ಕ್ರಿಪ್ಟೋಕರೆನ್ಸಿಯ ದೊಡ್ಡ ಬೆಂಬಲಿಗರಲ್ಲಿ ಒಬ್ಬರಾಗಿದ್ದ ಅಮೆರಿಕದ ಬಿಲಿಯನೇರ್ ಉದ್ಯಮಿ ಹಾಗೂ ‘ಶಾರ್ಕ್ ಟ್ಯಾಂಕ್’ ಖ್ಯಾತಿಯ Mark Cuban ಇದೀಗ ತಮ್ಮ ನಿಲುವಿನಲ್ಲಿ ಮಹತ್ವದ ಬದಲಾವಣೆ ಮಾಡಿಕೊಂಡಿದ್ದಾರೆ. ತಮ್ಮ ಬಳಿ ಇದ್ದ ಬಹುಪಾಲು ಬಿಟ್ಕಾಯಿನ್ ಹೂಡಿಕೆಯನ್ನು ಮಾರಾಟ ಮಾಡಿರುವುದಾಗಿ ಅವರು ಬಹಿರಂಗಪಡಿಸಿದ್ದಾರೆ.
ಒಂದಾನೊಂದು ಕಾಲದಲ್ಲಿ ಬಿಟ್ಕಾಯಿನ್ ಅನ್ನು “ಚಿನ್ನಕ್ಕಿಂತಲೂ ಉತ್ತಮ ಆಸ್ತಿ” ಎಂದು ಹೊಗಳಿದ್ದ ಕ್ಯೂಬನ್, ಈಗ ಜಾಗತಿಕ ರಾಜಕೀಯ ಹಾಗೂ ಆರ್ಥಿಕ ಬಿಕ್ಕಟ್ಟಿನ ಸಂದರ್ಭಗಳಲ್ಲಿ ಸುರಕ್ಷಿತ ಹೂಡಿಕೆ (Safe Haven Asset) ಆಗಿ ಬಿಟ್ಕಾಯಿನ್ ಕಾರ್ಯನಿರ್ವಹಿಸುವಲ್ಲಿ ವಿಫಲವಾಗಿದೆ ಎಂದು ಹೇಳಿದ್ದಾರೆ.
ಇತ್ತೀಚಿನ ಸಂದರ್ಶನವೊಂದರಲ್ಲಿ ಮಾತನಾಡಿದ ಅವರು, “ಬಿಟ್ಕಾಯಿನ್ ನಾನು ನಿರೀಕ್ಷಿಸಿದ್ದ ರೀತಿಯಲ್ಲಿ ವರ್ತಿಸುತ್ತಿಲ್ಲ. ಜಾಗತಿಕ ಅನಿಶ್ಚಿತತೆಯ ಸಂದರ್ಭದಲ್ಲಿ ಅದು ರಕ್ಷಣಾತ್ಮಕ ಆಸ್ತಿಯಂತೆ ಕೆಲಸ ಮಾಡುತ್ತದೆ ಎಂದು ಭಾವಿಸಿದ್ದೆ. ಆದರೆ ವಾಸ್ತವದಲ್ಲಿ ಅದು ಅಷ್ಟು ಪರಿಣಾಮಕಾರಿ ಆಗಿಲ್ಲ” ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ.
ಈ ಹಿಂದೆ ಬಿಟ್ಕಾಯಿನ್ ಅನ್ನು ಚಿನ್ನದ ಆಧುನಿಕ ಆವೃತ್ತಿ ಎಂದು ಬಣ್ಣಿಸಿದ್ದ ಕ್ಯೂಬನ್, ಇದೀಗ ಕ್ರಿಪ್ಟೋ ಮಾರುಕಟ್ಟೆಯ ವ್ಯವಸ್ಥೆಯೇ ಹಾದಿ ತಪ್ಪಿದೆ ಎಂಬ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಆದಾಗ್ಯೂ, Ethereum ಕುರಿತು ಅವರಿಗೆ ಇನ್ನೂ ವಿಶ್ವಾಸವಿದ್ದು, ಬ್ಲಾಕ್ಚೈನ್ ತಂತ್ರಜ್ಞಾನದ ಭವಿಷ್ಯದ ಬಗ್ಗೆ ಆಶಾವಾದ ಹೊಂದಿರುವುದಾಗಿ ತಿಳಿಸಿದ್ದಾರೆ.
ಮಾರ್ಕ್ ಕ್ಯೂಬನ್ ಅವರ ಈ ಹೇಳಿಕೆ ಕ್ರಿಪ್ಟೋ ಹೂಡಿಕೆದಾರರ ವಲಯದಲ್ಲಿ ಸಾಕಷ್ಟು ಚರ್ಚೆಗೆ ಕಾರಣವಾಗಿದ್ದು, ಬಿಟ್ಕಾಯಿನ್ನ ಭವಿಷ್ಯದ ಕುರಿತು ಮತ್ತೆ ಪ್ರಶ್ನೆಗಳು ಮೂಡಲು ಕಾರಣವಾಗಿದೆ.