ಬಂಟ್ವಾಳ : ಸಿದ್ದಕಟ್ಟೆ ಸಮೀಪದ ಕರ್ಪೇ ಗ್ರಾಮದ ಭಕ್ತಿ ಚೇತನದ ಕೇಂದ್ರ “ಶ್ರೀ ಕ್ಷೇತ್ರ ಮಾಡದಬೆಟ್ಟು”ನಲ್ಲಿ ನಿನ್ನೆ ಭಕ್ತಿಭಾವದ ‘ಶಿಲಾನ್ಯಾಸ ಕಾರ್ಯಕ್ರಮ’ ಅತ್ಯಂತ ಯಶಸ್ವಿಯಾಗಿ ನೆರವೇರಿತು.
ಕ್ಷೇತ್ರದ ಮೂಲಸ್ಥಾನದ ಆರಾಧ್ಯ ಶಕ್ತಿಗಳಾದ ಶ್ರೀ ಧರ್ಮ ಅರಸು ಉಳ್ಳಾಯ ಹಾಗೂ ಶ್ರೀ ಕೊಡಮಣಿತ್ತಾಯ ದೈವಸ್ಥಾನಗಳ ಭವ್ಯ ಪುನರ್ನಿರ್ಮಾಣಕ್ಕೆ ಮುನ್ನುಡಿ ಬರೆಯುವ ಈ ಪವಿತ್ರ ಕಾರ್ಯವು ಅಪಾರ ಭಕ್ತಸಮೂಹದ ಸಮ್ಮುಖದಲ್ಲಿ ಶ್ರದ್ಧಾಭಕ್ತಿಗಳಿಂದ ಸಂಪನ್ನಗೊಂಡಿತು.
ನಿನ್ನೆ ಬೆಳಿಗ್ಗೆ 10.09ರ ಕರ್ಕಾಟಕ ಲಗ್ನದ ಸುಮುಹೂರ್ತದಲ್ಲಿ, ಶ್ರೀ ಕ್ಷೇತ್ರದ ಪರಮಪೂಜ್ಯರಾದ ಕೃಷ್ಣ ಆಸ್ರಣ್ಣರ ದಿವ್ಯ ನೇತೃತ್ವ ದ ಶಿಲಾನ್ಯಾಸದ ಧಾರ್ಮಿಕ ವಿಧಿವಿಧಾನಗಳು ನೆರವೇರಿದವು.
ವೇದಮಂತ್ರಗಳ ಘೋಷ, ಗಂಟೆ-ಜಾಗಟೆಗಳ ಪವಿತ್ರ ನಾದದ ನಡುವೆ, ಜೀರ್ಣೋದ್ದಾರದ ಪ್ರಥಮ ವಿಶೇಷ ಪೂಜೆ ನೆರವೇರಿಸಲಾಯಿತು.
ಕೈಮುಗಿದು ನಿಂತಿದ್ದ ಭಕ್ತರು ತಮ್ಮ ಆರಾಧ್ಯ ದೈವಗಳ ಕೃಪಾಕಟಾಕ್ಷ ಸದಾ ಇಡೀ ಊರಿನ ಮೇಲಿರಲಿ ಎಂದು ಕಣ್ಣುಂಬಿ ಪ್ರಾರ್ಥಿಸಿದ ಕ್ಷಣಗಳು ಅತ್ಯಂತ ಭಾವುಕವಾಗಿದ್ದವು.
ಈ ಪವಿತ್ರ ಶಿಲಾನ್ಯಾಸ ಮುಹೂರ್ತದ ಸಾಕ್ಷಿಯಾಗಿ ಜೀರ್ಣೋದ್ದಾರ ಸಮಿತಿಯ ಅಧ್ಯಕ್ಷರಾದ ಶ್ರೀ ದುರ್ಗಾದಾಸ್ ಶೆಟ್ಟಿ ಮಾವಂತೂರು, ಆಡಳಿತ ಸಮಿತಿಯ ಅಧ್ಯಕ್ಷರಾದ ಶ್ರೀ ಗಣೇಶ್ ನಾಯಕ್, ಗುತ್ತು ಬಾಳಿಕೆಯ ಹಿರಿಯರು, ಸಮಿತಿಯ ಸರ್ವಸದಸ್ಯರು ಹಾಗೂ ಊರಿನ ಹತ್ತು ಸಮಸ್ತರು ಭಕ್ತಿಯಿಂದ ಪಾಲ್ಗೊಂಡಿದ್ದರು.
ಶಿಲಾನ್ಯಾಸ ನೆರವೇರುವುದರೊಂದಿಗೆ ಮಾಡದಬೆಟ್ಟು ಕ್ಷೇತ್ರದ ಪುನರ್ನಿರ್ಮಾಣದ ಮಹಾ ಸಂಕಲ್ಪಕ್ಕೆ ಅಧಿಕೃತ ಚಾಲನೆ ಸಿಕ್ಕಂತಾಗಿದ್ದು, ಭಕ್ತರೆಲ್ಲರೂ ಈ ಪುಣ್ಯ ಕಾರ್ಯದಲ್ಲಿ ಭಾಗಿಗಳಾಗಿ ದೈವಕೃಪೆಗೆ ಪಾತ್ರರಾದರು.
“ನಂಬಿದವರನ್ನು ಕೈಬಿಡದ ಕಾರಣಿಕ ಶಕ್ತಿಗಳಾದ ಶ್ರೀ ಧರ್ಮ ಅರಸು ಉಳ್ಳಾಯ ಮತ್ತು ಶ್ರೀ ಕೊಡಮಣಿತ್ತಾಯ ದೈವಗಳ ಸನ್ನಿಧಾನವನ್ನು ಪುನಶ್ಚೇತನಗೊಳಿಸುವುದು ಕೇವಲ ಒಂದು ಕಟ್ಟಡದ ನಿರ್ಮಾಣವಲ್ಲ; ಅದು ನಮ್ಮ ಸಂಸ್ಕೃತಿ, ಪರಂಪರೆ ಮತ್ತು ತಲೆಮಾರುಗಳ ನಂಬಿಕೆಯನ್ನು ಜೀವಂತವಾಗಿಡುವ ಪವಿತ್ರ ಯಜ್ಞ. ಈ ಜೀರ್ಣೋದ್ದಾರ ಕಾರ್ಯದಲ್ಲಿ ನಾವೆಲ್ಲರೂ ಭಕ್ತಿಯಿಂದ ಕೈಜೋಡಿಸಿ, ದೈವಗಳ ಕೃಪಾಶೀರ್ವಾದಕ್ಕೆ ಪಾತ್ರರಾಗೋಣ. ನಮ್ಮ ಭಕ್ತಿ ಮತ್ತು ನಿಸ್ವಾರ್ಥ ಸೇವೆ ಮಾತ್ರವೇ ಆ ಭಗವಂತನಿಗೆ ನಾವು ಸಲ್ಲಿಸಬಹುದಾದ ಅತಿ ದೊಡ್ಡ ಕಾಣಿಕೆ.”