ವರದಿ : ಮಂದಾರ ರಾಜೇಶ್ ಭಟ್
ಬೆಂಕಿಯ ನೆರಳಲ್ಲಿ ನಿಂತು ಬೆಳಕಾದ ಕೈಗಳಿಗೆ ಕೃತಜ್ಞತೆಯ ಕಾವ್ಯ
ಸೈರನ್ ಕೂಗಿದ ಕ್ಷಣವೇ ಮನೆ, ಹಬ್ಬ, ನಿದ್ದೆ ಎಲ್ಲ ಮರೆತು ಹೊಗೆ ಆವರಿಸಿದ ದಾರಿಗೆ ಧಾವಿಸುವವರು ಇವರು.
ಕಟ್ಟಡ ಉರಿಯುತ್ತಿದ್ದರೆ ಜನ ಓಡುವ ದಿಕ್ಕಿಗೆ ವಿರುದ್ಧವಾಗಿ ಓಡುವವರು ಇವರು.
ಅವರ ಹೆಸರು ಅಗ್ನಿಶಾಮಕರು. ಅವರಿಗಾಗಿಯೇ ಮೀಸಲಾದ ದಿನ ಮೇ ನಾಲ್ಕು.
ಹುಟ್ಟಿದ ಕಥೆ =ಒಂದು ಕಾಡ್ಗಿಚ್ಚು, ಐದು ಜೀವಗಳು, ಒಂದು ಪ್ರತಿಜ್ಞೆ.
ಆಸ್ಟ್ರೇಲಿಯಾದ ಕಾಡಲ್ಲಿ ಬೆಂಕಿ ನಂದಿಸಲು ಹೋದ ಐವರು ಸಿಬ್ಬಂದಿ ಮತ್ತೆ ಮನೆಗೆ ಬರಲೇ ಇಲ್ಲ. ಆ ಬೂದಿಯ ರಾಶಿಯಿಂದ ಹುಟ್ಟಿದ್ದೇ ಈ ದಿನ. ಅವರ ತ್ಯಾಗಕ್ಕೆ ಜಗತ್ತು ತಲೆಬಾಗಿದ್ದು, ಅಂದಿನಿಂದ ಮೇ ನಾಲ್ಕನ್ನು ಅಗ್ನಿಶಾಮಕರ ದಿನವನ್ನಾಗಿ ಆಚರಿಸಲಾಗುತ್ತಿದೆ.
ಯುರೋಪಿನಲ್ಲಿ ಈ ದಿನ ಅಗ್ನಿಶಾಮಕರ ಪೋಷಕ ಸಂತ ಫ್ಲೋರಿಯನ್ರ ಹಬ್ಬವೂ ಹೌದು. ಹೀಗೆ ದುಃಖದಿಂದ ಹುಟ್ಟಿದ ದಿನವೊಂದು ಗೌರವದ ಸಂಕೇತವಾಯಿತು.
ಬೆಂಕಿ ನಂದಿಸುವುದು ಇವರ ಕೆಲಸದ ಒಂದು ಎಳೆಯಷ್ಟೆ. ಮಧ್ಯರಾತ್ರಿ ಮಗು ಬಾವಿಗೆ ಬಿದ್ದರೆ ಇಳಿಯುವವರು ಇವರು. ಮಳೆ ಬಂದು ಮನೆ ಕುಸಿದರೆ ಕಲ್ಲು ಸರಿಸಿ ಉಸಿರು ಹುಡುಕುವವರು ಇವರು. ರಸ್ತೆ ಅಪಘಾತದಲ್ಲಿ ನಜ್ಜುಗುಜ್ಜಾದ ಕಬ್ಬಿಣದೊಳಗೆ ಸಿಲುಕಿದವರನ್ನು ಹೊರತೆಗೆದು ಆಸ್ಪತ್ರೆ ಸೇರಿಸುವವರು ಇವರು. ಲಿಫ್ಟ್ ನಿಂತು ಅಜ್ಜಿ ಕೂಗಿದರೆ ಬಾಗಿಲು ಒಡೆದು ಸಮಾಧಾನ ಹೇಳುವವರು ಇವರು. ವಿಷಾನಿಲ ಸೋರಿದರೆ ಮುಖಕ್ಕೆ ಬಟ್ಟೆ ಕಟ್ಟಿ ಮೊದಲು ಒಳ ನುಗ್ಗುವವರು ಇವರು.
ನಾವು “ಅಪಾಯ” ಎಂದು ಕರೆದು ಓಡುವ ಪ್ರತಿಯೊಂದು ಕಡೆಗೂ “ಕರ್ತವ್ಯ” ಎಂದು ಓಡಿ ಬರುವವರು ಇವರು.
ಗುರುತಿನ ಬಣ್ಣ
ಈ ದಿನದ ಸಂಕೇತ ನೀಲಿ-ಕೆಂಪು ರಿಬ್ಬನ್. ನೀಲಿ ತಂಪೆರೆಯುವ ನೀರಿನ ಸಂಕೇತ, ಕೆಂಪು ಸುಡುವ ಬೆಂಕಿಯ ನೆನಪು. ಮಧ್ಯಾಹ್ನ ಸರಿಯಾಗಿ ಹನ್ನೆರಡು ಗಂಟೆಗೆ ಜಗತ್ತಿನ ಮೂಲೆಮೂಲೆಯಲ್ಲಿ ಒಂದು ನಿಮಿಷ ಮೌನ ಆಚರಿಸಿ, ಕರ್ತವ್ಯದಲ್ಲಿ ಪ್ರಾಣ ತೆತ್ತ ಎಲ್ಲ ವೀರರಿಗೆ ನಮನ ಸಲ್ಲಿಸಲಾಗುತ್ತದೆ. ಅಗ್ನಿಶಾಮಕ ಠಾಣೆಗಳಲ್ಲಿ ದೀಪ ಹಚ್ಚಿ ಪ್ರಾರ್ಥನೆ ಸಲ್ಲುತ್ತದೆ.
ಮರೆಯದ ಸತ್ಯ
ಸಮವಸ್ತ್ರದೊಳಗಿನ ದೇಹಕ್ಕೆ ಬೆಂಕಿಯ ಗಾಯಗಳಿವೆ, ಶ್ವಾಸಕೋಶದಲ್ಲಿ ಹೊಗೆಯ ಕಲೆ ಇದೆ, ಮನಸ್ಸಲ್ಲಿ ಉಳಿಸಲಾಗದ ಜೀವಗಳ ನೋವಿದೆ. ಆದರೂ ಕರೆ ಬಂದರೆ ಮತ್ತೆ ಹೆಲ್ಮೆಟ್ ಏರಿಸಿ ಹೊರಡುತ್ತಾರೆ. ಏಕೆಂದರೆ ಅವರಿಗೆ ಗೊತ್ತು – ಅವರು ತಡವಾದರೆ ಒಂದು ಕುಟುಂಬ ಅಳುತ್ತದೆ.
ಬೆಂಕಿ ಆಕಸ್ಮಿಕವಲ್ಲ, ಬಹುತೇಕ ಸಲ ನಮ್ಮ ಅಜಾಗರೂಕತೆಯ ಫಲ. ಒಂದು ಸಣ್ಣ ದೀಪದಿಂದ ಮನೆ ಉರಿಯಬಹುದು, ಒಂದು ಅಲಕ್ಷ್ಯದ ಕಿಡಿಯಿಂದ ಕಾಡು ಸುಡಬಹುದು. ಹಬ್ಬದ ಪಟಾಕಿ ಹಚ್ಚುವಾಗ, ಗ್ಯಾಸ್ ಆರಿಸುವಾಗ, ವಿದ್ಯುತ್ ಉಪಕರಣ ಬಳಸುವಾಗ ಒಂದು ಕ್ಷಣ ಯೋಚಿಸಿ. ನಿಮ್ಮ ಮನೆಯಲ್ಲಿ ಅಗ್ನಿ ಸುರಕ್ಷತೆ ಇದ್ದರೆ ಅವರಿಗೆ ಒಂದು ಕರೆ ಕಡಿಮೆ. ತುರ್ತಿಗೆ ನೂರೊಂದು ನೆನಪಿಡಿ. ಅಗ್ನಿಶಾಮಕರು ಕೇಪ್ ಹಾಕದ ಹೀರೋಗಳು. ಅವರನ್ನು ಗೌರವಿಸುವುದು ಎಂದರೆ ನಾವು ಜವಾಬ್ದಾರರಾಗಿರುವುದು. ನಮ್ಮ ಎಚ್ಚರವೇ ಅವರಿಗೆ ನಾವು ಕೊಡುವ ದೊಡ್ಡ ಪ್ರಶಸ್ತಿ. ಬೆಳಕು ಹಂಚೋಣ, ಬೆಂಕಿ ತಡೆಯೋಣ.