ಬಂಟ್ವಾಳ : ತುಳುನಾಡಿನ ಸಾಂಸ್ಕೃತಿಕ ಹಾಗೂ ದೈವಾರಾಧನೆಯ ಇತಿಹಾಸದಲ್ಲಿ ಧಾರ್ಮಿಕ ಕ್ಷೇತ್ರಗಳ ಪುನರ್ನಿರ್ಮಾಣಕ್ಕೆ ಅತ್ಯಂತ ಪವಿತ್ರವಾದ ಸ್ಥಾನವಿದೆ. ಈ ಪರಂಪರೆಯ ಮುಂದುವರಿದ ಭಾಗವಾಗಿ, ದಕ್ಷಿಣ ಕನ್ನಡ ಜಿಲ್ಲೆಯ ಬಂಟ್ವಾಳ ತಾಲೂಕಿನ ಸಿದ್ದಕಟ್ಟೆ ಸಮೀಪದ ಕರ್ಪೆ ಗ್ರಾಮದ ಶ್ರೀ ಕ್ಷೇತ್ರ ಮಾಡದಬೆಟ್ಟದಲ್ಲಿ ಇಂದು ಅಧ್ಯಾತ್ಮದ ಹೊಸದೊಂದು ಮೈಲಿಗಲ್ಲು ಸ್ಥಾಪಿತವಾಗುತ್ತಿದೆ.
ಇತಿಹಾಸ ಪ್ರಸಿದ್ಧ ಶ್ರೀ ಧರ್ಮ ಅರಸು ಉಳ್ಳಾಯ ಮತ್ತು ಶ್ರೀ ಕೊಡಮಣಿ ತ್ತಾಯ ದೈವಗಳ ಜೀರ್ಣೋದ್ಧಾರ ಕಾರ್ಯದ ಅಂಗವಾಗಿ, ಇಂದು ಶಿಲಾನ್ಯಾಸ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿದ್ದು, ಇಡೀ ಗ್ರಾಮದಲ್ಲಿ ಭಕ್ತಿ ಸೌರಭ ಮನೆಮಾಡಿದೆ.
ಈ ಮಹೋನ್ನತ ಧಾರ್ಮಿಕ ಕಾರ್ಯಕ್ರಮವು ಅಂದರೆ ಜೂನ್ 19, 2026ರ ಶುಕ್ರವಾರದಂದು ಬೆಳಿಗ್ಗೆ 10.09ರ ಕರ್ಕಾಟಕ ಲಗ್ನದ ಶುಭ ಮುಹೂರ್ತದಲ್ಲಿ ಶ್ರೀ ಕ್ಷೇತ್ರದ ಪ್ರಮುಖರಾದ ಬಿ. ಕೃಷ್ಣ ಅಸ್ತ್ರಣ್ಣ ಅವರ ದಿವ್ಯ ನೇತೃತ್ವದಲ್ಲಿ ಶಾಸ್ತ್ರೋಕ್ತವಾಗಿ ನೆರವೇರಲಿದೆ.
ಜೀರ್ಣೋದ್ಧಾರ ಸಮಿತಿಯ ಅಧ್ಯಕ್ಷರಾದ ದುರ್ಗಾದಾಸ್ ಶೆಟ್ಟಿ ಮಾವಂತೂರು, ಆಡಳಿತ ಕಮಿಟಿ ಹಾಗೂ ಗುತ್ತು ಬಾಳಿಕೆಯ ಪರವಾಗಿ ಕೆ. ಗಣೇಶ್ ನಾಯಕ್ ಮತ್ತು ಹತ್ತು ಸಮಸ್ತರ ಸಮ್ಮುಖದಲ್ಲಿ ಈ ಕಾರ್ಯ ನಡೆಯುತ್ತಿದ್ದು, ಭವಿಷ್ಯದ ಭವ್ಯ ಸನ್ನಿಧಿಯ ನೀಲನಕ್ಷೆಯಂತೆ ಸುಂದರ ಕ್ಷೇತ್ರ ತಲೆಯೆತ್ತಲು ಸರ್ವ ಸಿದ್ಧತೆಗಳು ನಡೆದಿವೆ.
ಈ ಐತಿಹಾಸಿಕ ಪುಣ್ಯಕ್ಷಣಕ್ಕೆ ಸಾಕ್ಷಿಯಾಗಲು ನುಡಿ ಹಾಗೂ ದೈವದ ಭಕ್ತರು ಅಪಾರ ಸಂಖ್ಯೆಯಲ್ಲಿ ಕ್ಷೇತ್ರದಲ್ಲಿ ಆಗಮಿಸುತ್ತಿದ್ದಾರೆ.
ದೈವಿಕ ಸನ್ನಿಧಾನಗಳ ಪುನರುಜ್ಜೀವನ ಎಂದರೆ ಅದು ಕೇವಲ ಕಟ್ಟಡದ ನಿರ್ಮಾಣವಲ್ಲ, ಬದಲಿಗೆ ನಮ್ಮ ಆಚಾರ-ವಿಚಾರ ಮತ್ತು ಸಾಂಸ್ಕೃತಿಕ ಬೇರುಗಳನ್ನು ಗಟ್ಟಿಗೊಳಿಸುವ ಪವಿತ್ರ ಕಾರ್ಯವಾಗಿದೆ. ಈ ಜೀರ್ಣೋದ್ಧಾರ ಕಾರ್ಯವು ಯಶಸ್ವಿಯಾಗಿ ಸಂಪೂರ್ಣಗೊಳ್ಳಲು ಭಕ್ತಾಭಿಮಾನಿಗಳ ತನು-ಮನ-ಧನದ ಒಗ್ಗಟ್ಟಿನ ಸಹಕಾರ ಅತ್ಯಂತ ಅಗತ್ಯವಾಗಿದೆ.
ಊರಿನ ಪ್ರಗತಿ ಹಾಗೂ ಮುಂದಿನ ಪೀಳಿಗೆಯ ಕಲ್ಯಾಣಕ್ಕಾಗಿ ದೈವದ ಕಾರುಣ್ಯವನ್ನು ಬೇಡುತ್ತಾ, ನಾವೆಲ್ಲರೂ ಈ ಮಹತ್ಕಾರ್ಯದಲ್ಲಿ ಭಕ್ತಿಯಿಂದ ಕೈಜೋಡಿಸಿ ಶ್ರೀ ಧರ್ಮ ಅರಸು ಉಳ್ಳಾಯ ಮತ್ತು ದೈವದ ಕೃಪೆಗೆ ಪಾತ್ರರಾಗೋಣ ಎನ್ನುವುದೇ ಈ ದಿನದ ದಿವ್ಯ ಸಂದೇಶವಾಗಿದೆ.
ವರದಿ -ಮಂದಾರ ರಾಜೇಶ್ ಭಟ್