ ಬೆನ್ನಲ್ಲೇ ಅಮುಲ್ ಮತ್ತು ಮದರ್ ಡೈರಿ ಕೂಡ ಬೆಲೆ ಹೆಚ್ಚಿಸಿರುವುದು ಹಾಲು ಖರೀದಿಸುವ ಸಾಮಾನ್ಯ ಕುಟುಂಬಗಳ ಮಾಸಿಕ ಖರ್ಚಿನ ಮೇಲೆ ಹೆಚ್ಚುವರಿ ಹೊರೆ ಉಂಟುಮಾಡುವ ಸಾಧ್ಯತೆಯಿದೆ.