ಬೆಂಗಳೂರು : ತುಳುವ ಮಹಾಸಭಾ ಇಂಟರ್ನ್ಯಾಷನಲ್ ಹಾಗೂ ತುಳು ವರ್ಲ್ಡ್ ಫೌಂಡೇಶನ್ ನಿಯೋಗವು 29 ಅಕ್ಟೋಬರ್ 2026, ಗುರುವಾರದಂದು, ಬೆಂಗಳೂರಿನ ಪೂರ್ಣಪ್ರಜ್ಞ ವಿದ್ಯಾಪೀಠದಲ್ಲಿ ಉಡುಪಿ ಪೇಜಾವರ ಅಧೋಕ್ಷಜ ಮಠದ ಪರಮಪೂಜ್ಯ ಶ್ರೀ ಶ್ರೀ ಶ್ರೀ ವಿಶ್ವಪ್ರಸನ್ನ ತೀರ್ಥ ಶ್ರೀಪಾದಂಗಳವರನ್ನು ಭೇಟಿ ಮಾಡಿ ಗೌರವಪೂರ್ವಕವಾಗಿ ವಿಜ್ಞಾಪನಾ ಪತ್ರವನ್ನು ಸಲ್ಲಿಸಿತು. ಪೂಜ್ಯ ಪೇಜಾವರ ಶ್ರೀಗಳು ಅತ್ಯಂತ ಪ್ರೀತಿ-ವಾತ್ಸಲ್ಯದಿಂದ ವಿಜ್ಞಾಪನಾ ಪತ್ರವನ್ನು ಸ್ವೀಕರಿಸಿ, ತುಳು ಭಾಷೆ, ಸಂಸ್ಕೃತಿ ಹಾಗೂ ತುಳುವರ ಒಗ್ಗಟ್ಟಿನ ಈ ಮಹತ್ಕಾರ್ಯಕ್ಕೆ ತಮ್ಮ ಸಂಪೂರ್ಣ ಬೆಂಬಲ ಮತ್ತು ಆಶೀರ್ವಾದವನ್ನು ವ್ಯಕ್ತಪಡಿಸಿದರು.
ಸಂಘಟನೆಯ ಜಾಗತಿಕ ಪಯಣದ ವಿವರಿಸುವಿಕೆ
ಭೇಟಿಯ ಸಂದರ್ಭದಲ್ಲಿ ರಾಜ್ಯ ಅಧ್ಯಕ್ಷರಾದ ದೇವೇಂದ್ರ ಹೆಗ್ಡೆ ಕೊಕ್ರಾಡಿ ಅವರು ಪೂಜ್ಯ ಶ್ರೀಗಳಿಗೆ ತುಳುವ ಮಹಾಸಭಾದ ಆರಂಭಿಕ ಇತಿಹಾಸ, ಪ್ರಸ್ತುತ ಜಾಗತಿಕ ಮಟ್ಟದಲ್ಲಿ ಸಾಗುತ್ತಿರುವ ಸಂಘಟನಾತ್ಮಕ ವಿಸ್ತರಣೆಗಳು, ಹಾಗೂ ವಿವಿಧ ದೇಶ-ರಾಜ್ಯಗಳಲ್ಲಿ ರೂಪುಗೊಳ್ಳುತ್ತಿರುವ ಸಮಿತಿಗಳ ಚಟುವಟಿಕೆಗಳ ಕುರಿತು ವಿವರವಾಗಿ ಮಾಹಿತಿ ನೀಡಿದರು. ಮುಂಬರುವ 2028ರ ಸೆಪ್ಟೆಂಬರ್ 23 ರಂದು ನೆರವೇರಲಿರುವ ‘ತುಳುವ ಮಹಾಸಭಾದ ಶತಮಾನೋತ್ಸವ’ದ ತಯಾರಿ ಹಾಗೂ ಜಾಗತಿಕ ಮಟ್ಟದ ಯೋಜನಾ ರೂಪರೇಖೆಗಳನ್ನು ಪೂಜ್ಯರ ಮುಂದಿಡಲಾಯಿತು.
ಗೌರವ ಸಲಹೆಗಾರ ಹಾಗೂ ಮಾರ್ಗದರ್ಶಕರಾಗಲು ವಿನಂತಿ
ತುಳುವ ಮಹಾಸಭಾದ ಸ್ಥಾಪಕರಾದ ಮಹಾತ್ಮ ದಿವಂಗತ ಶ್ರೀನಿವಾಸ ಉಪಾಧ್ಯಾಯ ಪಣಿಯಾಡಿಯವರು ಉಡುಪಿಯ ಪುಣ್ಯಭೂಮಿಯವರಾಗಿದ್ದು, ಅವರ ಸ್ಮರಣೆಯಲ್ಲಿ ಶತಮಾನೋತ್ಸವ ಸಂಭ್ರಮವನ್ನು ಉಡುಪಿಯ ಧರ್ಮಪೀಠದ ಅಂಗಳದಲ್ಲೇ ನಡೆಸುವುದು ಅತ್ಯಂತ ಔಚಿತ್ಯಪೂರ್ಣವಾಗಿದೆ. ಈ ಐತಿಹಾಸಿಕ ಆಚರಣೆಗೆ ಪೂಜ್ಯ ಪೇಜಾವರ ಶ್ರೀಗಳು ‘ಗೌರವ ಸಲಹೆಗಾರರು ಮತ್ತು ದಿವ್ಯ ಮಾರ್ಗದರ್ಶಕರು’ ಆಗಿ ಕಾರ್ಯಕ್ರಮದ ನೇತೃತ್ವ ವಹಿಸಬೇಕೆಂದು ನಿಯೋಗವು ಶ್ರದ್ಧಾಪೂರ್ವಕವಾಗಿ ವಿನಂತಿಸಿಕೊಂಡಿತು.
ಶ್ರೀಗಳ ಆಶೀರ್ವಚನ ಮತ್ತು ಭರವಸೆ
ನಿಯೋಗದ ಮನವಿಗೆ ಸ್ಪಂದಿಸಿದ ಪೂಜ್ಯ ಶ್ರೀಪಾದಂಗಳವರು, ಉಡುಪಿಯಲ್ಲಿ ನಡೆಯಲಿರುವ ಶತಮಾನೋತ್ಸವ ಕಾರ್ಯಕ್ರಮಕ್ಕೆ ಶ್ರೀಮಠದ ಸಂಪೂರ್ಣ ಸಹಕಾರ ಹಾಗೂ ಮಾರ್ಗದರ್ಶನ ನೀಡುವುದಾಗಿ ಭರವಸೆ ನೀಡಿದರು. ಅಲ್ಲದೆ ಉಪಸ್ಥಿತರಿದ್ದ ಸಮಸ್ತ ಪದಾಧಿಕಾರಿಗಳಿಗೆ ಅನುಗ್ರಹ ಮಂತ್ರಾಕ್ಷತೆ ನೀಡಿ ಶುಭ ಹಾರೈಸಿದರು.
ಈ ಪವಿತ್ರ ಭೇಟಿಯ ಸಂದರ್ಭದಲ್ಲಿ ತುಳುವ ಮಹಾಸಭಾ ಇಂಟರ್ನ್ಯಾಷನಲ್ ಹಾಗೂ ತುಳು ವರ್ಲ್ಡ್ ಫೌಂಡೇಶನ್ ನಿಯೋಗದಲ್ಲಿ ರಾಜ್ಯ ಅಧ್ಯಕ್ಷರಾದ ದೇವೇಂದ್ರ ಹೆಗ್ಡೆ ಕೊಕ್ರಾಡಿ, ರಾಜ್ಯ ಪ್ರಧಾನ ಕಾರ್ಯದರ್ಶಿ ಹರ್ಷೇಂದ್ರ ಜೈನ್ ಮಾಳ, ರಾಜ್ಯ ಪ್ರಧಾನ ಸಂಚಾಲಕರಾದ ಅಭಿಷೇಕ್ ಕೆ. ಕಾರ್ಕಳ, ಬೆಂಗಳೂರು ವಲಯ ಅಧ್ಯಕ್ಷರಾದ ಪುರುಷೋತ್ತಮ ಚೇಂಡ್ಲಾ , ಬೆಂಗಳೂರು ವಲಯ ಕಾರ್ಯದರ್ಶಿಗಳಾದ ಶಾಂತಾರಾಮ್ ವಿ. ಶೆಟ್ಟಿ, ಬೆಂಗಳೂರು ವಲಯ ಪ್ರಧಾನ ಸಂಚಾಲಕರಾದ ಶಿವಾನಂದ ಸಾಲ್ಯಾನ್ ಹಾಗೂ ಖ್ಯಾತ ಜ್ಯೋತಿಷಿ ಬಿ. ಎಲ್. ಸುಭಾಷ್‌ಚಂದ್ರ ಜೈನ್ ಅವರು ಉಪಸ್ಥಿತರಿದ್ದು, ಪೂಜ್ಯ ಶ್ರೀಗಳ ದಿವ್ಯ ದರ್ಶನ ಪಡೆದು ಆಶೀರ್ವಾದ ಪಡೆದುಕೊಂಡರು.